កិច្ចការ INTRO1 - ព្រះគម្ពីរបរិសុទ្ធកែសម្រួល ២០១៦ពាក្យលំនាំ លោកលូកាបានតែងគម្ពីរពីរកណ្ឌ គឺ «ដំណឹងល្អតាមលោកលូកា» និង «កិច្ចការរបស់ពួកសាវក»។ ក្នុងគម្ពីរដំណឹងល្អ លោកលូការៀបរាប់អំពីកិច្ចការដែលព្រះយេស៊ូវបានធ្វើ និងព្រះបន្ទូលដែលព្រះអង្គបានថ្លែង កាលពីព្រះអង្គមានព្រះជន្មរស់នៅលើផែនដីនេះនៅឡើយ។ រីឯក្នុងគម្ពីរកិច្ចការវិញ លោករៀបរាប់អំពីព្រះយេស៊ូវបន្ដសកម្មភាព តាមរយៈសិស្សរបស់ព្រះអង្គ។ ទោះបីពួកសិស្សលែងឃើញព្រះយេស៊ូវផ្ទាល់នឹងភ្នែកក៏ដោយ ក៏ព្រះអង្គនៅតែគង់ជាមួយពួកគេជានិច្ច គឺព្រះអង្គប្រទានព្រះវិញ្ញាណបរិសុទ្ធមកគង់នៅជាមួយអ្នកជឿ ដើម្បីណែនាំជីវិតរបស់គេ។ មុនដំបូង លោកលូកាពន្យល់បញ្ជាក់អំពីកំណើតក្រុមគ្រីស្ទបរិស័ទ ដែលហៅថាក្រុមជំនុំនៅក្រុងយេរូសាឡិម។ បន្ទាប់មក លោករៀបរាប់អំពីសកម្មភាពរបស់ក្រុមសិស្ស ក្នុងការផ្សព្វផ្សាយដំណឹងល្អពាសពេញស្រុកប៉ាឡេស្ទីន និងប្រទេសនានាដែលស្ថិតនៅជុំវិញសមុទ្រមេឌីទែរ៉ាណេ រហូតទៅដល់ក្រុងរ៉ូមជារាជធានីរបស់ចក្រភពរ៉ូម។ នៅក្រុងយេរូសាឡិម នៅស្រុកយូដា និងនៅស្រុកសាម៉ារី អ្នកជឿដល់ព្រះយេស៊ូវ សុទ្ធសឹងតែជាសាសន៍អ៊ីស្រាអែល។ ក្រោយមក មានសាសន៍ដទៃជាច្រើននាំគ្នាជឿដល់ព្រះអង្គដែរ ហើយគេក៏រួមគ្នាជាក្រុមជំនុំឡើង ជាពិសេសនៅក្រុងអន់ទីយ៉ូក ក្រុងភីលីព និងក្រុងកូរិនថូស។ ល។ ក្នុងគម្ពីរ «កិច្ចការរបស់ពួកសាវក» នេះ លោកលូកាបានចែងទុកអំពីពាក្យពេចន៍ និងសុន្ទរកថារបស់ពួកសាវកដែលយកចិត្ដទុកដាក់ប្រកាសដំណឹងល្អដល់សាសន៍យូដា និងសាសន៍ដទៃ។ ទោះបីអស់លោកទាំងនោះពន្យល់តាមរបៀបប្លែកៗពីគ្នាក៏ដោយ ក៏មានព្រះវិញ្ញាណតែមួយបំភ្លឺ ដើម្បីណែនាំមនុស្សគ្រប់អរិយធម៌ គ្រប់ភាសា ឲ្យជឿ និងសង្ឃឹមលើព្រះយេស៊ូវតែមួយព្រះអង្គ។ តាមគម្ពីរកិច្ចការនេះ យើងអាចស្គាល់ដើមកំណើតក្រុមគ្រីស្ទបរិស័ទដែលនឹករឭកព្រះបន្ទូលរបស់ព្រះយេស៊ូវ និងកិច្ចការដែលព្រះអង្គបានធ្វើ។ គឺក្រុមគ្រីស្ទបរិស័ទទាំងនោះហើយ ដែលបានចងក្រងគម្ពីរដំណឹងល្អ និងគម្ពីរសញ្ញាថ្មីទាំងមូល។ គម្រោងរបស់គម្ពីរកិច្ចការ • ការរៀបចំបេសកកម្មរបស់ក្រុមគ្រីស្ទបរិស័ទ (១.១-២៦) -ព្រះរាជបញ្ជាចុងក្រោយ និងព្រះបន្ទូលសន្យារបស់ព្រះយេស៊ូវ (១.១-១៤)។ -ការជ្រើសរើសសាវកមួយរូបជំនួសយូដាស (១.១៥-២៦)។ • គ្រីស្ទបរិស័ទប្រកាសដំណឹងល្អនៅក្រុងយេរូសាឡិម (២.១-៨.៣)។ • គ្រីស្ទបរិស័ទប្រកាសដំណឹងល្អនៅស្រុកយូដា និងស្រុកសាម៉ារី (៨.៤-១២.២៥)។ • បេសកកម្មរបស់លោកប៉ុល (១៣.១-២៨.៣១) -ដំណើរប្រកាសដំណឹងល្អលើកទីមួយ (១៣.១-១៤.២៨)។ -មហាសន្និបាតនៅក្រុងយេរូសាឡិម (១៥.១-៣៥)។ -ដំណើរប្រកាសដំណឹងល្អលើកទីពីរ (១៥.៣៦-១៨.២២)។ -ដំណើរប្រកាសដំណឹងល្អលើកទីបី (១៨.២៣-២១.១៦)។ -លោកប៉ុលជាប់ឃុំឃាំងនៅក្រុងយេរូសាឡិម ក្រុងសេសារា និងក្រុងរ៉ូម (១៣.១-១៤.២៨)។ |
© 2016 United Bible Societies
Bible Society in Cambodia