ទំនុកតម្កើង 82 - ព្រះគម្ពីរខ្មែរសាកលទូលសុំឲ្យមានការជំនុំជម្រះដ៏យុត្តិធម៌ បទតម្កើងរបស់អេសាភ។ 1 ព្រះទ្រង់ឈរនៅក្នុងអង្គប្រជុំខាងព្រះ ព្រះអង្គជំនុំជម្រះនៅកណ្ដាលចំណោមព្រះនានា ដោយមានបន្ទូលថា៖ 2 “តើអ្នករាល់គ្នាកាត់ក្ដីដោយសេចក្ដីទុច្ចរិត ហើយយល់មុខមនុស្សអាក្រក់ដល់ពេលណាទៀត? សេឡា 3 ចូររកយុត្តិធម៌ឲ្យមនុស្សតូចទាប និងកូនកំព្រា ចូររកយុត្តិធម៌ឲ្យមនុស្សទ័លក្រ និងមនុស្សក្រីក្រ។ 4 ចូររំដោះមនុស្សតូចទាប និងមនុស្សខ្វះខាត ចូរសង្គ្រោះពួកគេពីកណ្ដាប់ដៃរបស់មនុស្សអាក្រក់! 5 អ្នករាល់គ្នាមិនដឹង ហើយមិនយល់ច្បាស់ឡើយ; អ្នករាល់គ្នាដើរចុះឡើងនៅក្នុងសេចក្ដីងងឹត; អស់ទាំងគ្រឹះនៃផែនដីនឹងរង្គើ។ 6 យើងបាននិយាយថា: ‘អ្នករាល់គ្នាជាព្រះ អ្នកទាំងអស់គ្នាជាកូនរបស់ព្រះដ៏ខ្ពស់បំផុត’ 7 យ៉ាងណាមិញ អ្នករាល់គ្នានឹងស្លាប់ដូចមនុស្ស អ្នករាល់គ្នានឹងដួលដូចមេដឹកនាំណាម្នាក់ដែរ”។ 8 ឱព្រះអើយ សូមក្រោកឡើងជំនុំជម្រះផែនដីផង ដ្បិតគឺព្រះអង្គហើយ ដែលទទួលប្រជាជាតិទាំងអស់ជាមរតក!៕ |