ಇಬ್ರಿಯರಿಗೆ 3 - ದೆವಾಚಿ ಖರಿ ಖಬರ್

ಜೆಜು ಮೊಯ್ಜೆಚ್ಯಾನ್ಬಿ ಮೊಟೊ

¹ ಹೆಚ್ಯಾಸಾಟ್ನಿ ಭಕ್ತಿನ್ ಚಲ್ತಲ್ಯಾ ಭಾವಾನು, ಅನಿ ಭೆನಿಯಾನು ದೆವಾಚ್ಯಾ ಬಲ್ವನಿತ್ ಭಾಗಿದಾರ್ ಹೊಲ್ಲ್ಯಾನು, ಅಮ್ಕಾ ಗಾವಲ್ಲ್ಯಾ ವಿಶ್ವಾಸಾಚ್ಯಾ ವೈನಾ ಮಾನುನ್ ಘೆಟಲ್ಲ್ಯಾ ಅಮ್ಚ್ಯಾ ಶ್ರೆಸ್ಟ್ ಯಾಜಕ್ ಹೊವ್ನ್ ಅಸಲ್ಲ್ಯಾ ಜೆಜು ಕ್ರಿಸ್ತಾಕ್ಡೆ ಧ್ಯಾನ್ ದಿವಾ.

² ಮೊಯ್ಜೆ ದೆವಾಚ್ಯಾ ಘರಾನ್ಯಾಕ್ ಕನ್ನಾಬಿ ವಿಶ್ವಾಸಾನ್ ರ್‍ಹಾಲೊ. ತಸೊಚ್ ತೊಬಿ ಅಪ್ನಾಕ್ ನೆಮುನ್ ಕಾಡಲ್ಲ್ಯಾ ದೆವಾ ವರ್ತಿ ವಿಶ್ವಾಸಾನ್ ರ್‍ಹಾಲೊ.

³ ಖರೆ ಘರಾನ್ಯಾಚ್ಯಾನಿಬಿ ಜಾಸ್ತಿ ಘರ್ ಭಾಂದ್ತಲ್ಯಾಕ್ ಮಾನ್ ಗಾವ್ತಾ.

⁴ ಹರಿ ಎಕ್ ಘರಾಕ್ ತೆಚೊಚ್ ಮನ್ತಲೊ ಎಕ್ ಭಾಂದ್ಪಿ ಹಾಯ್, ಅನಿ ದೆವ್ ಸಗ್ಳ್ಯಾಚೊ ಭಾಂದ್ಪಿ ಹೊವ್ನ್ ಹಾಯ್.

⁵ ಮೊಯ್ಜೆ ದೆವಾಚ್ಯಾ ಘರಾತ್ ಎಕ್ ವಿಶ್ವಾಸಾಚ್ಯಾ ಆಳಾಚ್ಯಾ ಸಾರ್ಕೆ ಕಾಮ್ ಕರುಕ್ ಲಾಗಲ್ಲೊ; ದೆವ್ ಫಿಡೆ ಸಾಂಗುಚೆ ಮನುನ್ ಹೊತ್ತ್ಯಾ ಖಬ್ರೆಕ್ ಸಾಕ್ಷಿ ದಿವ್ಕ್ ಲಾಗಲ್ಲೊ.

⁶ ಖರೆ ಕ್ರಿಸ್ತ್ ಲೆಕಾಚ್ಯಾ ಸಾರ್ಕೊ ದೆವಾಚ್ಯಾ ಘರ್ಚೊ ವಿಶ್ವಾಸಾಚೊ ಅದಿಕಾರಿ ಅನಿ ಅಮ್ಕಾ ಗೌರವ್ ಹಾನ್ತಲೊ ವಿಶ್ವಾಸ್ ಅನಿ ಬರೊಸೊ ಅಮಿ ಘಟ್ ಸಂಬಾಳುನ್ ಘೆವ್ನ್ ರಾಲಾಂವ್ ತರ್ ಅಮಿಚ್ ತೆಚೆ ಘರ್ ಹೊತಾಂವ್.

ದೆವಾಚ್ಯಾ ಲೊಕಾಕ್ನಿ ವಿಶ್ರಾಂತಿ

⁷ ತೆಚ್ಯಾಸಾಟಿಚ್ ಪವಿತ್ರ್ ಆತ್ಮೊ ಮನ್ತಾ: “ಆಜ್ ದೆವಾಚೊ ಧನ್ ತುಮಿ ಆಯಿಕ್ತ್ಯಾಶಿ ಜಾಲ್ಯಾರ್,

⁸ ತೆಚ್ಯಾ ವಾಟೆಕ್ ವ್ಹಾಕ್ಡೆ ಗೆಲ್ಲ್ಯಾ ತ್ಯಾ ಎಳಾರ್ ಕರಲ್ಲ್ಯಾ ಸಾರ್ಕೆ ತಸೆ ಮಟ್ಲ್ಯಾರ್, ಡಂಗ್ಳಿತ್ ಪರಿಕ್ಷಾಚ್ಯಾ ದಿಸಾತ್ನಿ ಕರಲ್ಲ್ಯಾ ಸಾರ್ಕೆ ತುಮ್ಚಿ ಮನಾ ನಿಸ್ಟುರ್ ಕರುನಕಾಶಿ, ತುಮ್ಚ್ಯಾ ಪುರ್ವಜಾನಿ ದೆವಾಕ್ ವಿರೊದ್ ಕರ್ಲ್ಯಾನಿ.

⁹ ತನ್ನಾ ತುಮ್ಚ್ಯಾ ಅದ್ಲ್ಯಾ ಲೊಕಾನಿ ಮಾಕಾ ಪಾರ್ಕುನ್ ಅನಿ ಪರಿಕ್ಷಾ ಕರ್ಲ್ಯಾನಿ, ಚಾಳಿಸ್ ವರ್ಸಾ ಮಿಯಾ ಕರಲ್ಲಿ ಕಾಮಾ ತೆನಿ ಬಗಟ್ಲ್ಯಾನಿ”,

¹⁰ ತಸೆ ಮನುನ್ ತ್ಯಾ ಲೊಕಾಂಚೊ ಮಾಕಾ ರಾಗ್ ಯೆಲೊ ಅನಿ ಸಂತಾಪಾನ್ ಮಿಯಾ, “ಕನ್ನಾಬಿ ತೆಂಚಿ ಮನಾ ಮಾಜೆಕ್ನಾ ಧುರುಚ್ ಹಾತ್; ತೆಂಚ್ಯಾನಿ ಮಾಜಿ ವಾಟಾ ಹುಡ್ಕುಕ್ ಹೊವ್ಕ್ ನಾ.

¹¹ ಅಶೆ ಮಾಜ್ಯಾ ರಾಗಾನ್ ಆನ್ ಘಾಲುನ್ ಮಿಯಾ ಮಟ್ಲೊ ಮಿಯಾ ತೆನಿ ಆರಾಮ್ ಘೆವ್ಕ್ ಮನುನ್ ತಯಾರ್ ಕರುನ್ ಥವಲ್ಲ್ಯಾ ಗಾಂವಾತ್ ಕನ್ನಾಚ್ ಭುತ್ತುರ್ ಗುಸಿನ್ಯಾತ್”.

¹² ತಸೆ ಮನುನ್ ಮಾಜ್ಯಾ ಭಾವಾನು ಅನಿ ಭೆನಿಯಾನು ಹುರ್ಶಾಕಿತ್ ರ್‍ಹಾವಾ, ಝಿತ್ತ್ಯಾ ದೆವಾಕ್ನಾ ಧುರ್ ನ್ಹೆತಲೊ ಖೊಟೊ ಅನಿ ವಿಶ್ವಾಸಾನ್ ನಸಲ್ಲೊ ಮನ್ ತುಮ್ಚ್ಯಾ ಕೊನಾಚ್ಯಾ ಭುತ್ತುರ್ ರಾತಲೊ ನಕ್ಕೊ.

¹³ ಹೆಚ್ಯಾ ಬದ್ಲಾಕ್, ಪವಿತ್ರ್ ಪುಸ್ತಕ್ ಪರ್‍ಕಾರ್ ಆಜ್ ಮನ್ತಲೊ ದಿಸ್ ತುಮ್ಕಾ ರ್‍ಹಾಯ್ ಪತರ್ ಕನ್ನಾಬಿ ಎಕಾಮೆಕಾಕ್ನಿ ಉಮ್ಮೆದ್ ದಿವಾ. ಅಶೆ ಪಾಪಾಂಚ್ಯಾ ಪಾಸ್ಯಾತ್ ಪಡುನ್ ಅಪ್ನಾಚೊ ಮನ್ ತೆನಿ ನಿಶ್ಟುರ್ ಕರುನ್ ಘೆವ್‍ನಾಸಿ ಸಾರ್ಕೆ ತುಮಿ ರಾಕ್ತ್ಯಾಶಿ;

¹⁴ ಕಶ್ಯಾಕ್ ಮಟ್ಲ್ಯಾರ್, ಅದ್ದಿ ಅಮ್ಕಾ ಗಾವಲ್ಲೆ ವಿಶ್ವಾಸಿಪಾನ್ ಅಮಿ ಸರ್ತ್ಯಾ ಎಳಾರ್ ಪತರ್ ಸಂಬಾಳುನ್ ಘೆವ್ನ್ ಜಾತಾಂವ್ ಮನ್ತಲ್ಯಾ ಗೊಸ್ಟಿ ವೈನಾ ಅಮಿ ಕ್ರಿಸ್ತಾಚ್ಯಾ ವಾಂಗ್ಡಾ ಎಕ್ ವಾಟೊ ಘೆತಲೆ ಹೊಲಾಂವ್.

¹⁵ ಪವಿತ್ರ್ ಪುಸ್ತಕಾತ್ ಸಾಂಗಲ್ಲ್ಯಾ ಸಾರ್ಕೆ ಆಜ್ ದೆವಾಚೊ ಧನ್ ತುಮಿ ಆಯಿಕ್ತ್ಯಾಶಿ ಹೊಲ್ಯಾರ್, ತೆಚ್ಯಾ ವಿರೊದ್ ಗೆಲ್ಲ್ಯಾ ತೆನಿ ಕರಲ್ಲ್ಯಾ ಸಾರ್ಕೆ ತುಮ್ಚಿ ಮನಾ ಮಂಡ್ ಕರುನಕಾಶಿ.

¹⁶ ಅಶೆ ರಾತಾನಾ ದೆವಾಚೊ ಧನ್ ಆಯ್ಕುನ್‍ಬಿ ತೆಚ್ಯಾ ವಿರೊದ್ ಜಾತಲೆ ಕೊನ್ ತೆ? ಮೊಯ್ಜೆ ಮುಖಂಡ್ ಹೊವ್ನ್ ಇಜಿಪ್ತ್ ಮನ್ತಲ್ಯಾ ದೆಶಾತ್ನಾ ಭಾಯ್ರ್ ಯೆಲ್ಲಿ ತಿ ಸಗ್ಳಿ ಲೊಕಾಚ್ ನ್ಹಯ್ ತಿ?

¹⁷ ಅನಿ ಚಾಳಿಸ್ ವರ್ಸಾ ಪತರ್ ದೆವ್ ಕೊನಾಚ್ಯಾ ವರ್ತಿ ರಾಗಾನ್ ಹೊತ್ತೊ? ಡಂಗ್ಳಿತ್ ಮಡಿ ಪಡಲ್ಲ್ಯಾ ಪಾಪ್ ಕರಲ್ಲ್ಯಾ ತ್ಯಾ ಲೊಕಾಂಚ್ಯಾ ವರ್‍ತಿಚ್ ನ್ಹಯ್?

¹⁸ “ಮಿಯಾ ತೆಂಕಾ ಆರಾಮ್ ಘೆವ್ಕ್ ಮನುನ್ ತಯಾರ್ ಕರುನ್ ಥವಲ್ಲ್ಯಾ ತ್ಯಾ ಗಾಂವಾತ್ ತೆನಿ ಕನ್ನಾಬಿ ಭುತ್ತುರ್ ಗುಸಿನಾತ್.” ಮನುನ್ ದೆವಾನ್ ಆನ್ ಘಾಲುನ್ ಸಾಂಗಟಲ್ಲೆ ಕೊನಾಚ್ಯಾ ವಿಶಯಾತ್ ತೆ? ತೆನಿ ಸಾಂಗಟಲ್ಲೆ ಆಯ್ಕಿನಸ್ತಾನಾ ಚಲ್ತಲ್ಯಾ ಲೊಕಾಂಚ್ಯಾ ವಿಶಯಾತುಚ್ ನ್ಹಯ್?

¹⁹ ಅಶೆ ರಾತಾನಾ, ತೆಂಚ್ಯಾ ವಿಶ್ವಾಸ್‍ ನಸಲ್ಲ್ಯಾಚ್ ತೆಂಕಾ ಆರಾಮ್ ಘೆತಲ್ಯಾ ಗಾಂವಾತ್ ಭುತ್ತುರ್ ಗುಸುಕ್ ಅಡ್ವುಲ್ಯಾನ್ ಮನುನ್ ಅಮ್ಕಾ ಬರಬ್ಬರ್ ಕಳುನ್ ಯೆತಾ.