ಇಬ್ರಿಯರಿಗೆ 5 - ದೆವಾಚಿ ಖರಿ ಖಬರ್

¹ ಹರ್ ಎಕ್ಲ್ಯಾ ಶ್ರೆಸ್ಟ್ ಯಾಜಕಾಕ್ ಮಾನ್ಸಾಂಚ್ಯಾ ಮದ್ನಾ ಯೆಚುನ್ ಕಾಡ್ತ್ಯಾತ್, ಅನಿ ಮಾನ್ಸಾಂಚ್ಯಾ ತರ್ಪೆನ್ ದೆವಾಚ್ಯಾ ಇದ್ರಾಕ್ ಸೆವಾ ಕರುಕ್, ಪಾಪಾಂಚ್ಯಾ ಸಾಟ್ನಿ ದೆನ್ಗಿಯಾ ಅನಿ ಬಲಿಯಾ ಭೆಟ್ಟುಕ್ ಮನುನ್ ನೆಮ್ತಾತ್.

² ತೊಚ್ ಬಳ್ ನಸಲ್ಲ್ಯಾ ಸಾರ್ಕೊ ಹೊಲ್ಲ್ಯಾ ವೈನಾ ಗೊತ್ತ್ ನಸಲ್ಲ್ಯಾಕ್ನಿ ಅನಿ ಚುಕುನ್ ಪಡಲ್ಯಾಕ್ನಿ ದಯಾ ದಾಕ್ವುನ್ ತೆಚ್ಯಾನ್ ಹೊತಾ.

³ ಅನಿ ಹ್ಯಾಚ್ ಬಳ್‍ನಸಲ್ಲ್ಯಾ ಪರಿಸ್ಥಿತಿಕ್ ಲಾಗುನ್ ಕಶೆ ಲೊಕಾಂಚ್ಯಾ ಪಾಪಾಂಚ್ಯಾ ಸಾಟ್ನಿಬಿ ತಸೆಚ್ ಅಪ್ನಾಚ್ಯಾಚ್ ಪಾಪಾಂಚ್ಯಾ ಸಾಟ್ನಿಬಿ ತೆನಿ ಬಲಿ ಭೆಟ್ವುಕ್ ಪಾಜೆ.

⁴ ಆರೊನಾಚ್ಯಾ ಸಾರ್ಕೆ ದೆವಾನ್ ಬಲ್ವಲ್ಲ್ಯಾ ಶಿವಾಯ್ ಖಲ್ಯಾಬಿ ಮಾನ್ಸಾನ್ ಹೆ ಮೊಟ್ಯಾ ಯಾಜಕಾಚೆ ಕಾಮ್ ಮೊಟೆಪಾನ್ ಅಪ್ನಿಚ್ ಹಾತಿತ್ ಘೆವ್ಕ್ ಹೊಯ್ನಾ.

⁵ ತೆಚ್ಯಾ ಸಾರ್ಕೆಚ್ ಕ್ರಿಸ್ತಾನ್‍ಬಿ ಶ್ರೆಸ್ಟ್ ಯಾಜಕಾಚೆ ಮೊಟೆಪಾನ್ ಅಪ್ನಿಚ್ ಹೊವ್ನ್ ಘೆವ್ಕ್ ನಾ, ತೆಕಾ ಯಾಜಕ್ ಕರುನ್ ನೆಮಲ್ಲ್ಯಾ ತ್ಯಾ ದೆವಾನ್ ತೆಕಾ, ತಿಯಾ ಮಾಜೊ ಲೆಕ್, ಆಜ್ಚ್ಯಾ ದಿಸಿ ಮಿಯಾ ತುಕಾ ಬಾಬಾ ಹೊಲಾ ಮಟ್ಲ್ಯಾನ್.

⁶ ತಸೆಚ್ ಅನಿ ಎಕಾಕ್ಡೆಬಿ ತೊ ಮನ್ತಾ, ತಿಯಾ ಸದಾಸರ್ವತಾಕ್ ಪತರ್ ಮೆಲ್ಕಿಸದೆಕಾಚ್ಯಾ ಪಂಗಡಾಚೊ ಯಾಜಕ್.

⁷ ಜೆಜು ಹ್ಯಾ ಜಗಾತ್ ಹೊತ್ತೊ ತನ್ನಾ ಅಪ್ನಾಕ್ ಮರ್‍ನಾತ್ನಾ ಹುರ್‍ವುಕ್ ಬಳ್‍ ಹೊತ್ತ್ಯಾಕಡೆ ಬೊಬ್ ಮಾರುನ್ ಅನಿ ಡೊಳ್ಯಾನಿತ್ನಾ ದುಕ್ಕಾ ಗಳ್ವುನ್ ಮಾಗ್ನಿಯಾ ಅನಿ ವಿನಂತ್ಯಾ ಕರುಕ್‍ಲಾಲೊ, ತೆಚ್ಯಾ ಮಾನಾಚ್ಯಾ ಖಾಲ್ತಿಪಾನಾ ಸಾಟ್ನಿ ದೆವಾನ್ ತೆಚಿ ಮಾಗ್ನಿ ಆಯಿಕ್ಲ್ಯಾನ್.

⁸ ಖರೆ ತೊ ದೆವಾಚೊ ಲೆಕ್ ಹೊಲ್ಯಾರ್ ಬಿ ಅಪ್ನಿ ಸೊಸಲ್ಲ್ಯಾ ಕಸ್ಟಾ ವೈನಾ ಖಾಲ್ತಿ ಪಾನ್ ಮನ್ತಲೆ ತೆನಿ ಶಿಕ್ಲ್ಯಾನ್;

⁹ ಅನಿ ಸಂಪುರ್ನ್ ತೆಚ್ಯಾ ಟೊಕೆಕ್ ತೆಚಿ ಗೊಸ್ಟ್ ಪಾಳ್ತಲ್ಯಾ ಸಗ್ಳ್ಯಾಕ್ನಿ ಸದಾ ಸರ್ವತಾಚ್ಯಾ ಸುಟ್ಕೆಚೊ ಕಾರನ್ ತೊ ಹೊಲೊ.

¹⁰ ಅನಿ ದೆವಾನ್ ತೆಕಾ ಮೆಲ್ಕಿಸದೆಕಾಚ್ಯಾ ಪಂಗಡಾಚೊ ಶ್ರೆಸ್ಟ್ ಯಾಜಕ್ ಕರುನ್ ನೆಮ್ಲ್ಯಾನ್.

ವಿಶ್ವಾಸ್ ಸೊಡಿನಸ್ತಾನಾ ರ್‍ಹಾವ್ಕ್ ಹುರ್ಶಾಕಿ

¹¹ ‍ಹ್ಯಾ ವಿಶಯಾತ್ ಅಮಿ ಸಾಂಗುಕ್ ಗೆಲ್ಯಾರ್ ಲೈ ಹಾಯ್ ಖರೆ ತುಮ್ಚಿ ಕಾನಾ ದಾಟ್ ಹೊಲ್ಯಾತ್, ತಸೆಮನುನ್ ತುಮ್ಕಾ ಸೊಡ್ಸುನ್ ಸಾಂಗುಕ್ ಮಾಕಾ ಕಸ್ಟ್ ದಿಸ್ತಾ.

¹² ಹೆ ಸೊಡ್ಲ್ಯಾರ್ ತುಮಿ ದುಸ್ರ್ಯಾಕ್ನಿ ಶಿಕ್ವುತಲಿ ಲೊಕಾ ಹೊತಲೆ ಹೊತ್ತೆ, ಖರೆ ದೆವಾಚ್ಯಾ ಅದ್ದಿಚ್ಯಾ ಬಾತ್ಮಿಚಿ ಸಮಜ್ ಅನಿ ಪರ್ತುನ್ ತುಮ್ಕಾ ದಿವ್ಕ್ ಅನಿ ಎಕ್ಲ್ಯಾಚಿ ಗರಜ್ ಪಡಲ್ಲಿ ಹಾಯ್, ಘಟ್ಲ್ಯಾ ಜೆವ್ನಾಚ್ಯಾ ಬದ್ಲಾಕ್ ತುಮ್ಕಾ ಅಜುನ್‍ಬಿ ದುದ್ದಾಚಿ ಗರಜ್ ಹಾಯ್.

¹³ ಜೆ ಕೊನ್ ದುದ್ದ್ ಎವ್ಡೆಚ್ ಫಿತಾ ತೊ ಅಜುನ್‍ಬಿ ಬಾರಿಕ್ಲ್ಯಾ ದುದ್ದ್ ಫಿತಲ್ಯಾ ಪೊರಾ ಸಾರ್ಕೊಚ್; ನ್ಯಾಯ್‍ನಿತಿಚೊ ತೆಕಾ ಅನ್‍ಬೊಗ್ ನಾ.

¹⁴ ಘಟ್ಲೆ ಜೆವಾನ್ ಮೊಟೆ ಹೊಲ್ಲ್ಯಾಕ್ನಿ; ಪಾಜೆ ಹೊಲ್ಲೊ ತವ್ಡೊ ಅನ್‍ಬೊಗ್ ಕರುನ್ ಖಲೆ ಬರೆ ಖಲೆ ವಾಯ್ಟ್ ಮನ್ತಲಿ ಸಮಜ್ ಹೊತ್ತ್ಯಾಕ್ನಿ ತೆ.