EZRA 3:11 - Biblia Ilagho Jiboie Kwa Wandu Wose

¹¹ Nawo wikabora kwa kudikiana wikikasa na kumfunyira BWANA chawucha huwu: “BWANA ni mucha, angu lukundo lwake kwa Israeli, lwadua matuku ghose.” Na wandu wose wikakema wikimkasa BWANA kwa lwaka lubaa, kwa kukaia msingi ghwa Hekalu ghorekoghe ghwazolwa.

EZRA 3:11 Խաչաձեւ Հղումներ

1 MALAGHO GHA NGELO 16:34

Mfunyirenyi BWANA chawucha angu ni mucha; lukundo lwake lukatie lwadua kwa kala.

1 MALAGHO GHA NGELO 16:41

Hemani na Jeduthuni werekwanyeghe nawo, na wazima aweni weresaghuloghe kwa marina; wimfunyireghe BWANA chawucha, angu lukundo lwake lukatie lwadua matuku ghose.

2 MALAGHO GHA NGELO 5:13

nayo edeeka ni kazi ya wakabi tarumbeta na wabori kuwusira chwaka rawo wisikirike chiaimweri iji wakamfunyira BWANA chawucha), na lumbo kuborwa kwa tarumbeta na banjo na vombo vizima va muziki kwa kumkasa BWANA, na kughamba, “BWANA ni mucha, angu lukundo lwake lukatie lwadua matuku ghose,” Hekalu ya BWANA ikachulwa ni iwingu,

2 MALAGHO GHA NGELO 7:3

Wandu wa Israeli wose wiendawona modo ghwasea, na wubaa ghwa BWANA aighu ya Hekalu, wikaghoghoma na mawushu ghawo ghikadunga andonyi sakafunyi; wikatasa na kumfunyira BWANA chawucha wikighamba, “BWANA ni mucha, angu lukundo kwake lukatie lwadua matuku ghose.”

NEHEMIA 12:24

Kunughana na wulongozi ghwa Hashabia, Sherebia, na Jeshua mwana wa Kadmieli, Walawi werewaghiloghe waruna mafungu awi, wimkaseghe na kumfunyiragha chawucha Mlungu kwa mazughe sa iji koni werelaghiriloghe ni Daudi uo mundu wa Mlungu.

NEHEMIA 12:40

Kwa huwo mafungu ghose gha awo werekoghe wikifunya chawucha wikakaia kimusi Hekalunyi chiaimweri nani na nusu ya wabaa.

ZABURI 100:5

BWANA ni mucha; lukundo lwake lwadua kwa kala, na wuloli ghwake ghwadua vivalwa vose.

ZABURI 103:17

Ela lukundo lwa BWANA lwadua kufuma kala hata kwa kala, kwa awo wimuobuagha, na wucha ghwake ghwadua kwa vivalwa vawo vose,

ZABURI 106:1

BWANA ndekaso! Mfunyirenyi BWANA chawucha angu ni mucha; lukundo lwake lukatie lwadua kwa kala.

ZABURI 107:1

Mfunyirenyi BWANA chawucha, angu ni mucha; lukundo lwake lukatie lwadua matuku ghose!

ZABURI 118:1

Mfunyirenyi BWANA chawucha angu ni mucha; lukundo lwake lukatie lwadua matuku ghose.

ZABURI 131:1

BWANA sina ngolo ingi ekukasa, hata sizighanagha kwa kukujosa. Sikungiragha nimoni andenyi ya maza mbaa hata maza rikurie risenieliagha.

ZABURI 135:3

Mkasenyi BWANA angu ni mucha, jiborienyi irina jake angu ni wa wughoma.

ZABURI 47:1

Kabenyi chui inyo wandu wose! M'borienyi Mlungu kwa lwaka lubaa lwa kuboilwa.

ZABURI 47:5

Mlungu wajokie ukizumilwa na kuboilwa, BWANA wajokie ukiborelwa kwa lwaka lwa tarumbeta.

KUFUMA 15:21

Miriamu ukawiboria, “M'borienyi BWANA angu wabonya wusimi m'baa; farasi na mjoki farasi wake wawikumba baharinyi.”

ISAYA 12:6

Kemenyi na kubora kwa kuboilwa inyo wandu wose mkaiagha Sioni, kwa kukaia uo uko aghadi konyu ni m'baa, Mlungu Mweli wa Israeli.”

ISAYA 44:23

Borenyi ee mlungunyi, kwa kukaia BWANA wameria kujibonya ilagho ijo; wusirenyi chwaka renyu inyo andu kumilie kwa ndoenyi; na inyo mighondi borenyi kwa kuboilwa, ee, na kula mudi ghwa msidunyi ndeghubore, kwa kukaia BWANA wameria kumkombua Jakobo nao uchakaswa andenyi ya Israeli.

ISAYA 6:3

Wikawangana weni na weni wikighamba, “Mweli, mweli, mweli, ni BWANA wa majeshi, ndoenyi kose kwachua wubaa ghwake.”

JEREMIA 33:11

lwaka lwa kuseka na kuboilwa, na lwaka lwa bwana na bibi arusi, na chwaka ra awo wiboragha wikireda mafunyo gha chawucha andenyi ya Hekalu ya BWANA wikighamba, ‘Funyenyi chawucha kwa BWANA wa majeshi, angu BWANA ni mucha, na lukundo lwake lukatie lwadua kwa kala na kala.’ Kwa kukaia nichajibonya isanga jikaie sa iji koni jerekoghe, waghamba BWANA.”

HAGAI 2:3

“Oko mndungi aha aghadi konyu udimagha kukumbuka seji wubaa ghwa Hekalu ghorekoghe? Ghwawuyawoneka wada konyu idime? Yaawuyawoneka seji si kindo chingi.

ZEKARIA 4:7

Vighirio viwonekagha sa mghondi vichainjika imbiri kwako, na oho kuchaiagha Hekalu sena. Kukaimeria, kukiwika igho ja kutua, wandu wichazuma wikighamba, ‘Yaghoka nao! Yaghoka!’”

ZEKARIA 9:9

Zumenyi ee wandu wa Sioni! Kemenyi kwa kuboilwa inyo wandu wa Jerusalemu! Wonenyi mzuri onyu uamchea! Oko na wusimi m'baa; ela ni mmboa nao wajoka aighu ya punda; punda mtini, mwana wa punda.

LUKA 1:50

Wughoma ghwake ghwadakaia hata vivalwa na vivalwa, kwa awo wimuobuagha.

JOSHUA 6:10

Ela Joshua ukawilaghira wandu, “Msedoghode, hata msedede, mkaie kima hata ituku nichaamzera mkeme, niko mchaakema.”

JOSHUA 6:16

Nao izughe ja mfungade, wakohani wiendakaba tarumbeta, Joshua ukawizera wandu, “Kemenyi! Kwa kukaia BWANA wameria kumneka ughu muzi.

JOSHUA 6:5

Hata iji wakaba iro tarumbeta na ndighi, mkasikira iro chwaka ra tarumbeta woruwu, niko wandu wose wichakema na chwaka mbaa, na wurigha ghwa muzi ghuchaghwa hata andoenyi; niko wandu wichajoka, na kula mundu uchaghenda imbiri kughungiria muzi.”