ISAYA 5:25 - Biblia Ilagho Jiboie Kwa Wandu Wose

²⁵ Kwa wundu ugho, BWANA orejokeloghe ni machu aighu ya wandu wake; ukaghorua mkonu upate kuwikaba, na mighondi ikasughusika; gharia ra awo wifue rikakaia sa wuchafu chienyi. Hata huwo saki machu gha BWANA ndeghisirie, ela mkonu ghwake ghokaba ghoko ghughorokie hata idana.

ISAYA 5:25 Խաչաձեւ Հղումներ

1 WAZURI 14:11

Mundu uo ose wa kichuku chako ukafwa mzinyi uchajighwa ni koshi, na uo ose ufwagha mlambenyi, uchajighwa ni nderi; kwa kukaia ini BWANA najighora ilagho iji.’”

1 WAZURI 16:4

Mundu uo ose wa kivalwa chako uchafuya andenyi mzinyi uchajighwa ni koshi, na uo uchafuya mlambenyi, uchajighwa ni nyonyi ra mbeonyi.”

1 WAZURI 21:24

Na kula mundu wa kichuku cha Ahabu ufwagha mzinyi, uchajighwa ni koshi, na uo uchaafuya mlambenyi, uchajighwa ni nderi.”

2 WAZURI 13:3

Nao machu gha BWANA ghikawuka aighu ya Israeli, ukawifunya na kuwingira mikonunyi kwa Hazaeli mzuri wa Siria, na kwa Ben-hadadi mwana wa Hazaeli.

2 WAZURI 9:37

Na masighariko ghake ghichasasarwa sa mavi a mbuwenyi, mlambenyi ghwa Jezreeli, hata mndungi usedime kutambua wei uhu nuo Jezebeli.’”

2 MALAGHO GHA NGELO 36:16

Ela wikakaia wikiwiseka wadumwa wa Mlungu kwa lumenyo, wikamenya malagho ghake na walodi wake; hata BWANA ukajokwa ni machu nandighi aighu ya wandu wake, na wutesia ghungi ghukasoweka.

AYUBU 9:13

“Mlungu ndeghalusagha machu ghake, watesia wa Rahabu weremghoghomieghe.

ZABURI 106:40

Niko BWANA ukajokwa ni machu aighu ya wandu wake; wikamzamia na ndighi.

ZABURI 114:7

Sughusika imbiri ya BWANA ee ndoenyi, sughusika imbiri ya Mlungu wa Jakobo,

ZABURI 18:7

Niko ndoenyi kukatatarika na kunenganenga, misingi ya mighondi wori ikasughusika na kuzingizika; kwa kukaia BWANA orejokeloghe ni machu.

ZABURI 68:8

ndoe ikasughusika, mawingunyi kukanyesha vua kwa kucha kwake Mlungu wa Sinai, uo Mlungu wa Israeli.

ZABURI 77:18

Lukuwa lorekabieghe andenyi ya kikulughulu, chuhehia rako rikang'ala-ng'ala wurumwengunyi; ndoenyi kukanyavurika na kusughusika.

ZABURI 78:38

Ela uo kwa kukaia wa wughoma, orewifuyeghe wughoma kaung'a rawo hata nderewitoteshereghe anduangi. Oreghimazirieghe machu ghake mando mengi, eri ghisechewuka ghose.

ZABURI 83:10

awo weretotesheroghe aja Endori, wikawuya kitungasi cha ndoe.

KUFUMA 7:19

BWANA ukamzera Musa, “Mzere Haruni uiwade zobo yake, uighoruo aighu ya machi ghose gha Misri; meda yawo, mikua yawo, viriwa vawo, na ndiwa rawo rose ra machi; ghipate kuwuya bagha. Machi ghichawuya bagha isanga jose ja Misri, hata andenyi ya vombo va midi na va magho.”

ISAYA 10:4

Jasigharika ni inyo kubwaghwa wudenyi na kudwalwa sa wafungwa. Hata huwo saki, machu gha BWANA ndeghisirie, ela mkonu ghwake ghokaba ghoko ghughorokie hata idana.

ISAYA 10:6

Nadamduma kwa mbari ya wandu winileghie, awo winibonyere ngakaia na machu nawo; upate kuwidwa wunyika kuwisoka vilambo vawo, na kuwifasha-fasha sa mazozo chienyi.”

ISAYA 14:19

ela oho, ndekuwadie kaburi, kookumbwa shighadi sa kifu chifushiro; koofinikirwa na awo wibwaghilo kwa lufu, awo wiserie kondonyi kinenyi cha magho; karakara na mfu uwadirilo-wadirilo.

ISAYA 23:11

Mlungu wamerie kughorua mkonu ghwake aighu ya bahari, na kughusha agho mawuzuri; wamerie kughora kukaia ngome ra biashara ra Kanaani richukanyo.

ISAYA 25:11

Nawo wichakaia wikighorua mikonu yawo andenyi ya icho kina sa mundu ubung'agha machinyi, ela BWANA uchasera uko kukujosa kwawo hata ngera weko na akili;

ISAYA 29:2

ela Mlungu ucharedia muzi ghwa Jerusalemu wasi; muzi ughoni ghuwangwagha “Madhabahu ya Mlungu;” kuchakaia na kililo na kukema mchungu, na muzi ghose ghuchakaia sa madhabahu yachulwa ni bagha.

ISAYA 42:25

Niko huwo BWANA ukawidiria machu ghake ghibirie, na ugho wuda ghubirie; werekoreloghe ni machu ghake, ela awo ndeweremanyireghe gherewikorieghe, hata ndeweretalieghe anduangi.

ISAYA 51:20

Wana wako wasilwa na kudumbuka chienyi, kwa kula mbembe ya chia, wakaia kara kara na ighalu jawadwa nyavunyi; wachulwa ni makabo ga BWANA uko kukania kwa Mlungu wako.

ISAYA 64:3

Iji oho korechieghe na maza ra mashiniko, iro disererisuwirieghe, mighondi eresughusikieghe imbiri kwako.

ISAYA 66:15

BWANA uchacha na modo, na magare ghiendagha na iseghe sa mbeo upate kuwonyera worinyi machu ghake ghibirie na kukania kwake sa lumu lwa modo.

ISAYA 66:24

“Nawo wichafuma na kuwona gharia ra awo wandu werenileghieghe; kwa kukaia kivunyu chawo ndechifwagha, na modo ghwawo ndeghurimikagha anduangi; wichawoneka kukaia wuchafu kwa wadamu wose.”

ISAYA 9:11

Kwa huwo BWANA wawusira wamaiza aighu yawo, wipate kuwikaba.

ISAYA 9:16

Awa wawuyawilongoza awandu, waawuyawilaghasha chia; na awo wilongozwagha, waawuyatota.

ISAYA 9:17

Kwa huwu, BWANA ndewueboilwanya na ungi wa wandu wawo wa irika, hata ndena wughoma kwa wana wisena weke ndee na waka wakiwa; kwa kukaia kula umu ndena Mlungu, nao ni m'bonyi kiwiwi, na kula ilagho widedagha ni wuwiwi mduu. Hata huwo saki, machu gha BWANA ndeghisirie, mkonu ghwake ghokaba ghoko ghughorokie hata idana.

ISAYA 9:20

Wandu wakukwanyira vindo andu kose isangenyi, na kuja icho chose wichiwonagha, ela wasigharika wiko njala wokoni; hata wiaja wana wawo weni.

ISAYA 9:21

Manase na Efraimu wialwa weni na weni, na ii chia wiabonya wuda na Juda. Hata huwo saki machu gha BWANA ndeghisirie, ela mkonu ghwake ghokaba ghoko ghughorokie hata idana.

JEREMIA 15:3

“Nichawiwikia watoteshi wa mbari inya, lufu lobwagha, koshi rerashua, nyonyi ra mbeonyi na nyamandu ra isakenyi reja na kunona.

JEREMIA 16:4

Wichafwa kwa makongo ghizamie, ndewichaalililwa hata kurikwa, ela wichakaia sa mavi ndoenyi. Wichatota kwa lufu na njala, na mimbi yawo ichawuya vindo va nyonyi ra mbeonyi na nyamandu ra isakenyi.”

JEREMIA 17:4

Wichajisigha isanga jerekoghe ifwa jawo nerewinekieghe, nani nichawibonya widumike andenyi ya isanga wisejiichi, kwa kukaia wawusira machu ghapo, nagho ghichaaka sa modo kwa kala.”

JEREMIA 4:24

Nerezighanireghe aighu ya mighondi ngawona yaawuyasughusika, na mighondi mitini yose yawuyaghenda noko imbiri na noko nyuma.

JEREMIA 4:8

Kwa wundu ughu, ronyi nguwo ra magunia, mkulilie na kudikwa ni mbori; kwa kukaia machu gha BWANA ghibirie, ndeghidisighie anduangi.”

JEREMIA 6:12

Nyumba rawo richanekwa wandu wazima, mbuwa rawo chiaimweri na waka wawo wori, kwa kukaia nichaghughorua mkonu ghwapo kuwikaba wandu wose wikaiagha isangenyi.

JEREMIA 8:2

na kuanikwa airuwenyi na morinyi, na majeshi ghose gha mlungunyi, agho wereghikundieghe wikighidumikia; wikighinugha, na kughilola na kughitasa. Ndewichaatumbanywa na kurikwa, ela wichakaia sa wuchafu andoenyi.

JEREMIA 9:22

BWANA wanizera nighore welee, ‘Gharia ra wandu richakaia andonyi karakara na wuchafu ghudelo ambuwenyi, karakara na viro videmelo ngelo ekuwida; hata ndekuchaakaia na mndungi oshoa anduangi.’”

KILILO CHA JEREMIA 5:22

Da loli koodilegha putu? Koozamilwa ni isi putu?

EZEKIELI 15:6

“Kwa huwo ini Bwana MLUNGU naghamba huwu, Sa iji koni nifunyire lumbashu lwa mzabibu aghadi ya midi ya isakenyi lukoro niko koni nichaawifunya wandu wose wikaiagha Jerusalemu.

EZEKIELI 30:25

Nichamchuria mzuri wa Babuloni ndighi, ela mzuri nichamsirisha ndighi; nawo wichamanya kukaia ini ne BWANA. Ngelo nichaamneka mzuri wa Babuloni lufu lwapo, uchawoka kulwa na wandu wa isanga ja Misri.

EZEKIELI 6:14

Nani nichaghorua mkonu ghwapo kulwa nawo, hata isanga jisigho iduu andu kose wandu werekoghe wikikaia; kufuma kireti hata Ribla. Niko wichaamanya kukaia ini ne BWANA.”

DANIELI 9:16

Ee BWANA, kwa wundu ghwa mabonyo ghako gha hachi kubonyere kwa wundu ghodu, nakulomba kusighe machu na kubia kwako. Kughuleke muzi ghwako Jerusalemu, ugho mghondi ghwako ghwa wueli. Kaung'a redu na makosa gha weke aba, ghashekerie Jerusalemu na wandu wako wimenyeke na kusholelwa ni wandu wose widimarie chia rose.

HOSEA 14:4

BWANA waghamba, “Nichawiwunja wandu wapo cha kwapo. Nichawikunda kwa ngolo yapo yose; hata sichaakaia na machu nawo sena anduangi.

AMOSI 8:8

Kwa huwo ndoe ichasughusika, na kula mundu isangenyi uchakaia na wasi. Isanga jose jichasughusika; jikichua na kumichwa-michwa sa ugho moda ghwa Naili ghuko Misri.

MIKA 1:4

Mighondi ichasagha aisi ya maghu ghake sa sungu yakabishirwa modo; ichasea cha vololonyi, seji machi ghiseagha andu kwa lughongo lwa kimusi.

NAHUMU 1:5

Mighondi yasughusika imbiri ya BWANA. Mighondi mitini yasagha imbiri yake. Ndoenyi kwasughusika imbiri yake; wurumwengu na vose viko andenyi yaro wori vasughusika.

HABAKUKI 3:10

Iji mighondi erekuwonieghe ikaobua; vua ikanya kufuma mawingunyi; machi mengi ghikaghona ndoenyi nandonyi, na mivo-mivo yaro ikawuka nokoighu.

ZEFANIA 1:17

BWANA waghamba, “Nichareda wasi aighu ya wadamu, wipate kughenda sa wandu wisewonagha. Wanibonyera kaung'a, na idana bagha yawo ichadika sa machi, na mimbi yawo ichawoa andonyi sa mavi.”

WUKUMBUSO 31:17

Ituku ijo, nichajokwa ni machu aighu yawo, nani nichawisigha na kughaluka noko nisewiwone; nawo wichatoteshwa. Ngelo iyo, wichapatwa ni mawiwi mengi na kusumbuka, hata wivikie kumanya kukaia waapatwa ni agha mawiwi angu ini Mlungu wawo sikwanye nawo.

WUKUMBUSO 31:18

Na loli ituku ijo nichaghaluka noko nisewiwone kwa wundu ghwa mawiwi ghawo, angu wighalukie na kuitasa milungu mizima.

1 WATHESALONIKE 2:16

kwa kudighiria isi diseghore na wandu wa mbari zima, wichepata kukia; eri wipate kuchichura kipimo cha kaung'a rawo sa matuku ghose. Ela kutua, wamerie kuchelwa ni machu gha Mlungu.

WUFUNUO 20:11

Niko ngawona kifumbi cha nguma kibaa cha chokwa, na uo orechiserieghe. Nao ndoenyi na mlungunyi kukamkimbia, na andu kwaro ndekorewonekieghe anduangi.