ទំនុកតម្កើង 58 - ព្រះគម្ពីរខ្មែរសាកលសម្រែកទាស់នឹងភាពអយុត្តិធម៌ មីកតាំ របស់ដាវីឌ សម្រាប់អ្នកដឹកនាំចម្រៀង ត្រូវលេងតាមទំនុកភ្លេងកុំបំផ្លាញ។ 1 មេគ្រប់គ្រងអើយ តើអ្នករាល់គ្នាពិតជាថ្លែងសេចក្ដីយុត្តិធម៌ឬ? តើអ្នករាល់គ្នាកាត់ក្ដីមនុស្សលោកដោយសេចក្ដីទៀងត្រង់ឬ? 2 ទេ! អ្នករាល់គ្នាប្រព្រឹត្តអំពើទុច្ចរិតក្នុងចិត្ត អ្នករាល់គ្នាអនុវត្តអំពើហិង្សានៃដៃរបស់ខ្លួន នៅលើផែនដី។ 3 មនុស្សអាក្រក់បាក់បែកចេញពីព្រះតាំងពីផ្ទៃម្ដាយ អ្នកដែលនិយាយភូតភរវង្វេងបាត់តាំងពីផ្ទៃម្ដាយ។ 4 ពិសរបស់ពួកគេដូចពិសរបស់ពស់ ពួកគេខ្ទប់ត្រចៀករបស់ខ្លួនដូចពស់វែកថ្លង់ 5 ដើម្បីកុំឲ្យឮសំឡេងរបស់គ្រូចាប់ពស់ ឬអ្នកសូត្រមន្តអាគមយ៉ាងពូកែ។ 6 ឱព្រះអើយ សូមបំបាក់ធ្មេញនៅក្នុងមាត់របស់ពួកគេ! ព្រះយេហូវ៉ាអើយ សូមកាច់ចង្កូមរបស់ពួកសិង្ហស្ទាវផង! 7 សូមឲ្យពួកគេផុតទៅដូចទឹកហូរ សូមឲ្យព្រួញទាំងនោះរឹលវិញ កាលណាពួកគេយឹតព្រួញរបស់ខ្លួន។ 8 សូមឲ្យពួកគេបានដូចខ្យងក្ដក់ដែលវារបណ្ដើរ រលាយបណ្ដើរ និងដូចកូនរលូតរបស់ស្ត្រី ដែលមិនដែលឃើញពន្លឺថ្ងៃ។ 9 មុនភ្លើងបន្លាប៉ះឆ្នាំងរបស់អ្នករាល់គ្នា ព្រះអង្គនឹងផាត់យកទៅ ទោះបីជាវាស្រស់ ឬឆេះក៏ដោយ។ 10 មនុស្សសុចរិតនឹងអរសប្បាយនៅពេលបានឃើញការសងសឹក គេនឹងលាងជើងរបស់ខ្លួនក្នុងឈាមរបស់មនុស្សអាក្រក់។ 11 ដូច្នេះ មនុស្សនឹងពោលថា៖ “ពិតជាមានផលសម្រាប់មនុស្សសុចរិតមែន! ពិតជាមានព្រះដែលជំនុំជម្រះនៅលើផែនដីមែន!”៕ |