WAEFESO 2:12 - Biblia Ilagho Jiboie Kwa Wandu Wose

¹² kumbukenyi angu ngelo iro morekoghe kula na Kristo, mtanyiro na mbari ya Israeli. Ndemorekoghe na ifungu jingi andenyi ya ilaghano ja ilaghiro; morekoghe msewadie isuwirio jingi, hata Mlungu wurumwengunyi.

WAEFESO 2:12 Խաչաձեւ Հղումներ

KUZOYA 15:18

Ituku ijo BWANA ukabonya ilaghano na Abramu ukighamba, “Kivalwa chako nachineka isanga iji, kufuma Moda ghwa Misri hata moda ghuja m'baa ghwa Eufrate,

2 MALAGHO GHA NGELO 15:3

Kwa ngelo ndacha wandu wa Israeli werekoghe wiseko na Mlungu wa loli, wiseko na mkohani owifundisha, hata wiseko na sharia;

EZRA 4:3

Ela Zerubabeli, Jeshua na wabaa wa vichuku Israeli wikawizera, “Ndedine haja ya wutesia ghonyu ghoagha Hekalu ya Mlungu odu; dichaiagha diweni sa iji koni Koreshi mzuri wa Pashia oredilaghirieghe.”

KUFUMA 12:45

Mghenyi oida, angu mdumiki olipwa, usakeja.

ISAYA 14:1

BWANA uchakaia na wughoma kwa wandu wa Israeli, na kuwisaghua sena; nao uchawiwunja isangenyi jawo jeni, na waghenyi wichacha kukaianya nawo.

ISAYA 44:6

BWANA, Uo Mzuri na Mkomboli wa Israeli, uo BWANA wa majeshi, waghamba, “Ini ne wa imbiri, na wa kutua, ndekuwadie mlungu ungi mzima kuchumba ini anduangi.

ISAYA 45:20

BWANA waghamba, “Kwanyikenyi munisoghodere kaavui, inyo masighariko gha iro mbari ra wandu; awo widukagha iyo milimu yawo ya midi, na kulomba milimu isedimagha kukira, ndewiwadie kumanya kungi.

ISAYA 61:5

Waghenyi wichamlishira mfugho renyu, wichamlimia mbuwa renyu ra mizabibu.

JEREMIA 14:8

Ee Isuwirio ja Israeli, na Mkiri wawo ngelo ya wasi; kwaki kwakaia karakara na mghenyi isangenyi kodu, sa mdambi olala kio chimweri tu.

JEREMIA 17:13

Ee BWANA oho kuko isuwirio ja Israeli, wose wikusighagha wichafushwa waya, na awo wikughalukiagha nambai, wichalaghaya sa marina ghiandikilo andonyi kwa kukaia wamsighie BWANA, uo ndoria ya machi ghiko moyo.

EZEKIELI 13:9

Nichawikaba walodi wiwonagha mawono gha tee, na kulaghua malagho gha tee; ndewichaakaia andenyi ya njama ra wandu wapo, hata ndewichaandikwa andenyi ya chuo cha wandu wa Israeli, angu kungia andenyi ya isanga ja Israeli; nenyo mchamanya kukaia Ini ne Bwana MLUNGU.

EZEKIELI 37:26

Nichabonya ilaghano ja sere nawo, najo jichakaia ilaghano ja kala na kala. Nichawimangisha na kuwibonya wichurikie; na Andu Kwapo kwa Wueli nichakuwika aghadi kwawo kwa kala na kala.

EZEKIELI 47:22

Mchajiwagha kwa kura jikaie ifwa jenyu na kwa waghenyi wichaakaia aghadi konyu, na kuva wana aghadi konyu. Wichakaia waisanga wenyu wivalo andenyi ya Israeli, nawo wichawaghilwa ifwa kwa kura aghadi ya vichuku va Israeli.

HOSEA 3:4

Wandu wa Israeli wichakaia wisewadie mzuri angu m'baa ungi kwa matuku mengi; wiseko na kufunya vizongona, hata nguro ya wueli, hata milimu na fwana na naivera.

MITALO 18:19

Mafunyo ghose gha wueli ghielie gha wandu wa Israeli wighiredagha kwapo, nakuneka oho na wana wako wa womi na wa waka ghikaie hachi yenyu ya matuku ghose. Ijo ni ilaghano kwa wundu ghonyu na wana wenyu jisedimagha kunoneka imbiri yapo kwa kala na kala.”

LUKA 1:72

uwibonyere wughoma orewilaghirieghe weke aba, kwa kujikumbuka ilaghano jake ja wueli.

JOHANE 10:16

Sena nawadie ng'ondi rimu riseko ra iranu iji. Naro reni yanifwana kuriruda, naro richalusikira lwaka lwapo; nao kuchakaia chagha chimweri na mlisha umweri.

JOHANE 15:5

“Ini ne mzabibu, na inyo mo mbashu. Uo ukaiagha andenyi kwapo na ini andenyi kwake, nuo moni uvagha matunda mengi; angu ndemdimagha kubonya ilagho jingi kuseko na ini.

JOHANE 4:22

Inyo Wasamaria mwadatasa uo msemmanyagha, ela isi damwichi uo dimtasagha, angu kukia kwafuma kwa Wayahudi.

MABONYO GHA WADUMI 2:39

Angu ilaghiro iji ni jenyu, na ja wana wenyu, na awo wose wiko kula; awo wose Bwana Mlungu uchaawiwanga wiche kwake.”

MABONYO GHA WADUMI 28:20

Kwa wundu ughu, niko namlomba diwonane dipate kudedanya; angu neefungwa na mnyororo ughu kwa wundu ghwa isuwirio ja Waisraeli.”

MABONYO GHA WADUMI 3:25

Inyo mo wana wa walodi, na wa ijo ilaghano Mlungu orewinekieghe weke ndeyo ukimzera Abrahamu, ‘Kwa kivalwa chako, wandu wose wurumwengunyi wicharasimilwa.’

WAROMA 9:8

Huwu ni kughamba, si wana wivalo kwa chia ya mumbi wikaiagha wana wa Mlungu, ela wana wa ilaghiro niwo witalikagha kukaia kivalwa.

WAGALATIA 4:8

Aho imbiri, iji morekoghe msemwichi Mlungu, morekoghe wazumba wa iyo milungu iseko milungu kwa tabia yawo anduangi;

WAEFESO 2:19

Kwa huwo idana, inyo ndemduagha waghenyi na wandu wemara-mara, ela moko wakitina andwamweri na waeli, nenyo moko wandu wa kinyumba cha Mlungu;

WAEFESO 4:18

Maririkanyo ghawo ghangirwa kira, hata ndewitambukilwagha; watanyiro na irangi ja Mlungu, kwa wundu ghwa wukelu ghuko andenyi kwawo, na kukua kwa ngolo rawo.

WAKOLOSAI 1:21

Na inyo ngelo rimu morekoghe kula na Mlungu, mkikaia wamaiza wake, kwa wundu ghwa mabonyo na maririkanyo ghenyu ghizamie.

WAKOLOSAI 1:27

Mlungu oresaghueghe kuwimanyisha awo waeli, seji ugho wungi ghwa mali ra wubaa ghwa ngasu ihi ghuko, aghadi ya wandu wa mbari zima; nagho ni Kristo andenyi konyu, isuwirio ja wubaa.

WAKOLOSAI 1:5

kwa wundu ghwa ijo isuwirio jiwikilo aighu mlungunyi kwa wundu ghonyu. Nenyo moresikireghe malagho gharo imbiri, andenyi ya ijo ilagho ja loli, ijo Ilagho Jiboie

1 WATHESALONIKE 4:13

Ela wanidu ndedikunde inyo mkaie msemanyagha malagho gha awo wimerie kufwa, eri msechekaia mkiwawa ni ngolo sa wandu wazima awo wisewadie isuwirio.

1 WATHESALONIKE 4:5

Si kwa bea rizamie sa wandu wisestaarabikie wisemmanyagha Mlungu anduangi;

2 WATHESALONIKE 2:16

Idana Bwana odu Jesu Kristo moni, na Mlungu Aba odu, uo oredikundieghe na kudineka wuhoreshi ghwa ngolo kwa kala na kala, na isuwirio icha, kwa chia ya mvono;

1 TIMOTHEO 1:1

Ini Paulo, mdumi wa Jesu Kristo uwikilo kwa amri ya Mlungu Mkiri odu, na ya Kristo Jesu isuwirio jedu.

WAEBRANIA 11:34

wikarimisha medo ibirie, wikafufunuka wisebwagho kwa lufu, wikapata ndighi nyuma ya kusilwa kwawo, wikawuya mang'oni wudenyi, wikawinga majeshi gha kighenyi.

WAEBRANIA 6:18

eri kwa chia ya agho malagho awi, ilaghiro na ighemi, agho isedimikagha Mlungu ughore tee, isi dikusaghikie nao, didime kukaia na ngolo mbaa ejiwada ijo isuwirio jiwikilo imbiri kodu.

WAEBRANIA 8:6

Ela sa iji iko, Kristo wapatire wudumiki ghuboie kuchumba ugho ghwa kala, seji koni ijo ilaghano wawuyajidumikia jiko jiboie kuchumba; kwa kukaia jibonyero kwa malaghiro mecha kuchumba.

1 PETRO 1:21

Kwa chia yake uo, moko na irumirio kwa Mlungu, uo oremrukishireghe kufuma kwa wafu, na kumneka wubaa; eri irumirio jenyu, na isuwirio jenyu, jikaie kwa Mlungu.

1 PETRO 1:3

Mlungu ndekaso, uo Ndee Bwana odu Jesu Kristo. Kwa wughoma ghwake m'baa, isi derevaloghe wuwishi, dipate kukaia na isuwirio jiko moyo kwa chia ya uko kuruka kwa Jesu Kristo kufuma kwa wafu;

1 PETRO 3:15

ela mumneke ishima Kristo ngolonyi konyu ukaie Bwana. Mkaie tayari ngelo rose, kumtumbulia mundu uo ose uchaamkotia malagho gha isuwirio muko najo andenyi konyu; ela tumbulienyi kwa wumboa na ishima,

1 JOHANE 3:3

Na kula mundu wawuyamsuwiria huwo, wakuelesha moni sa iji koni Kristo uelie.