១ យ៉ូហាន INTRO1 - ព្រះគម្ពីរបរិសុទ្ធកែសម្រួល ២០១៦ពាក្យលំនាំ ជាយូរឆ្នាំ ក្រោយពេលព្រះយេស៊ូវសោយទិវង្គត មានកើតវិបត្ដិមួយយ៉ាងធំក្នុងចំណោមអ្នកជឿ គឺគ្រីស្ទបរិស័ទខ្លះដែលស្ទាត់ជំនាញខាងទស្សនវិជ្ជាក្រិក អួតខ្លួនថាគេអាច «ស្គាល់» និង «ឃើញ» ព្រះបានដោយប្រាជ្ញា និងតាមការត្រិះរិះរបស់ខ្លួន។ ពួកគេអួតទៀតថា ខ្លួនគេគ្មានជាប់បាបទាល់តែសោះ ជាពិសេសទៅទៀត អ្នកទាំងនោះមិនជឿថាព្រះយេស៊ូវជាព្រះរាជបុត្រារបស់ព្រះទេ ហើយក៏មិនជឿថាព្រះអង្គជាមនុស្សធម្មតាដែរ។ គេនឹកស្មានថា ព្រះវិញ្ញាណរបស់ព្រះរាជបុត្រាបានយាងចូលក្នុងរូបបុរសម្នាក់ឈ្មោះយេស៊ូវ នៅពេលលោកយ៉ូហាន-បាទីសទ្ទធ្វើពិធីជ្រមុជទឹកឲ្យ ពួកគេស្មានទៀតថា ព្រះវិញ្ញាណរបស់ព្រះរាជបុត្រា បានយាងចេញទៅវិញនៅពេលព្រះយេស៊ូវរងទុក្ខលំបាក។ គោលបំណង លោកយ៉ូហានសរសេរសំបុត្របីច្បាប់នេះ នៅចុងសតវត្សទីមួយ ដើម្បីប្រៀនប្រដៅគ្រីស្ទបរិស័ទទាំងឡាយឲ្យកាន់ជំនឿត្រឹមត្រូវ កុំចាញ់បោកពួកអ្នកដែលផ្សាយទ្រឹស្ដីផ្ដេសផ្ដាសទាំងនោះឡើយ។ លោកបានបញ្ជាក់យ៉ាងច្បាស់អំពីផ្លូវដ៏ពិតប្រាកដ គឺថា អ្នកណាមានចិត្ដស្រឡាញ់ចំពោះអ្នកផងទាំងពួង អ្នកនោះហើយដែលស្គាល់ និងឃើញព្រះ!។ សំបុត្រទីពីរ និងទីបី ជាសំបុត្រខ្លីៗ ផ្ញើទៅក្រុមគ្រីស្ទបរិស័ទមួយ និងគ្រីស្ទបរិស័ទម្នាក់ឈ្មោះកៃយុស។ គម្រោងគម្ពីរយ៉ូហានទី១៖ • សេចក្ដីផ្ដើម ១.១-៤ • ពន្លឺ និងភាពងងឹត ១.៥-២.២៩ • កូនរបស់ព្រះ និងកូនរបស់អារក្សសាតាំង ៣.១-២៤ • សេចក្ដីពិត និងគ្រូក្លែងក្លាយ៤.១-៦ • សេចក្ដីស្រឡាញ់ ៤.៧-២១ • ជ័យជម្នះរបស់ជំនឿ ៥.១-២១ គម្រោងគម្ពីរយ៉ូហានទី២៖ • សេចក្ដីផ្ដើម ១-៣ • សេចក្ដីស្រឡាញ់រវាងបងប្អូន ៤-៦ • គ្រូក្លែងក្លាយ ៧-១១ • អវសានកថា ១២-១៣ គម្រោងគម្ពីរយ៉ូហានទី៣៖ • សេចក្ដីផ្ដើម ១-៤ • ភក្ដីភាពរបស់លោកកៃយុស ៥-៨ • ឌីអូត្រែប និងដេមេទ្រាស ៩-១២ • អវសានកថា ១៣-១៥ |
© 2016 United Bible Societies
Bible Society in Cambodia