3 Muntu utokoolobesha ayi, “Muluyanga amubambeemo nshila ya Mwaami Lesa! Ee, amululikile mukwakwa Lesa wesu muluyanga.
Mpomunyaawo Mwaami Lesa Shinkusu shoonse ulakumbula ayi, “Amubone ndaakutuma muntu wangu kunembo lyangu eshi akamambile nshila. Lyalo Mwaami ngomutooyandoola ulaakwisa muŊanda yakwe cakupulumukabo. Ncakwiila uyo ngomuntu wangu ngomutoolindilila eshi akese mukwaambilisha Cipangano cangu.”
Lyalo Joni wakakumbula kwiinda mumaswi akaamba Isaya mulaluki mukulukulu ayi, “Ndime muntu umwi utokoolobesha muluyanga ayi, ‘Amululamike nshila ya Mwaami!’ ”
Mwaami Lesa waamba ayi, “Amubaleeke bantu baboolele. Amukushe cili coonse ceenga cashinkila bantu bangu munshila yabo.”
Amubone, ntoocita cintu cipya! Cintu ico citoocitika kale alimwi mulicibwene. Ntoopanga nshila muluyanga alimwi ntoobikaamo atulonga.
Lyalo kulaakuba mukwakwa. Mukwakwa uyo ulaakutumbwa ayi, “Mukwakwa wa Basalalite.” Bamucita shibi teshi bakeendeemo umo, sobwe. Ulaakuba wa baabo beelete kweendaamo beenka. Nabibo mashilu a bantu teshi akeendeemo umo.
“Tulundu toonse ndaakutumwayoola kwaamba ayi pakabe pakwiinda bantu bangu. Ncakwiila ndaakubabambila mikwakwa inene ayi beendeemo.
Amwiimbile Lesa, mwiimbe nyimbo shakulumbaisha liina lyakwe. Amwiimbishe kulumbaisha wooyo weendela pamakumbi, liina lyakwe nguMwaami Lesa, amusangalale pameenso akwe!
Misena yoonse ikuneme ilaakutuntuka. Tulundu toonse tulaakweelanishikwa ashuulu shoonse shilaakumwayoolwa cakucaalabo anga muliwesa. Misena ya mankununkunu ilaakweelana.
