ទំនុកតម្កើង 48 - ព្រះគម្ពីរខ្មែរសាកលលើកតម្កើងទីក្រុងរបស់ព្រះមហាក្សត្រ ចម្រៀងមួយ ជាបទតម្កើងរបស់កូនចៅកូរ៉ា។ 1 ព្រះយេហូវ៉ាទ្រង់ធំឧត្ដម ហើយស័ក្ដិសមនឹងសរសើរតម្កើងយ៉ាងខ្លាំង នៅទីក្រុងរបស់ព្រះនៃយើង គឺនៅលើភ្នំដ៏វិសុទ្ធរបស់ព្រះអង្គ! 2 ភ្នំស៊ីយ៉ូននៅទិសខាងជើងដ៏ឆ្ងាយ ជាទីក្រុងរបស់ព្រះមហាក្សត្រដ៏ធំឧត្ដម ដែលមានកម្ពស់ដ៏ស្រស់ស្អាត ជាសេចក្ដីរីករាយនៃផែនដីទាំងមូល។ 3 ព្រះគង់នៅក្នុងបន្ទាយនៃទីក្រុងនោះ ព្រះអង្គសម្ដែងអង្គទ្រង់ជាទីពឹងជ្រក។ 4 មើល៍! បណ្ដាស្ដេចបានជួបជុំគ្នា ពួកគេបានយាងឆ្លងកាត់ជាមួយគ្នា។ 5 ពួកគេបានឃើញទីក្រុងនោះ ក៏ភ្ញាក់ផ្អើល ពួកគេបានតក់ស្លុត ហើយប្រញាប់រត់ចេញ។ 6 នៅទីនោះ ការញ័ររន្ធត់បានចាប់ពួកគេ; មានការឈឺចុកចាប់ដូចស្ត្រីកំពុងសម្រាលកូន។ 7 ឱព្រះអើយ ព្រះអង្គកម្ទេចសំពៅតើស៊ីស ដោយខ្យល់ទិសខាងកើត។ 8 ដូចដែលយើងបានឮយ៉ាងណា យើងក៏ឃើញយ៉ាងនោះដែរ ក្នុងទីក្រុងរបស់ព្រះយេហូវ៉ានៃពលបរិវារ ក្នុងទីក្រុងរបស់ព្រះនៃយើង គឺថាព្រះនឹងធ្វើឲ្យទីក្រុងនោះស្ថិតស្ថេរជារៀងរហូត។ សេឡា 9 ឱព្រះអើយ នៅកណ្ដាលព្រះវិហាររបស់ព្រះអង្គ យើងខ្ញុំរិះគិតអំពីសេចក្ដីស្រឡាញ់ឥតប្រែប្រួលរបស់ព្រះអង្គ! 10 ឱព្រះអើយ ដូចដែលព្រះនាមរបស់ព្រះអង្គជាយ៉ាងណា ការសរសើរតម្កើងដល់ព្រះអង្គក៏ជាយ៉ាងនោះដែរ គឺទៅដល់ចុងបំផុតនៃផែនដី! ព្រះហស្តស្ដាំរបស់ព្រះអង្គបានពេញដោយសេចក្ដីសុចរិតយុត្តិធម៌។ 11 សូមឲ្យភ្នំស៊ីយ៉ូនបានអរសប្បាយ សូមឲ្យកូនស្រីយូដាបានត្រេកអរ ដោយព្រោះការជំនុំជម្រះរបស់ព្រះអង្គ។ 12 ចូរដើរជុំវិញស៊ីយ៉ូន ហើយឡោមព័ទ្ធទីក្រុងនោះ ចូររាប់ប៉មទាំងឡាយរបស់នាង 13 ចូរផ្ចង់ចិត្តអ្នករាល់គ្នាចំពោះកំពែងរបស់នាង ចូរដើរត្រួតពិនិត្យបន្ទាយរបស់នាងចុះ ដើម្បីរៀបរាប់ប្រាប់ដល់ជំនាន់ក្រោយ 14 ថាព្រះមួយអង្គនេះ ជាព្រះរបស់យើងជារៀងរហូតអស់កល្បជានិច្ច ព្រះអង្គនឹងនាំផ្លូវយើងរហូតដល់ទីបញ្ចប់៕ |