កូឡុស INTRO1 - ព្រះគម្ពីរបរិសុទ្ធកែសម្រួល ២០១៦ពាក្យលំនាំ ក្រុងកូឡុស៖ សព្វថ្ងៃក្រុងនេះស្ថិតនៅកណ្ដាលប្រទេសទួរគី(ប្រមាណ ១៥០ គ.ម.ខាងកើតក្រុងអេភេសូរ)។ ក្រុមជំនុំនៅក្រុងកូឡុសកកើតឡើងដោយលោកអេប៉ាប្រាសបាននាំដំណឹងល្អ ទៅផ្សព្វផ្សាយនៅក្រុងនោះ។ អ្នកក្រុងកូឡុសចូលចិត្ដរិះគិតតាមទស្សនវិជ្ជាក្រិក ស្ដីអំពីធាតុទាំងបួន (ទឹក ភ្លើង ខ្យល់ ដី) និងអំពីអំណាចទាំងឡាយដែលត្រួតត្រាពិភពលោក មានអារក្ស អ្នកតា ទេវតា ព្រៃភ្នំ វត្ថុស័ក្ដិសិទ្ធិ…ជាដើម។ គ្រីស្ទបរិស័ទខ្លះនៅក្រុងកូឡុស បានរាប់បញ្ចូលព្រះគ្រីស្ទក្នុងចំណោមអំណាចទាំងនោះដែរ។ លោកប៉ុលទទួលដំណឹងនេះនៅពេលដែលលោកជាប់ឃុំឃាំងនៅក្រុងមួយ ប្រហែលជានៅក្រុងអេភេសូរ (គ.ស. ៥៤-៥៧) ឬនៅក្រុងសេសារា(គ.ស. ៥៨-៦០) ឬនៅក្រុងរ៉ូម (គ.ស. ៦១-៦៣)។ លោកក៏សរសេរសំបុត្រទៅកែតម្រង់គ្រីស្ទបរិស័ទនៅក្រុងកូឡុស។ គោលសំខាន់ៗ លោកសរសេរសំបុត្រនេះដើម្បីបញ្ជាក់ថា ព្រះយេស៊ូវពិតជាមនុស្សដូចមនុស្សឯទៀតៗ ហើយព្រះអង្គក៏ពិតជាព្រះរាជបុត្រារបស់ព្រះដែរ។ ព្រះអង្គជាព្រះអម្ចាស់ដែលគ្រប់គ្រងលើសត្វលោកទាំងឡាយ ទ្រង់មានអំណាចលើវត្ថុស័ក្ដិសិទ្ធិទាំងអស់ ទាំងនៅលើផែនដី ទាំងនៅស្ថានសួគ៌។ ព្រះអង្គបានសម្រុះសម្រួលមនុស្សលោកទាំងឡាយឲ្យរស់នៅជាមួយគ្នាដោយសុខសាន្ដ។ ក្រុមជំនុំពិតជាព្រះកាយរបស់ព្រះគ្រីស្ទ ហើយព្រះអង្គក៏ជាសិរសារបស់ក្រុមជំនុំនេះដែរ។ គម្រោងរបស់គម្ពីរកូឡុស៖ • សេចក្ដីផ្ដើម ១.១-៨ • ឋានៈ និងព្រះបរមកិច្ចរបស់ព្រះគ្រីស្ទ ១.៩-២.១៩ • ជីវិតនៅក្នុងព្រះគ្រីស្ទ ២.២០-៤.៦ • អវសានកថា ៤.៧-១៨ |
© 2016 United Bible Societies
Bible Society in Cambodia