ಮಾರ್ಕ 5 - ದೆವಾಚಿ ಖರಿ ಖಬರ್

ಜೆಜು ಗಿರೊ ಹೊತ್ತ್ಯಾ ಮಾನ್ಸಾಕ್ ಬರೆ ಕರ್‍ತಾ

¹ ಜೆಜು, ಅನಿ ತೆಚಿ ಶಿಸಾ, ಗಾಲಿಲಿಯಾ ಸಮುಂದರಾಚ್ಯಾ ತಿಕುಲ್ಯಾ ದಂಡೆಕ್, ಗೆರಸೆನಾಂಚ್ಯಾ ಪ್ರಾಂತ್ಯಾಕ್ ಯೆವ್ನ್ ಪಾವ್ಲ್ಯಾನಿ.

² ಜೆಜು, ಢೊನಿತ್ನಾ ಉತ್ರುನ್ ಯೆಲ್ಲ್ಯಾ ತನ್ನಾ, ಎಕ್ ಮಾನುಸ್ ಮಸಂಕಿತ್ನಾ ಭಾಯ್ರ್ ಯೆಲೊ, ಅನಿ ಜೆಜುಕ್ ಭೆಟ್ಲೊ. ತ್ಯಾ ಮಾನ್ಸಾಚ್ಯಾ ಆಂಗಾತ್ ಗಿರೊ ಹೊತ್ತೊ.

³ ತೊ, ತ್ಯಾ ಮಸಂಕಿತುಚ್ ರ್‍ಹಾಯ್, ತೆಕಾ ಸರ್‍ಪೊಳ್ಯಾನಿ ಭಾಂದುನ್ ಘಾಲುಕ್ ಕೊನಾಚ್ಯಾನ್‍ಬಿ ಹೊಯ್ನಶಿ.

⁴ ಲೈಂದಾ ಸರ್‍ಪೊಳ್ಯಾನಿ, ತೆಚೆ ಹಾತ್-ಪಾಯ್ ಭಾಂದ್ಲ್ಯಾನಿ, ಖರೆ, ತೊ, ಸಗ್ಳೆಂದಾ ಸರ್ಪೊಳ್ಯಾ ತೊಡಿ, ಅನಿ ಪಾಂಯಾಕ್ನಿ ಘಾಟಲ್ಲ್ಯಾ ಬೆಡಿಯ್ಯಾ, ತೊಡುನ್ ಟಾಕಿ, ತೆಕಾ ಲೈ ಬಳ್ ಹೊತ್ತೊ. ತಸೆ ಮನುನ್, ತೆಕಾ ಸಂಬಾಳುಕ್ ಕೊನಾಕ್ಬಿ ಹೊಯ್ನಶಿ.

⁵ ತೊ ಮಾನುಸ್, ರಾತ್ -ದಿಸ್ ಸಮಾದ್ಯಾತ್ನಿ ಅನಿ ಮಡ್ಡ್ಯಾಂಚ್ಯಾ ವೈನಿ ಎಕ್‍ ನಮುನಿ ವದ್ರುನ್ಗೆತ್ ಫಿರಿ, ಅನಿ ಅಪ್ನಾಕುಚ್, ಗುಂಡ್ಯಾನಿ ಮಾರುನ್ ಘೆವ್ನ್, ದುಕ್ಕಾ ಕರುನ್ ಘೆಯ್.

⁶ ತೆನಿ, ಧುರ್‍ನಾಚ್ ಜೆಜುಕ್ ಬಗಟ್ಲ್ಯಾನ್, ಅನಿ ಪಳುನ್ ಯೆವ್ನ್, ಜೆಜುಚ್ಯಾ ಇದ್ರಾಕ್ ಡೊಗ್ಲಾ ಘಾಟ್ಲ್ಯಾನ್, ಅನಿ

⁷ “ಜೆಜು ಪರಮೊನ್ನತ್ ದೆವಾಚ್ಯಾ ಲೆಕಾ! ತಿಯಾ ಮಾಜ್ಯಾ ಖಬ್ರೆಕ್ ಕಶ್ಯಾಕ್ ಯೆಲೆ? ತಿಯಾ, ಮಾಕಾ ಶಿಕ್ಷಾ ದಿವ್‍ನಕೊ, ಮನುನ್ ದೆವಾಚ್ಯಾ ನಾಂವಾನ್, ಮಿಯಾ ತುಜ್ಯಾಕ್ಡೆ ಮಾಗ್ತಾ!” ಮನುನ್ ಬೊಬ್ ಮಾರುಕ್‍ಲಾಲೊ.

⁸ ಕಶ್ಯಾಕ್ ಮಟ್ಲ್ಯಾರ್ “ಗಿರೊ! ಹ್ಯಾ ಮಾನ್ಸಾತ್ನಾ ಭಾಯ್ರ್ ಪಡ್” ಮನುನ್, ಜೆಜುನ್ ತೆಕಾ ಮಟ್ಲ್ಯಾನ್, ತಸೆ ಮನುನ್, ತೆನಿ ಅಶೆ ಮಟ್ಲ್ಯಾನ್.

⁹ ತೆಚೆಸಾಟ್ನಿ ಜೆಜುನ್ ತೆಕಾ “ತುಜೆ ನಾವ್ ಕಾಯ್?” ಮನುನ್ ಇಚಾರ್‍ಲ್ಯಾನ್. ತ್ಯಾ ಮಾನ್ಸಾನ್ “ಮಾಜೆ ನಾವ್ ಗಿರ್‍ಯಾಂಚೊ ತಾಂಡೊ” “ಅಮಿ ಲೈಜಾನಾ ಹಾಂವ್” ಮನುನ್ ಜಬಾಬ್ ದಿಲ್ಲ್ಯಾನ್.

¹⁰ ಅನಿ ತೊ, ಗಿರ್‍ಯಾಕ್ನಿ ತ್ಯಾ ಪ್ರಾಂತ್ಯಾತ್ನಾ ಭಾಯ್ರ್ ಘಾಲುನಕೊ ಮನುನ್ ಜೆಜುಕ್ಡೆ ಮಾಗುಲಾಗಲ್ಲೊ.

¹¹ ಥೈ ಜಗ್ಗೊಳುಚ್ ಹೊತ್ತ್ಯಾ, ಮಡ್ಡಿ ವರ್‍ತಿ ಡುಕ್ರಾಂಚೊ ಎಕ್ ಮೊಟೊ ತಾಂಡೊ ಚರುಕ್ ಲಾಗಲ್ಲೊ,

¹² ತ್ಯಾ ಗಿರ್‍ಯಾನಿ “ಅಮ್ಕಾ ತ್ಯಾ ಡುಕ್ರಾಂಚ್ಯಾ ಆಂಗಾತ್ನಿ ಜಾವ್ಕ್ ಸೊಡ್, ಅನಿ ಅಮಿ ತೆಂಚ್ಯಾ ಭುತ್ತುರ್ ಗುಸ್ತಾಂವ್ ” ಮನುನ್ ಜೆಜುಕ್ಡೆ ಮಾಗ್ಲ್ಯಾನಿ.

¹³ ತೆನಿ ತೆಂಕಾ, ಜಾವ್ಕ್ ಸೊಡ್ಲ್ಯಾನ್, ತಿ ಗಿರೊ, ತ್ಯಾ ಮಾನ್ಸಾಕ್ ಸೊಡುನ್, ಡುಕ್ರಾಂಚ್ಯಾ ಆಂಗಾತ್ನಿ ಜಾವ್ನ್ ಗುಸ್ಲಿ, ಅನಿ ಸುಮಾರ್ ದೊನ್ ಹಜಾರ್ ಡುಕ್ರಾಂಚೊ, ಸಗ್ಳೊ ತಾಂಡೊ ಸಮುಂದರಾತ್ ಹುಡಿ ಮಾರುನ್ ಬುಡುನ್ ಗೆಲೊ.

¹⁴ ಡುಕ್ರಾ ಚಾರ್‍ವುತಲ್ಯಾನಿ, ಪಳುನ್ ಜಾವ್ನ್ ಶಾರಾತ್, ಅನಿ ಶೆತಾತ್ನಿ, ಹಿ ಖಬರ್ ಫರ್ಗಟ್ಲ್ಯಾನಿ, ತನ್ನಾ ಲೊಕಾ, ಕಾಯ್ ಹೊಲೆ ಮನುನ್ ಬಗುಕ್, ಥೈ ಗೆಲಿ.

¹⁵ ತೆನಿ, ಜೆಜುಕ್ಡೆ ಯೆಲ್ಲ್ಯಾ ತನ್ನಾ, ತ್ಯಾ ಗಿರ್‍ಯಾಂಚೊ ತಾಂಡೊ ಲಾಗಲ್ಲ್ಯಾ ಮಾನ್ಸಾಕ್ ಬಗಟ್ಲ್ಯಾನಿ, ತೊ ಥೈ ಬಸಲ್ಲೊ, ತೆನಿ ಬರೆ ಕಪ್ಡೆ ನೆಸಲ್ಲ್ಯಾನ್, ತೊ ಬರ್‍ಯಾ ಬುದ್ದಿನಿ ಬಸಲ್ಲೊ; ಅನಿ ತೆನಿ, ಸಗ್ಳೆ ಜಾನಾ ಭಿಂವ್ನ್ ಗೆಲ್ಲೆ.

¹⁶ ಥೈ ಕಾಯ್ ಹೊಲ್ಲೆ ಬಗಟಲ್ಲ್ಯಾನಿ, ತ್ಯಾ ಗಿರೊಲಾಗಲ್ಲ್ಯಾ ಮಾನ್ಸಾಕ್ ಕಾಯ್ ಹೊಲೆ, ಅನಿ ಡುಕ್ರಾಂಚಿ ಖಬರ್ ಕಾಯ್ ಹೊಲಿ, ಮನುನ್ ಲೊಕಾಕ್ನಿ ಸಾಂಗಟ್ಲ್ಯಾನಿ.

¹⁷ ತಸೆ ಮನುನ್, ತ್ಯಾ ಲೊಕಾನಿ, ಜೆಜುಕ್ ತೆಂಚೆ ಪ್ರಾಂತ್ಯ್ ಸೊಡುನ್ ಜಾವ್ಚೆ ಮನುನ್, ಮಾಗುನ್ ಘೆಟ್ಲ್ಯಾನಿ.

¹⁸ ಜೆಜು ಢೊನಿತ್ ಚಡ್ತಾನಾ, ಗಿರೆ ಸುಟುನ್ ಬರೊ ಹೊಲ್ಲೊ ಮಾನುಸ್, ಜೆಜುಕ್ “ಮಿಯಾ ತುಜ್ಯಾ ವಾಂಗ್ಡಾ ಯೆತಾ” ಮನುನ್ ಮಾಗುಲಾಲೊ.

¹⁹ ಖರೆ, ಜೆಜು ಕಬುಲ್ ಹೊವ್ಕ್ ನಾ, ತೆಕಾ “ತಿಯಾ ತುಜ್ಯಾ ಘರಾಕ್ ಜಾ, ತುಜ್ಯಾ ಘರ್‍ಚ್ಯಾ ಲೊಕಾಕ್ನಿ, ದೆವಾನ್ ಅಪ್ನಾಚ್ಯಾ ಮೊಟ್ಯಾ ದಯೆನ್, ತುಕಾ ಕಾಯ್ ಕರ್‍ಲ್ಯಾನ್, ಮನುನ್ ಸಾಂಗ್” ಮನುನ್ ಸಾಂಗಟ್ಲ್ಯಾನ್.

²⁰ ತಸೆ ಮನುನ್, ತೊ ಮಾನುಸ್ ಗೆಲೊ, ಅನಿ ಜೆಜುನ್ ಅಪ್ನಾಕ್ ಕಾಯ್ ಕರ್‍ಲ್ಯಾನ್ ಮನುನ್, ಧಾ ಶಾರಾತ್ನಿ ಸಾಂಗುನ್ಗೆತ್ ಗೆಲೊ, ಹೆ ಆಯ್ಕಲ್ಲಿ ಲೊಕಾ ಅಜಾಪ್ ಹೊಲಿ.

ಜಾಯಿರಾಚಿ ಲೆಕ್ ಅನಿ ಜೆಜುಚೆ ಕಪ್ಡೆ ಅಪಡಲ್ಲಿ ಬಾಯ್ಕೊಮನುಸ್

²¹ ಜೆಜು, ಅನಿ ಪರ್ತುನ್ ಢೊನಾತ್ನಾ ಸಮುಂದರಾಚ್ಯಾ ತಿಕುಲ್ಯಾ ದಂಡೆಕ್ ಗೆಲೊ, ಥೈ ಸಮುಂದರಾಚ್ಯಾ ದಂಡೆರುಚ್ ಲೊಕಾಂಚೊ ಎಕ್ ಮೊಟೊ ತಾಂಡೊ ಜೆಜುಚ್ಯಾ ಭೊತ್ಯಾನಿ ಗೊಳಾ ಹೊಲೊ.

²² ಎಕ್ಲೊ ಸಿನಾಗೊಗಾಚೊ ಅದಿಕಾರ್‍ಯಾ ಹೊತ್ತೊ, ತೆಚೆ ನಾವ್ ಜಾಯಿರ್ ತೊ ಜೆಜು ಹೊತ್ತ್ಯಾಕ್ಡೆ ಯೆಲೊ, ಅನಿ ಜೆಜುಚ್ಯಾ ಪಾಂಯಾತ್ ಪಡ್ಲೊ.

²³ ಅನಿ “ಮಾಜಿ ಅಪುರ್ಬಾಯೆಚಿ ಲೆಕ್ ಶಿಕ್ ಹಾಯ್, ದಯಾ ಕರುನ್ ತಿಯಾ ಯೆವ್ನ್, ತಿಚ್ಯಾ ವರ್‍ತಿ ಹಾತ್ ಥವ್, ಹೆಚ್ಯಾನಿ, ತಿ ಬರಿ ಹೊತಾ, ಅನಿ ತಿ, ಹುರ್ತಾ” ಮನುನ್ ಲೈ ಮಾಗುಕ್‍ಲಾಲೊ.

²⁴ ಜೆಜು ತೆಚ್ಯಾ ವಾಂಗ್ಡಾ ಗೆಲೊ, ಸುಮಾರ್ ಲೊಕಾ, ತೆಚ್ಯಾ ವಾಂಗ್ಡಾ ಜಾವ್‍ಲಾಗಲ್ಲಿ. ಅನಿ ತೆಚ್ಯಾ ಭೊತ್ಯಾನಿ ಹೊತ್ತಿ.

²⁵ ಥೈ, ಬಾರಾ ವರ್ಸಾಕ್ನಾ, ರಗಾತ್-ಜಾತಲೊ ರೊಗ್ ಹೊತ್ತಿ, ಎಕ್ ಬಾಯ್ಕೊಮನುಸ್ ಹೊತ್ತಿ,

²⁶ ತೆನಿ, ಲೈ ಕಸ್ಟ್ ಸೊಸಲ್ಲಿನ್, ಸಗ್ಳ್ಯಾ ವಗ್ದುಳ್ಯಾನಿಕ್ನಿ, ತಿ ಗೆಲಿ, ಖರೆ, ಕಾಯ್ಬಿ ಪ್ರಯೊಜನ್ ಹೊವಕ್ನಾ. ತಿಚೆಕ್ಡೆ ಹೊತ್ತೆ, ಸಗ್ಳೆ ಪೈಸೆ ತೆನಿ ಸಾರ್ಲಿನ್, ಖರೆ, ತಿಚೊ ರೊಗ್ ಅನಿ ಉಲ್ಲೊ ಜಾಸ್ತಿಚ್ ಹೊಯ್, ಖರೆ, ಕಮಿ ಹೊಯ್ನಶಿ.

²⁷ ತಿಕಾ ಜೆಜುಚ್ಯಾ ವಿಶಯಾತ್ ಖಬರ್ ಗಾವ್ಲಿ, ಅನಿ ತಿ ಮಿಯಾ ತೆಜೆ ಕಪ್ಡೆ ಅಪಡ್ಲ್ಯಾರ್ ಫಿರೆ ಆರಾಮ್ ಹೊತಾ ಮನುನ್ ಚಿಂತುನ್ , ತೆಚ್ಯಾ ಫಾಟ್ನಾ ಹೊತ್ತ್ಯಾ ತಾಂಡ್ಯಾತ್ ಯೆವ್ನ್ ಗುಸ್ಲಿ,

²⁸ ಅನಿ ತೆನಿ, “ಮಿಯಾ ಜೆಜುಚ್ಯಾ ಫಾಳಿಯಾಕ್ನಿ ಹಾತ್‍ಲಾವ್ಲೊ ತರ್, ಮಿಯಾ ಹ್ಯಾ ರೊಗಾತ್ನಾ ಬರಿ ಹೊತಾ” ಮನುನ್ ಯವಜ್ಲಿನ್.

²⁹ ತೆನಿ, ಜೆಜುಚ್ಯಾ ಫಾಳ್‍ಯಾಕ್ನಿ ಹಾತ್‍ಲಾವಲ್ಲ್ಯಾ ತನ್ನಾಚ್, ತಿಚೆ, ರಗಾತ್‍ ಜಾತಲೆ, ಬಂದ್‍ಹೊಲೆ. ತಿಕಾ, ಅಪ್ನಿ ಆರಾಮ್ ಹೊವ್ನ್, ಹ್ಯಾ ಕಸ್ಟಾತ್ನಾ ಭಾಯ್ರ್ ಪಡ್ಲೊ, ಮನುನ್ ಕಳ್ಳೆ.

³⁰ ತನ್ನಾಚ್ ಜೆಜುಕ್ ಅಪ್ನಾತ್ನಾ, ಬಳ್ ಭಾಯ್ರ್ ಗೆಲೊ, ಮನುನ್ ಕಳ್ಳೆ, ತನ್ನಾ, ಫಾಟಿ ಪರ್ತುನ್ ತಾಂಡ್ಯಾಕ್ ಬಗುನ್,“ಮಾಜ್ಯಾ ಫಾಳ್‍ಯಾಕ್ನಿ ಕೊನ್ ಅಪಡ್ಲೆ?” ಮನುನ್ ಇಚಾರ್‍ಲ್ಯಾನ್.

³¹ ತನ್ನಾ ಶಿಸಾನಿ, “ಸಗ್ಳಿ ಲೊಕಾ ತುಜ್ಯಾ ಆಂಗಾರ್ ಯೆವ್ನ್ ಪಡುಲ್ಯಾತ್, ಅನಿ ತುಕಾ ಕೊನ್ ಹಾತ್‍ಲಾವ್ಲ್ಯಾನಿ ಮನುನ್, ಇಚಾರುಲೆ ಅನಿ?” ಮನುನ್ ಸಾಂಗಟ್ಲ್ಯಾನಿ.

³² ಖರೆ, ಜೆಜು ಅನಿಬಿ, ಮಾಕಾ ಕೊನ್ ಹಾತ್‍ಲಾವ್ಲೆ, ಮನುನ್ ಹುಡ್ಕುನ್ಗೆತುಚ್ ಹೊತ್ತೊ.

³³ ಅಪ್ನಾಕ್ ಅರಾಮ್ ಹೊಲ್ಲೆ ತ್ಯಾ ಬಾಯ್ಕೊಮನ್ಸಿಕ್ ಕಳಲ್ಲೆ, ತಸೆ ಮನುನ್ ಭಿಂವುನ್ ಕಾಪುಂಗೆತ್ ತಿ ಬಾಯ್ಕೊಮನುಸ್ ಜೆಜುಕ್ಡೆ ಯೆವ್ನ್ ತೆಚ್ಯಾ ಪಾಂಯಾತ್ ಪಡ್ಲಿ, ಅನಿ ಅಪ್ನಾಕ್ ಖರೆಚ್ ಕಾಯ್-ಕಾಯ್ ಹೊಲೆ ತೆ ಸಗ್ಳೆ ತೆನಿ ಜೆಜುಕ್ ಸಾಂಗ್ಲಿನ್.

³⁴ ತನ್ನಾ ಜೆಜುನ್ “ಬಾಯಿ! ತುಜ್ಯಾ ವಿಶ್ವಾಸಾನ್ ತಿಯಾ ಅರಾಮ್ ಹೊಲೆ, ಸಮಾದಾನಾನ್ ಜಾ ಅನಿ ತುಜೊ ಕಸ್ಟ್ ಸರ್ಲೊ” ಮಟ್ಲ್ಯಾನ್.

³⁵ ಅಶೆ ಜೆಜು ಬೊಲುನ್ಗೆತ್ ರಾತಾನಾ ಜಾಯಿರಾಚ್ಯಾ ಘರಾಕ್ನಾ ಥೊಡ್ಯಾ ಲೊಕಾನಿ ಯೆವ್ನ್ ಜಾಯಿರಾಕ್ “ಅತ್ತಾ ತುಜಿ ಲೆಕ್ ಮರ್ಲಿ ಅನಿ ತಿಯಾ ಗುರುಜಿಕ್ ತರಾಸ್ ಕರುಕ್ ನಕ್ಕೊ” ಮಟ್ಲ್ಯಾನಿ.

³⁶ ಖರೆ ಜೆಜುನ್ ತೆನಿ ಸಾಂಗ್ತಾಲ್ಲ್ಯಾಕ್ ಧ್ಯಾನ್ ದಿವ್ನಸ್ತಾನಾ ತ್ಯಾ ಅದಿಕಾರ್‍ಯಾ “ತಿಯಾ ಕಾಯ್ ಭಿಂವ್‍ನಕೊ, ವಿಶ್ವಾಸಾನ್ ರ್‍ಹಾ” ಮಟ್ಲ್ಯಾನ್.

³⁷ ತನ್ನಾ ಪೆದ್ರು, ಜಾಕೊಬ್ ಅನಿ ತೆಚ್ಯಾ ಭಾವಾ ಜುವಾಂವಾಕ್ ಸೊಡುನ್ ಕೊನಾಕ್ಬಿ ಅಪ್ನಾಚ್ಯಾ ವಾಗ್ಡಾ ಯೆವ್ಕ್ ದಿವ್ಕನಾ.

³⁸ ತೆನಿ ಜಾಯಿರಾಚ್ಯಾ ಘರಾಕ್ ಯೆಲೆ, ಥೈ ಲೊಕಾ ಜೊರಾನಿ ರಡ್ತಲೆ ಅನಿ ಗೊಳಾಡ್ತಲೆ ಜೆಜುನ್ ಬಗಟ್ಲ್ಯಾನ್,

³⁹ ಜೆಜು ತ್ಯಾ ಘರಾತ್ ಭುತ್ತುರ್ ಗೆಲೊ ಅನಿ ತ್ಯಾ ರಡ್ತಲ್ಯಾ ಲೊಕಾಕ್ನಿ “ಅರೆ! ತುಮಿ ಕಶ್ಯಾಕ್ ರಡುಲ್ಯಾಸಿ? ಎವ್ಡಿ ಲೈ ಧಾಂದಲ್ ಕಶ್ಯಾಕ್ ಕರುಕ್ ಲಾಗ್ಲ್ಯಾಶಿ? ತೆ ಚೆಡು ಮರುಕ್ನಾ, ನಿದ್ಲಾ” ಮಟ್ಲ್ಯಾನ್.

⁴⁰ ಜೆಜು ಅಶೆ ಸಾಂಗ್ತಲೆ ಆಯ್ಕುನ್; ಲೊಕಾ ಜೆಜುಕ್ ಬಗುನ್ ಹಾಸುಕ್ ಲಾಗ್ಲಿ. ಜೆಜುನ್ ಥೈ ಹೊತ್ತ್ಯಾ ಸಗ್ಳ್ಯಾ ಲೊಕಾಕ್ನಿ ಭಾಯ್ರ್ ಧಾಡ್ಲ್ಲ್ಯಾನ್ ಅನಿ ತ್ಯಾ ಚೆಡ್ವಾಚ್ಯಾ ಬಾಯ್-ಬಾಬಾಕ್ ಅನಿ ಅಪ್ಲ್ಯಾ ಶಿಸಾಕ್ನಿ ಘೆವ್ನ್, ತ್ಯಾ ಚೆಡ್ವಾಕ್ ನಿಜ್ವಲ್ಲ್ಯಾ ಖೊಲಿತ್ ಗೆಲೊ.

⁴¹ ಥೈ ಜೆಜು ಫಿಡೆ ಗೆಲೊ ಅನಿ ತ್ಯಾ ಚೆಡ್ವಾಚೊ ಹಾತ್ ಧರುನ್ “ತಾಲಿಥಾಕುಮ್” ಮಟ್ಲ್ಯಾನ್ ತಸೆ ಮಟ್ಲ್ಯಾರ್ “ಚೆಡ್ವಾ ಮಿಯಾ ತುಕಾ ಉಟ್ ಮನುಲಾ”.

⁴² ತನ್ನಾ ತೆ ಚೆಡು ಉಟ್ಲೆ ಅನಿ ಫಿರುನ್-ಖೆಳುಕ್ ಲಾಗ್ಲೆ ಬಾರಾ ವರ್ಸಾಚೆ ಚೆಡು ಹೊತ್ತೆ ತೆ. ಹೆ ಬಗುನ್ ತೆನಿ ಅಜಾಪ್ ಹೊಲೆ.

⁴³ ಮಾನಾ ಜೆಜುನ್ ಹಿ ಖಬರ್ ಕೊನಾಕ್ಬಿ ಸಾಂಗುನಕಾಸಿ ಮನುನ್ ತೆಂಕಾ ಖಡಕ್ ತಾಕಿತ್ ದಿಲ್ಯಾನ್ ಅನಿ “ತ್ಯಾ ಚೆಡ್ಬಾಕ್ ಕಾಯ್ ತರ್ ಖಾವ್ಕ್ ದಿವಾ”,ಮನುನ್ ಸಾಂಗ್ಲ್ಯಾನ್.