សាការី INTRO1 - ព្រះគម្ពីរបរិសុទ្ធកែសម្រួល ២០១៦ពាក្យលំនាំ យើងអាចដាក់ឈ្មោះកណ្ឌគម្ពីរសាការីនេះថាជាកណ្ឌគម្ពីរ «សេចក្ដីសង្ឃឹម» ក៏បាន ដ្បិតខ្លឹមសារនៃកណ្ឌគម្ពីរនេះចែងអំពីសេចក្ដីសង្ឃឹមរបស់ជនជាតិអ៊ីស្រាអែល នៅជំនាន់នោះ។ យើងអាចបែងចែកកណ្ឌគម្ពីរសាការីជាពីរផ្នែក។ ផ្នែកទីមួយ (ជំពូក ១-៨) ជាសេចក្ដីដែលហោរាប្រកាសនៅអំឡុងឆ្នាំ ៥២០-៥១៨ មុនគ្រីស្ទសករាជ គឺក្នុងពេលជាមួយគ្នានឹងហោរាហាកាយដែរ។ សេចក្ដីដែលហោរាថ្លែងក្នុងផ្នែកនេះ មានលក្ខណៈជានិមិត្តហេតុដ៏អស្ចារ្យ ហើយចែងអំពីការសង់ព្រះវិហារ និងក្រុងយេរូសាឡិមឡើងវិញ ដែលជាទីសម្គាល់មួយនៃយុគសម័យថ្មី។ ព្រះបានជ្រើសរើសលោកទេសាភិបាលសូរ៉ូបាបិល ជាពូជពង្សរបស់ព្រះបាទដាវីឌ ព្រមទាំងសម្ដេចសង្ឃយេសួរ ធ្វើជាអ្នកដឹកនាំប្រជារាស្ត្ររបស់ព្រះអង្គ នៅដើមដំបូងនៃយុគសម័យនេះ។ សេចក្ដីសង្ឃឹមរបស់ជនជាតិអ៊ីស្រាអែល ផ្ចង់ទៅរកគ្រាដែលព្រះយាងមកគ្រងរាជ្យលើផែនដីទាំងមូល ហើយសេចក្ដីសង្ឃឹមនេះក៏ជាប់ពាក់ព័ន្ធទៅលើមនុស្សម្នាក់ដែលព្រះជ្រើសរើសដែរ។ នៅផ្នែកទីពីរ (ជំពូក ៩-១៤) ចែងអំពីសេចក្ដីសង្ឃឹមនេះឯង គឺមានបរិយាយអំពីអ្នកដែលព្រះតែងតាំងឲ្យរៀបចំព្រះរាជ្យរបស់ព្រះអង្គ។ ហោរាបង្ហាញអំពីលោកនោះក្នុងឋានៈជាស្តេចដែលមានចិត្តទន់ទាប ជាគង្វាលរបស់ហ្វូងចៀម និងជាអ្នកបម្រើរបស់ព្រះដែលត្រូវគេសម្លាប់។ គម្ពីរសម្ពន្ធមេត្រីថ្មីបង្ហាញឲ្យយើងឃើញថា ព្រះយេស៊ូវមានលក្ខណៈសម្បត្តិខាងលើ ដូចលោកសាការីបានប្រកាស ជាពិសេស ត្រង់អត្ថបទដែលបរិយាយអំពីការសោយទិវង្គតរបស់ព្រះអង្គ (ម៉ាថាយ ២១.៤-៥ ម៉ាថាយ ២៦.៣១ ម៉ាកុស ១៤.២៧ យ៉ូហាន ១៩.៣៧) |
© 2016 United Bible Societies
Bible Society in Cambodia