យ៉ូប 26 - អាល់គីតាបចម្លើយរបស់ណាពីអៃយ៉ូបទៅកាន់លោកប៊ីលដាដ: លោកប៉ិនប្រសប់ជួយអ្នកដែលគ្មានកម្លាំងមែន! 1 អៃយ៉ូបឆ្លើយវិញថា៖ 2 «លោកប៉ិនប្រសប់ជួយ អ្នកដែលគ្មានកម្លាំងមែន! លោកប៉ិនប្រសប់ជួយស្រោចស្រង់ មនុស្សទន់ខ្សោយ! 3 លោកក៏ប៉ិនប្រសប់ជួយយោបល់ អ្នកដែលគ្មានប្រាជ្ញាដែរ! លោកពូកែណែនាំគេឲ្យចេះរិះគិតណាស់! 4 តើលោកថ្លែងសេចក្ដីទាំងនេះប្រាប់នរណា? នរណាបណ្ដាលចិត្តលោកឲ្យថ្លែងដូច្នេះ? អំណាចរបស់អុលឡោះ 5 អស់អ្នកដែលស្លាប់ទៅហើយ នាំគ្នាញ័ររន្ធត់នៅពីក្រោមសមុទ្រ និងក្រោមអ្វីៗដែលរស់នៅក្នុងសមុទ្រ។ 6 នរ៉កាមិនលាក់កំបាំងចំពោះ ទ្រង់ឡើយ ទ្រង់មើលធ្លុះដល់រណ្ដៅនៃសេចក្ដីវិនាស។ 7 ទ្រង់លាតត្រដាងទិសឧត្ដរនៅលើអាកាស ទ្រង់ព្យួរផែនដីនៅលើលំហ។ 8 ទ្រង់បង្ខាំងទឹកទុកនៅក្នុងពពក តែពពកមិនធ្លាយ ដោយសារទម្ងន់ទឹកឡើយ។ 9 ទ្រង់លាតត្រដាងពពក បាំងបល្ល័ង្ករបស់ទ្រង់។ 10 ទ្រង់គូសរង្វង់មួយនៅលើផ្ទៃទឹក ត្រង់ព្រំប្រទល់រវាងពន្លឺ និងងងឹត។ 11 សសររបស់មេឃរញ្ជួយ និងភ័យតក់ស្លុត នៅពេលឮទ្រង់ស្រែកគំរាម។ 12 ទ្រង់បង្ក្រាបសមុទ្រ ដោយសារអំណាចរបស់ទ្រង់។ ទ្រង់កំទេចសត្វដ៏សំបើមនៅក្នុងសមុទ្រ ដោយសារតម្រិះរបស់ទ្រង់។ 13 ទ្រង់ធ្វើឲ្យផ្ទៃមេឃប្រែជាស្រឡះ ដោយសារខ្យល់ដង្ហើមរបស់ទ្រង់ ទ្រង់ចាក់ទម្លុះពស់ដែលកំពុងតែគេចខ្លួន ដោយសារដៃរបស់ទ្រង់។ 14 នេះគ្រាន់តែជាស្នាដៃដ៏តូចរបស់ទ្រង់ ហើយយើងក៏បានឮតែបន្តិចបន្តួចប៉ុណ្ណោះ ចំណែកឯអំណាចដ៏ខ្លាំងក្លារបស់ទ្រង់វិញ តើនរណាអាចស្វែងយល់បាន?»។ |
© 2014 United Bible Societies, UK.
United Bible Societies