2 WAZURI 24:2 - Biblia Ilagho Jiboie Kwa Wandu Wose

² BWANA ukamdumia Jehoiakimu majeshi gha Wakalidayo, na majeshi gha Wasiria, na majeshi gha Wamoabu, na majeshi gha Waamoni eri Juda ipate kutoteshwa kunughana na ilagho ja BWANA jighorelo ni wadumiki wake walodi.

2 WAZURI 24:2 Խաչաձեւ Հղումներ

2 WAZURI 20:17

Ngelo ichacha vilambo vako viko andenyi ya ngome yako, na ivo vose verewikiloghe ni weke ndeyo hata idime, vichadukwa hata Babuloni, na kindo chingi ndechichaasigharika.

2 WAZURI 22:16

Ola nichareda wuwiwi kwa muzi ughu na kwa wandu waro, kara kara na agho malagho mzuri wa Juda waghishoma.

2 WAZURI 23:27

BWANA ukaghamba, “Nichamuinja Juda nisemmboneghe, sa iji koni neremuinjireghe Israeli, nani nichaghulegha ugho muzi ghwa Jerusalemu nereghusaghueghe ngighamba irina japo jichakaia aho.”

2 WAZURI 6:23

Nao mzuri wa Israeli ukawibonyera karamu mbaa. Hata iji wameria kuja na kunywa, ukawisigha wikaghenda kwa bwana wawo. Kufuma ngelo iyo, Wasiria ndewicheewuya kuwada isanga ja Israeli sena.

2 MALAGHO GHA NGELO 33:11

Kwa huwo BWANA ukawiredia vilongozi va ijeshi ja mzuri wa Ashuru, wikamngira Manase kiloo cha mbua, wikamfunga na pingu ra shaba, na kumghenja Babuloni.

AYUBU 1:17

Ukighora woruwu, mdumwa umu ukacha ukighamba, “Mafungu adadu gha Wababuloni wacha na kukaba ngamila wikaghenda naro, wikabwagha wadumiki kwa lufu, nani naafufunuka ini moni niekeri nichekughoria.”

ISAYA 13:5

Wafuma isanga ja kula, noko cha kutua kwa ndoenyi; BWANA waawuyacha na maswagha ghake, na kwa machu ghake uchatotesha ndoenyi kose.

ISAYA 28:19

Kula ngelo jichaakaia jikiida, jichamsima; angu jichaida kula nakesho, nadime hata nakio; nenyo mchalemwa ni kumanya shekeria yaro ijo ikabo jeobosha kumchea.

ISAYA 7:17

“BWANA uchareda mzuri wa Ashuru ukuredie wasi oho, na wandu wako, na kivalwa chose cha kiwuzuri, jingi kuseghuwonie kufuma ituku Israeli orekutanyireghe na Juda.

JEREMIA 12:9

Welee, wandu wapo waawuya sa nyonyi ya virapa eja nyama? Welee, nyonyi reja nyama raaimaria chia rose kulwa nayo? Ghendenyi mkwanye nyamandu rose ra isakenyi riche karamunyi na kuja.

JEREMIA 25:1

Mwaka ghwa kana ghwa kubonya nguma kwake Jehoiakimu mwana wa Josia mzuri wa Juda, (nagho ni mwaka ghwa imbiri ghwa kubonya nguma kwake Nebukadnezari mzuri wa Babuloni), BWANA oreghorieghe nani aighu ya wandu wose wa Juda;

JEREMIA 25:9

ola nichaduma malagho kwa mbari rose rikaiagha cha kaskazinyi, na kwa mdumiki wapo Nebukadnezari mzuri wa Babuloni, wipate kucha na kulwa na wandu wikaiagha iji isanga; na wandu wose wikaiagha mbai mbai yaro. Nani nichawitotesha putu na kuwibonya kilambo cheobosha kusholelwa, wikaie winonekie kwa kala na kala.

JEREMIA 26:20

(Korekoghe na mndumu orefunyireghe wulodi kwa irina ja BWANA, uwangwaghwa Uria mwana wa Shemaia ufumie Kiriath-jearimu. Orefunyireghe wulodi aighu ya ughu muzi na aighu ya iji isanga kwa malagho ghifwanane na agha gha Jeremia.

JEREMIA 26:6

nichaibonya Hekalu ihi iwuye sa Shilo; na mbari rose ra ndoenyi wichatumia irina ja ughu muzi sa kilambo chiwadilo ni njowe.’”

JEREMIA 32:28

Ola nichaghungira ughu muzi mikonunyi kwa Wababuloni na kwa Nebukadnezari mzuri wa Babuloni, nao uchaghuwada.

JEREMIA 35:11

Ela iji Nebukadnezari mzuri wa Babuloni orechieghe kulwa na iji isanga, dereghambieghe, ‘Choonyi dijoke Jerusalemu kwa wundu ghoobua ijeshi ja Wababuloni na ijeshi ja Wasiria.’ Kwa huwo dadakaia Jerusalemu.”

JEREMIA 52:28

Ughu nigho mtalo ghwa wandu weredwaloghe wunyika ni Nebukadnezari: Mwaka ghwa mfungade, Wayahudi elfu idadu na mirongo iwi na idadu;

KILILO CHA JEREMIA 1:17

“Naghorua mikonu yapo ngilomba wutesia, sipatire ungi onitesia. BWANA waniwangie wamaiza wifumie kula andu; wanibonyere karakara na kilambo chilue.

EZEKIELI 19:8

Niko mbari ra wandu wikadegha midegho kula andu, wikaghorua nyavu yawo aighu yake, ikawadwa andenyi ya kina chawo.

EZEKIELI 23:23

Wababuloni na Wakalidayo wose, Pekodi na Shoa na Koa chiaimweri na Waashuru wose; wandu wa irika wewasira bea, wabaa, na wabaa wa majeshi wose na masikari ghose ghijokagha farasi.

MIKA 3:12

Kwa huwo Sioni ichalimwa sa mbuwa, na Jerusalemu ichawuya kitungasi, na mghondi ghwa Hekalu ghuwuye msidu.

HABAKUKI 1:6

Nichareda Wababuloni, ija mbari ibirie, iangue kubonya malagho. Wadaghenda wurumwengunyi kose, kuwusa malalo ghiseko ghawo.