Isaya 61:10 - Baibo Busansulushi Bwa Libuku Ili

¹⁰ Ndasangalala cankusu muMwaami Lesa. Moyo wangu ulisangalete abuumbi muli Lesa. Ceebo wamfwalika lupulusho anga ncakufwala ca peculu akumfwalika bululami anga ngumungaanjo. Wamfwalikabo bweenka shibwiinga nabi mupailishi mbwaalibotesha kumutwi, nabibo shibwiinga mbwaalibotesha ashakulibotesha sha makwebo.

Isaya 61:10 교차 참조

Bene Filipi 3:9

alimwi akucanika muli nguwe. Nshiliyeeyeli kwaamba ayi ndiluleme kwiinda mukukonkela Milawo, sombi bululami bwangu bulacanika kwiinda mukushoma Klistu. Bululami ubu buswa kuli Lesa bulapekwa kwiinda mulushomo.

Kulumbaisha 132:9

Bapailishi banu abafwale bululami anga ncakufwala. Abalo bantu banu basalalite kabeemba cakusangalala.

Bene Loma 14:17

Bweene bwakwe Lesa mubuumi bwesu teshi bwakulya akunwa, sombi mbwabululami, luumuno alimwi akusangalala kuswa muMushimu Usalashi.

Bene Loma 5:11

Sombi teshi ceeci ceenka, tulasangalala muli Lesa ceebo Mwaami wesu Jesu Klistu wakalengesha ayi alimwi tube beshicibusa bakwe Lesa.

Kulumbaisha 132:16

Ndaakupa shoolwe bapailishi ba mumo mushintu shoonse nsheshi bakanoocita. Bantu bekalaamo balaakwiimba cakusangalala.

Ciyubululo 21:2

Ndakabona andabala inene isalalite ya Jelusalemu keeswa kwiculu kuli Lesa. Yakalinga kubambitwe, anga ngumwanakashi utokweebwa uyo walibambila kuya kuli ibaye.

Isaya 49:18

Amulangelange kumbasu shoonse kwaamba ayi mubone citoocitika. Bene mishaanu babungana kwaamba ayi bapiluke.” Mwaami Lesa waamba ayi, “Bweenka mbocibete lushinisho ayi ndi muumi, mulaakusangalala pabantu abo bweenka nabwiinga mbwaasangalala pashakulibotesha nshaafwala.

Isaya 52:1

Amubuke, Amubuke! Amubuke nobamundabala inene ya Siyoni! Amube ankusu mbuli kataanshi. Amufwale shakufwala shanu sha bulemu, nobamundabala ya Jelusalemu, ndabala inene isalalite. Balya bakunsengwe batapalwitwe teshi bakenjilewo tubili mundabala yanu.

Bene Galatiya 3:27

Paceebo ceeco, mwebo nomwakabombekwa akucatana pantu pomwi aKlistu, muli anga mulifwete buumi bwakwe Klistu.

Luka 15:22

Sombi baishi bakaambila basebenshi babo ayi, ‘Amufwambaane! Amulete cakufwala cibotu afwale. Mumufwalike ninga kumunwe ansapato.

Isaya 61:3

Wakantuma kucafwa baabo balila muSiyoni, kubafwalika ngala yakukondwa kuteshi milota ya buumba. Kubapa mafuta atondesha kusangalala kuteshi mapensho aleta minsonshi. Kubalengesha kwiimba nyimbo shakulumbaisha kuteshi buumba. Balaakunokwiitwa ayi mibanga yabululami iyo Mwaami Lesa njaakashanga kwaamba ayi atondeshe bulemu bwakwe.

Isaya 51:11

Ncakwiila abo mbomwakafuna balaakuboola. Balaakushika kuSiyoni kabeemba. Lyalo balaakunokweenda kabasangalete kwalyoonse alyoonse. Ndushinisho kusangalala teshi kukamaneewo alimwi buumba bwabo amatongooshi shilaakumana.

2 Makani 6:41

“NoBaami baLesa, ono amunyamuke mwise kuŊanda yanu akwikalaamo kwalyoonse alyoonse pantu pomwi aLibokoshi lyanu lya Cipangano citondesho ca nkusu shanu. NoBaami baLesa, bapailishi banu ababe ankusu shakutanjilila bantu kulupulusho ayi bantu banu basangalale mububotu bwanu.

1 Pita 1:8

Ono nabi tamukwe kumubonawo kale, mulimusuni. Mulamushoma nakubi kwaamba ayi tamumubooni. Aboobo mulasekelela abuumbi cakubula amaswi eenga asansulula kusangalala uko,

Bene Loma 13:14

Tatweelete kubika maano musheesho shiyanda mubili, sombi Jesu Klistu abe nsheshakulwanisha shesu.

Bene Loma 3:22

Nshila Lesa njaalulamikilamo bantu, nkushoma muli Jesu Klistu. Ulacita boobo kubantu boonse mukwiinga taaku bupusano buli pabaJuda abaswamashi bakunsengwe

Abakuku 3:18

ndaakusekelela muMwaami Lesa, ndushinisho ndaakusangalala muli Lesa, Mupulushi wangu.

1 Samwelo 2:1

Mpeeke Aana wakapaila ayi, “Mwaami Lesa wansangalasha abuumbi, Ndikondetwe abuumbi ceebo ca ceeco ncaacita! Balwani bangu ntoobaseka. Ndisangalete abuumbi ceebo Lesa wancafwa!

Isaya 25:9

Ici caakucitika, muntu woonse ulaakwaamba ayi, “Ncakwiila nguLesa wesu! Twakacinka manungo muli nguwe, ono anaapa watupulusha. Ncakwiila nguMwaami Lesa! Twakacinka manungo muli nguwe, ono anaapa tulikondetwe alimwi tulisangalete ceebo watupulusha.”

Bene Filipi 4:4

Amusangalale muMwaami lyoonse alimwi ndaamba ayi, amusangalale!

Isaya 35:10

Abo Mwaami Lesa mbwaakalubula balaakuboolela akushika kuSiyoni kabeemba cakusangalala. Anu uko nkweshi bakanookala cakusangalala kwalyoonse alyoonse. Ee, balaakuba bantu bakondetwe alimwi basangalete kwalyoonsebo. Buumba alimwi amatongooshi shoonse shilaakumana.

Ciyubululo 21:9

Umwi munjelo pabaabo bali bosanwe abobilo bakalinga kucite mbale shifongomene shili shosanwe ashobilo, isho shakalinga kuswite myaalu yamamanino ili yosanwe ayobilo, wakesa mukundwiita ayi, “Kosa nkuboneshe mwanakashi uyo weshi akeebwe kuMwanaambelele.”

Kulumbaisha 28:7

Mwaami Lesa ngoompa nkusu akumfuna, ndushinisho ndicinkite manungo muli nguwe. Aboobo ulancafwa alimwi ndamulumbaisha cakukondwa, alimwi ndamulumba kwiinda mulwiimbo lwangu.

Sekaliya 10:7

Bene Isilaeli balaakuba ankusu anga mbashilumamba. Balaakukondwabo anga ngumuntu walinga kunwa waini. Bamulunyungu balaakwiibaluka kukoma uko akusangalala ceebo ca sheesho Mwaami Lesa nshaakacita.

Jelemiya 2:32

Sa mooye inga waluba shakulibotesha shakwe? Sa nabwiinga inga walubako lilaaya lyakwe lya pabwiinga? Sombi nebo bantu bangu bakanduba kwa ciindi cilaamfu, ee, kwanshiku shitakoonshi kubelengekwa.

Neyemiya 8:10

Lyalo Neyemiya wakabaambila ayi, “Kamuya mukalye shakulya shibotu, akunwa shakunwa shamise. Mutumineko shimwi kuli babo batacite shibambitwe kale. Bushiku bwasunu mbushiku busalalite kuMwaami Lesa. Mutoongumani ceebo kusangalala uko kumupa Mwaami Lesa, nkokumupa nkusu.”

Matalikilo 24:53

Kuswawaawo wakakusha makosa ashimwi sha mushobo uyo sha golodi asha silifa, alimwi ashisani ashakufwala sha mushobo amushobo akupa Labeka. Nandumi shakwe abanyina wakabapa aabalo shipo shamakwebo.

Ciyubululo 4:4

Cuuna ca bwaami ico cakalinga kushingulukitwe ashuuna shimwi sha bwaami shili makumi obilo ashone apo pakalinga kushiite bamaloba bali makumi obilo abone. Bakalinga kufwete shisani shituba alimwi amishini ya golodi kumitwi.

Jobo 29:14

Ndakalinga kucita shintu shiluleme ciindi coonse. Ndushinisho milimo yangu yoonse yakalinga ibotu.

Kulumbaisha 35:9

Lyalo ndaakusangalala ceebo ca Mwaami Lesa, kusangalala mukwiinga mwampulusha.

Lwiimbo lwakwe Solomoni 1:10

Macili ako alabota na wafwala masikiyo, ayalo nshiingo yako na wafwaala bulungu bwa mabwe amakwebo.

Isaya 12:1

Pabushiku ubo mulaakwiimba ayi, “Ndanoomulumbaisha noBaami baLesa. Nabi mwakalinga kukalalite pali ndime, bukali bwanu sunu bwamana. Ono sunu mwankalika moyo.

Isaya 12:2

Ncakwiila noBaami baLesa ndimwe bapulushi bangu. Nanooncinkite manungo muli ndimwe, lyalo teshi nkaloondeewo. NoBaami baLesa ndimwe mumpa nkusu abulemu, alimwi ndimwe lwiimbo lwangu. Ee, noBaami baLesa mwaba bapulushi bangu.”

Isaya 17:10

Nobene Isilaeli, ncakwiila mwaluba Lesa wanu uyo wakamufuna ee, mwaluba Mwaandami wanu umutabilila. Mulashanga amyuunda isalalite ayi munoolambililamo balesa banu. Paceebo ceeco nabi mukashange shishango shibotu buyani, ee, nabi mukashange minyansa yakuula kuswa kucishi cimwi,

Isaya 25:1

NoBaami baLesa, ndimwe baLesa bangu. Ndanoosumpula akulumbaisha liina lyanu. Mwakacita shintu shikankamika abuumbi kwiinda mukushomeka kwanu kutacite kampenda, ee, shintu isho nshemwakabambabo kale kale.

Isaya 41:16

Lusuko ulo mulaakulutukwita mwiculu mumuuwo awalo muuwo ulaakulutola. Ncakwiila cipuupu cinene cilaakulupalanganya. Aboobo mwebo mulaakusangalala muli ndime neMwaami Lesa ee, mulaakunumbaisha nebo neUsalalite wa bene Isilaeli.

Isaya 48:18

“Nebakanyumfwila akukonkela milawo yangu, naakwiinga luumuno lulakunkabo anga ngamaanshi mukalonga. Ncakwiila bululami nibwalinga kusefooka anga ngamaaba a mulweenge mbwaacita muloombe.

Isaya 49:4

Mpomunyaawo ndakaamba ayi, “Anu ndakalinga kulipenshabo kusebensa. Ee, ndakalinga kumanabo nkusu kwakubula mpindu. Sombi shintu shoonse sheelete ndime shili mumaansa a Mwaami Lesa. Ncakwiila cilambu cangu cilaswabo kuli Lesa wangu.

Isaya 51:3

“Ndaakunyumfwila nkumbu ndabala ya Jelusalemu abaabo boonse bekala mumatongo a njiyo. Nakubi kwaamba ayi cishi ca njiyo nduyanga, ndaakucilengesha kuba anga muEdeni. Ncakwiila cilaakusandulwa kuba anga ngumuunda wa Mwaami Lesa. Bantu uko balaakunoosangalala akukondwa. Balaakunoolumba alimwi balaakunokwiimba.

Isaya 56:7

Mwaami Lesa waamba ayi, “Ndaakumuleta kuSiyoni, pakalundu kangu kasalalite. Lyalo ndaakumulengesha kusangalala muŊanda yangu ya mipailo akutambula milambu yanu njeshi mukanoobenga pacipaililo cangu. Ceebo Ŋanda yangu ilaakunookwiitwa ayi ŋanda ya kupaililaamo ya mishobo yoonse.”

Isaya 58:14

ingayi mulaakucana kusangalala muli ndime neMwaami Lesa. Ndaakumulengesha kweendelesha cishi coonse. Mulaakulya bubotu bwa cishi ico ncendakapa bamulunyungu lwakwe Jakobo. Nebo neMwaami Lesa ndaamba.”

Isaya 65:18

Amukondwe akusangalala kwalyoonse alyoonse pasheesho nsheshi nkaleenge, mukwiinga Jelusalemu ngweshi nkaleenge mulaakunoolibo kusangalala. Abalo bantu beshi bakanookalaamo balaakunooli bantu bakondetwe.

Esekelo 42:14

Na bapailishi batooyanda kuswa muŊanda yakwe Lesa ayi baye mulubansa lwa pansengwe, balyeelete kushiya shakufwala shisalalite nshebafwala pakusebensela Mwaami Lesa mushipinda ishi. Balyeelete kufwala shakufwala shimwi pakuya kumusena ubunganinaako bantubo.”

Sekaliya 3:5

Mpomunyaawo munjelo wakaambila baabo bakalinga kwiimfwi akwe ayi, “Amumufwalike cisani cakumutwi citashipite.” Mpeeke bakamufwalika cisani ceenka ico. Bakamufwalika shakufwala shipya shimwi shoonse munjelo wa Mwaami Lesa kaaimfwi apo peenka.