Isaya 2:3 - Baibo Busansulushi Bwa Libuku Ili

³ Bantu baanji balaakwisa akwaamba ayi, “Kamwisa tunooya kukalundu ka Mwaami Lesa. Lesa ulaakutwiisha nshaasuni ayi tucite kwaamba ayi tunookweenda kweelana ambwaasuni. Mukwiinga milawo yakwe ilaakuswita kuSiyoni ncakwiila maswi akwe alaakunooswa kuJelusalemu.”

Isaya 2:3 교차 참조

Luka 24:47

Cililembetwe alimwi ayi muliina lyakwe Makani Abotu ashimikilwe kubantu ba mishobo yoonse, kutalikila kuJelusalemu kwaamba ayi basanduke kuswa kushibiibi shabo, Lesa ndyeshi abalekelele.

Kulumbaisha 110:2

Mwaami Lesa ulaakukomenesha bwaami bwako bwa nkusu kuswa kuSiyoni. Ndushinisho ulaakulela pakati pabalwani bako.

Joni 7:17

Aboobo uyo woonse usuni kucita buyanda Lesa, ulaakwishiba na kwiisha kwangu uku kulaswa kuli Lesa nabi kuli ndime nemwiine.

Dutolonomi 6:1

“Iyi njemilawo amilasho iyo Mwaami Lesa, Lesa wanu njaakandwiita ayi mwiishe. Mukanooikonkela mucishi ico ncemuli pafwaafwi kwinjila akubwesa.

Jelemiya 31:6

Bushiku bulaakushikila beshikulindilila ndyeshi bakaliile patulundu twa kuEfuleemu ayi, ‘Kamwisa tuye kuSiyoni, ee, tuye kuMwaami Lesa, Lesa wesu.’ ”

Bene Loma 10:18

Ono sa bene Isilaeli tabakwe kwaanyumfwa Makani aya? Ncakwiila bakaanyumfwa bweenka bwaamba Malembo akwe Lesa ayi, “Maswi abeshikushimikila akanyumfwika mucishi coonse, makani abo akashika akweela cishi.”

Luka 11:28

Sombi Jesu wakakumbula ayi, “Ee, sombi bacite coolwe cinene mbaabo banyumfwa maswi akwe Lesa akucita mbwaamba!”

Mateyo 7:24

“Aboobo uyo woonse unyumfwa maswi angu aya akwaacita, uli anga ngumuntu ucite maano wakayakila ŋanda yakwe palibwe.

Jemusi 1:25

Milawo yakwe Lesa ililuleme alimwi ilapa lwaanguluko. Uyo woonse wiilangilisha cakuyanda kwiiya akutolelela kucita bweenka ubo alimwi cakutaluba sheesho nshaanyumfwa, sombi kushikonkela, Lesa ulaakumupa coolwe mushintu shoonse nshaacita.

Milimo ya Batumwi 10:33

Mpomunyaawo ndakatuma bantu kuli ndiwe alimwi wacita kabotu kwisa. Ono soonse bulya tuli pameenso akwe Lesa kwaamba ayi utulwiite makani oonse ayo ngaakubambila Mwaami Lesa.”

Milimo ya Batumwi 1:8

Sombi mulaakutambula nkusu na Mushimu Usalashi ukese pali ndimwe. Lyalo mulaakuba bakamboni bangu muJelusalemu, muJudeya moonse alimwi amuSamaliya kushikila amucishi coonse ca panshi.”

Joni 4:22

Mwebo nobene Samaliya mulalambila ncemuteshi, sombi swebo tulalambila ncetwishi mukwiinga lupulusho lulaswa kubaJuda.

Dutolonomi 33:19

Balaakutamba baswamashi ayi bakese kukalundu kabo akubenga milambu yeelete nkomunya uko. Buboni bwabo bulaswa mumakwebo a mulweenge, alimwi amumuseese wa muloombe lwa lweenge.”

Kulumbaisha 48:1

Mwaami Lesa ulicite nkusu shikankamika! Ulyeelete kulumbaishikwa abuumbi mundabala inene yakwe Lesa, Lesa wesu, ncakwiila pakalundu kakwe kasalalite.

Kulumbaisha 119:171

Mulomo wangu aumulumbaishe ceebo mwebo mulanjiisha milasho yanu.

Kulumbaisha 122:1

Ndakasangalala ndibakaŋambila ayi, “Katiya kuŊanda ya Mwaami Lesa.”

Isaya 28:9

Balo balaamba ayi, “Ino ono ngani ngwaatokwiisha? Ngani ngwaatoosansulwita maswi aya? Makani aya nga baabo baleshekwa onoono, ncakwiila abo bakushikwabo kunkolo bulya.

Isaya 56:5

balaakunookwiibalukwa kwaciindi cilaamfu muŊanda yangu apakati ka bantu bangu kwiinda mbobalinga kweelete kwiibalukwa na kabacite baana. Ndaakubapa liina litakoonshi kulobeshekwa.”

Isaya 56:7

Mwaami Lesa waamba ayi, “Ndaakumuleta kuSiyoni, pakalundu kangu kasalalite. Lyalo ndaakumulengesha kusangalala muŊanda yangu ya mipailo akutambula milambu yanu njeshi mukanoobenga pacipaililo cangu. Ceebo Ŋanda yangu ilaakunookwiitwa ayi ŋanda ya kupaililaamo ya mishobo yoonse.”

Isaya 60:3

Mishobo iinji ilaakukwelwa kwisa kumumuni wako, bamaami balaakwisa kucitubilishi ca kuca kwa bushiku bwako bupya.

Isaya 65:11

“Sombi mwebo nomufutatila ndime neMwaami Lesa akusuula kalundu kangu kasalalite, ee, mwebo nomulambila Gadi aMeni balesa baleta coolwe amalwesa,

Isaya 66:20

“Balaakuleta bene mishaanu boonse bali mushishi shoonse kukalundu kangu kasalalite muJelusalemu ayi ncipo kuli ndime neMwaami Lesa. Balaakwisa kabatantite pamaaki, shifubwa shili anga nimbongolo, ngamela, mushikoci alimwi amumaŋoola. Bweenka bene Isilaeli mbobaleta shipo sha shili anga ngamaila kuŊanda yangu mushakunyamwitaamo shisalalite kweelana aMilawo, mbweeke ubo abalo mbweshi bakaletwe.

Jelemiya 26:18

“Mika wa kuMolesheshi wakalinga kulaluka munshiku shakwe Esekiya mwaami wa bene Juda. Wakaambila bene Juda boonse ayi Mwaami Lesa Shinkusu shoonse waamba ayi, ‘Siyoni ulaakushabwa anga ngumuunda, Jelusalemu ulaakuba matongo. Kalundu ka Ŋanda yakwe Lesa kalaakuba musaansa.’

Esekelo 40:2

Mucili anga nciloto Lesa wakantola kucishi ca Isilaeli akunjimika peculu lya kalundu kalaamfu ako kakalinga kucite maanda aanji kulubasu lwa kumalenge ayo akalinga kuboneka anga nindabala inene.

Osiya 3:5

Pesule bene Isilaeli balaakusandukila kuli ndime neMwaami Lesa, Lesa wabo akuwamulunyungu lwakwe Defedi ayi abe mwaami wabo. Lyalo balaakutalika kulemeka Mwaami Lesa akutambula shipo shakwe shibotu.

Osiya 6:3

Ncakwiila atwishibe Mwaami Lesa. Atweeleshe cankusu kumwishiba. Ulaakuboneka kuli ndiswe bweenka buswa lisuba macuunsa. Ee, ulaakwisa kuli ndiswe akutupa coolwe bweenka bwisa mfula meensa, ncakwiila bweenka mbuli mfula itontosha inshi.”

Mika 4:2

Bantu baanji balaakwisa akwaamba ayi, “Kamwisa tunooya kukalundu ka Mwaami Lesa. Lesa ulaakutwiisha nshaasuni ayi tucite kwaamba ayi tunookweenda kweelana ambwaasuni. Mukwiinga milawo yakwe ilaakuswita kuSiyoni ncakwiila maswi akwe alaakunooswa kuJelusalemu.”

Esita 9:27

baJuda bakalipangila mulawo wakwaamba ayi balo, bamulunyungu lwabo alimwi abaabo boonse bakasandukila kukupaila kwabo kabasekelela lyoonse panshiku shobilo isho kweelana amilasho yakwe Modekayi.

Kulumbaisha 102:23

Mwaami Lesa wakantyoloola mushiso kaancilibo mwanike, wakafwiimpya nshiku sha buumi bwangu.

Isaya 1:26

Ndaakukupa boomboloshi alimwi bweenka mbuli kukataanshi, alimwi ndaakukupa beshikupanda maano bweenka mbuli kukale kale. Kuswawaawo ulaakwiitwa ayi Ndabala ya Bululami, ee, Ndabala Ishomeka.”

Isaya 11:10

Bushiku bulaakushika mwaami uyo wamulunyungu lwakwe Jese ndyeshi akeemikanine bantu anga nimbembela yakukoma. Mishobo ya bantu ilaakumuyobolokela alimwi musena ngweshi akekaleewo ulaakunoocite bulemu.

Isaya 19:23

Ciindi ico caakushikila kulaakuba mukwakwa unene kuswa muIjipiti kuya kuAsilya. Bene Asilya balaakunooya kuIjipiti abalo bene Ijipiti balaakunooya kuAsilya. Bene Ijipiti abene Asilya balaakulambilila pantu pomwi.

Isaya 44:5

“Umwi ulaakwaamba ayi, ‘Ndi wa Mwaami Lesa.’ Umwi ulaakuliita ayi wamulunyungu lwakwe Jakobo. Umwi alakwe ulaakulilemba pamukono ayi, ‘Ndi wa Mwaami Lesa’ alimwi ulaakunooliita ayi wamulunyungu lwa bene Isilaeli.”

Jelemiya 12:16

Na bakeshibe kabotu nshila sha bantu bangu akushomesha cakulumbila muliina lyangu ayi, ‘Bweenka mbocibete lushinisho ayi Mwaami Lesa ngumuumi,’ ee, bweenka mbobakalinga beeisha bantu bangu kushomesha cakulumbila muliina lyakwe Baali, ingayi balaakwikala pantu pomwi abantu bangu.