11 Balibo anga mbakabwa beshi milyomibi abo batakutiiwo nabi balya buyani. Mbeembeshi bateshi ankobatooya, boonse batola nshila shabo. Womwi awomwi pakati kabo ulisunibo kulicanina mpindu yakwe mwiine.
Bamatanjilili baloombolosha na bapekwa makulo. Bapailishi baleeishabo kwaamba ayi balipilwe, abalo balaluki balasansulabo nshebayubulwitwa na kwaba kupekwa maali. Nakubi boobo balicinkite manungo muMwaami Lesa akwaamba ayi, “Mwaami Lesa uli pakati kesu. Aboobo mapensho taakoonshi kutushikila.”
Mulanyansha pakati ka bantu bangu kwaamba ayi mucanebo bale ukwanabo mumapaka aniini alimwi abusekele bwa shinkwa Mulacaya bantu abo bateelete kucaikwa akushiya baabo beelete kufwa. Mwebo mulaambila bantu bangu shabubeshi, abalo balamunyumfwila.’
Sombi pansengwe lya ndabala inene iyi mpopali bakabwa abaloshi, bafuule abacayi, abo balambila shibumbwabumbwa alimwi ababeshi mumyaambo amicito.
Ono ceebo mutanjilili wa coonde utokweendelesha mulimo wakwe Lesa, ulyeelete kubula kampenda. Taaelete kuba muntu ulyuuma mucaamba, ufwambaana kukalala, cakolwa, mukali nabi usunishi buboni.
Ino nceebonshi ncemutoobulila kunyumfwa nshentokwaamba? Sa te nceebo cakwaamba ayi tamusuni kunyumfwa maswi angu?
Ndakalinga ndabakalalila ceebo ca shibiibi shabo alimwi abulyabi. Ndakabapa mulandu akubafutatila ceebo ndakakalala. Nakubi boobo bakatolelela anshila shabo shibiibi.
Amubone ŋombe ilishi mwineyo ayalo mbongolo ilishi wiisanina. Sombi bantu bangu bene Isilaeli tabenshiiwo, ncakwiila bantu bangu tabanyumfwi.”
Bantu mbomunya aba mbeshi kutongooka lyoonse akubekesha bamwi shilubo, balakonkela shiyanda mibili yabo shibiibi. Balaamba cakulisumpula alimwi akubotesha baabo bacite buboni ayi babapeewo.
Mapensho kuli mbabo! Bakonkela nshila yakwe Kaini. Bweenka bwakacita Balamu, abalo balawita mushibiibi ceebo ca kusuna bunene maali. Balakaka kunyumfwila Lesa bweenka bwakacita Kola, aboobo balaakunyonyoolwa abalo.
Ceebo cakusuna bubile, balaakusebensesha makani akubeca. Mulandu wabo utoobalindilila kuswabo kale kale alimwi kunyonyoolwa kwabo kulibambitwe kale.
Amweembele litanga lyakwe Lesa ilyo ndyaakamupa kuteshi cakukakatishikwa, sombi cakukondwa kweelana akuyanda kwakwe Lesa. Mutasebensi mulimo wanu ceebo cakulangoolabo maali, sombi musebense amoyo woonse cakulibenga.
Aba balyeelete kukashikwa mukwiinga batoonyonyonganya bamumaanda boonse mbobapolela kwiinda mukwiisha shintu isho nshebateelete. Balacita boobo kwaamba ayi babilile mpawo.
Bacafwi ba coonde abalo balyeelete kuba amibo ibotu, bashomeka, bateendilishi kunwa shikola alimwi batayandooli maali munshila sha bucenjeshi.
Taaelete kuba cakolwa, nabi mukali, sombi mubombu, shiluumuno, utasunishi maali.
Kumeelelesho balaakunyonyoolwa mukwiinga lesa wabo nshintu shisangalasha mubili. Aboobo balo balasangalalila mushintu isho sheelete kubapa nsoni alimwi balayeeyabo shintu sha pacishi ca panshi.
Bantu abo tabashomi ceebo Satana uyo uli anga ngulesa pacishi ca panshi, wabika maano abo mumunshinshe. Ulabakasha kubona mumuni utoomunika pali mbabo, uyo mumuni uswa muMakani Abotu aamba shabulemu bwakwe Klistu. Klistu ngootondesha Lesa mbwaabete.
Nshina kuyandawo kale kubwesa maali nabi cakufwala ca muntu umwi kwiinda mulunkumbwa.
Ndishi kwaamba ayi na nkasweewo palikoto lyanu, baumpe bakali balaakwisa pakati kanu alimwi teshi bakalekewo bamucoonde aba.
Anu ncibotubo umwi mulikoto lyanu kucala milyango ya kuŊanda yangu, kwaamba ayi mutanookunka mulilo utacite ncito pacipaililo cangu! Nebo nshikondetweewo pali ndimwe, alimwi taaku milambu yanu njeshi nkatambule.
Sombi mwebo meenso anu amyoyo yanu ilibo kumpindu yakucana kwiinda mubwiipi, kutila bulowa bwa bantu batacite mulandu, alimwi amukulyatilila akupensha bantu.”
Uyo woonse usuni maali teshi akacanewo ngweenga waamba ayi afula. Uyo woonse usunishi buboni teshi akacanewo mbweshi akaambe ayi bwafula. Ici acalo taaku mbocibete.
Ono ceebonshi tootoolemeka milambu ashipo bantu bangu nshibeelete kupa ndime? Ino nceebonshi webo Eli ulalemeka bana bako kwiinda ndime mukubaleka ayi baliinishe beene ceebo cakulya shipansha shiindaawo kubota sha milambu yoonse bantu njebabenga kuli ndime?
Alimwi mutanoosalulula pakoombolosha muntu mukandu.
Amucenjele abantu bacita shibiibi abo bali anga mbakabwa, abo bantu bacikakatisha kupalulwa.
Abalo balaluki abapailishi balakolwa waini abuumbi cakutalantanta. Ncakwiila balapuwookapuwookabo uku akooku ceebo ca bwalwa. Ceebo cakukolwa, balaluki balaalilwa kunyumfwisha shili anga nshiloto isho Lesa nshaabatumina. Pamilandu ileta bantu kuli mbabo balaalilwa kupa bupingushi ceebo cabucakolwa.
Kuswabo kubantu bataaku ambobabete kushika akubaabo balemekwa, boonse balicitebo miyeeyo yabumbilileewo. Balaluki abapailishi abalo ngumushobo womwibo, boonse balacenjeeka bantu.
Paceebo ceeco, bamakaabo ndaakubapa kubasankwa bamwi, ayalo myuunda yabo kubantu bamwi. Kutalikilabo kumuntubo kushika kubalemekwa, boonse beenka basuni kubilila mubwiipi. Balaluki abapailishi boonse abalo mbeshikubeca.
Mwebo mulabilila pakubisha kwa bantu bangu. Paceebo ceeco mulisuni ayi kababisha lyoonse.
Aboobo bamatanjilili ba bene Moabu alimwi abene Midyani bakatolelela ashakulipila pamashingo akuya kuli Balaamu akumulwiita makani akaswa kuli Balaki.
Ndyaakanyumfwa boobo, mupailishi uyo wakasangalala abuumbi. Mpeeke wabwesa cibumbwabumbwa cakubesa cakananikwa silifa, shibumbwabumbwa shimwi alimwi aefodi akuyaabo.
