Gooti Yawel toro wuujuno sumaiyokwe aki aro kuudokaikono. “Duu'nono. Nuu yiuwi'nokai toga nomollogumwalmwalmonyugono. Toro toonyu guu yiuwi'nokai avla'bi tomuu guuge mujomwekovla'mwalmonyugono. Toro toonyu kwako Kenan akaru'no aikomgu nogumokamonyugono. Aki moro subuu'yamju me'no adagujumo su ton yere mimo'nodopure toga nuu gumi magugollu'mo'monyugono.” Kuudokaikono.
Hibruu 13:5 - Gooti Toolluro Yogalokwono5 Kevu nuugwiyo bwotonyo ki'nomallo'mo tovino nekullunumwalpiyo. Aki, Oo nuu noonyumwonyu kuto ivito pugai'aro neya ama'mo, kuudo nyau'mwalpiyo. Toro kuvi kuruv kemi kuto ivito me'no mwora'dupudo su tonyuno, Oo su ton nokwo'modeyo, kuudo to'no neya jaurogaulo. Su toro tovino Gooti tool aro adokaikono. “Nuu gumi magugollu'mo'monyugono. Aki gumi miyogwapimonyugono.” Adokaikono. Տես գլուխը |
Hibruu 13:5
46 Խաչաձեւ Հղումներ
Aki Jisasol aro kuudokaikono. “Kevu kuto ivito nuugwiyo bwotonyo tokwe biyoma'dupudo tousai kwako akavi nomollu'bworosumwalpiyo. Yiuwi'nokai kwako akavi wo'dupudo su tonyu kaiyako mollugolamo'mdupudogano. Namdo tooro youro tonyu modokuuronopiyopi aki yiuwi'nokai noonyumwonyu aiyon tokwe sakwollungiko tonyu sallukwako tov kaiyako mollugolamo'mdowodorogano. Aki kuuko tooro pwo'dolomokaulapi yiuwi'nokai kwako akavida'ai wo'dupudo su tonyu kuuko kuuloma'dupudorogano.
“Toro tovino tov nuu aro ikudumo'mokwono. Kevu kemoro kulako tovuro aiyo yomwallo'moneyokwe tonyuno kuudo kwolallo nyourukwapimwalpiyo. Kevu kuudo kwolallo yourukwapiyopi aro adupi tov, Oo nuvu buro'nyo wosamujuko ton numwalmonyudukono? Aki buro'nyo wonyo ton numwalmonyudukono? Aki burowo'nyo youro tousogai moro kulako tovi mollosumwalmonyudukono? Kevu su toro tonyuno kuudo kwolallo nyourukwapimwalpiyo. Su tov aro tovinokwono. Gumoro kulako tovuro aiyo yomwalodowodo tov wosamujuko nonyo'mo tobuurai uuwolo'mdowodokwono. Aki gumoro kulako tov youro yeso'mo tobuurai uuwolo'mdowodokwono.
Toro tovino tov kevu lukomgu supto ipino tonyuno kuudo kwolallo miyourukwapipinono. Lukomgu me'no abai'mowo'ji toga iruko su tollugwojuro tagunyo mokabodowo'jure tonyuno kuudo nyourukwapipinogaikikono. Su tov aro tovinokwono. Yiuwi'nokai iruko go'no go'nodo tollovo kemi tabunyuwuulo ton kurukwe mokabodupudogano. Toro te tagunyo yere mabai'mo'mdopure tonyuno kevu kuudo kwolallo miyourukwapipinono.”
Aki a'mwo mollurogudo pworo aro kuudoganoporogano. “Nevu kwonol kuruv adado yanonoldukono?” Toro kuudoganopo toorai Joonol aro kuudokaikono. “Kevu nuugwiyo ki'nomallo'moneyokwe a'mwo abolo pubuurai luko nyuro'gwolmwalpiyo. Aki kevu nuugwiyo ki'nomallo'moneyokwe guureji aro nodumuurolo'mwalpiyo. “Oo kevu nuugwiyo manekubipi tov kemino kuunano nomojokuu'naikubweyanogaikikono.” Kevu su toro tomgu'aro nodumuurolo'mwalpiyo. Aki toro toorekul kemi womdo yodupudo tovida'ai nuugwiyo ikubiyodopure tovi amapi toga nuugwiyo pugai'aro youllomallo'moneyokwe kuudo kwolallo nyourukwapimwalpiyo. Toro kworekul kuruv nuugwiyo amapi su tonyuno ilaiyo to'no neya jubwosunogaulo.” Kuudokaikono.
Aki wit sulo pun aulewomdo tomuu abwolorapo su tov a'mwo abolo punyuno'busukogano. A'mwo abolo su ton Gooti toolluro yogalo tovi wuu'nodupudogano. Toro wuu'nodupudo kun kuruv yomjomwekovla'mdupudo toga kwako akavida'ai kuto ivito tonyu mallo'mo kuudo tokwe'aro kuto ivito bwotonyagokwe imo'nyo'mo kuudo tokwe'aro kemoro kwa'mgu kulako tonyu ilaiyo igollunyo'mo kuudo togai'aro yiuwi'nokai su ton Gooti toolluro yogalo tovi bu'duvoloma'dupudogano. Toro bu'duvoloma'dowo'jure tovida'ai jurogudo imo'nyo'mo tov ku'nono mimo'nodupudogano. Aki toro ton sulo mai'nodupudogano.
A'mwo abolo su tonyuro poowokalago tovi kemi kirovanyuvanyu go'no go'no yo'moneyokwe ton aiyowomno aullo'mowopiyajukogano. Toro kuullu'mowopiyoduke tovida'ai aro sajupogano. Ma'no ma'no yodupu kwanyu sumdo kinuwiyodupu suroguudo yau'dupu kwekuullu kuudo yau'dupu aki pworai yiuno'no aromiyosajupogano. Yodupu aki molo inodupu kuunano yogalo youkuu'nuudodupu magu'nyo kuudo yau'dupu aki a'mwo abolo punyu bwolomorumwogapiyo'moneyokwe yogalo ajajupogano.
Toro kuvi kuruv moro kuuguudo sokwollekwopiyabo su tovino kavlo tov arokwono. A'mwo abolo pun kevnokwe tonyuno aro dodupudogano. “Oo nevu Jisasolluno kuudo kuubwemwakuuwono.” Toro dodupudo kun kuruv kwonyalo yodopureyo'mdeyo oo kwanyu sumdo kinuwiyodopureyo'mdeyo oo kuunano gooti toorai ilomoropiyodopureyo'mdeyo oo magu'nyo imo'nodopureyo'mdeyo oo imo'wonyo bwotonyo nopi amomo yodopureyo'mdeyo oo a'mwo abolo punyuro kuto ivito ki'noma'dopureyo'mdeyo su toro yodopure togai kevu ibwoto'nyo nyomwalmwalpiyo. Aki su toro togai kevu wosamujuko kuruv avalo toru manomwalpinono.
kuuko yodupudorodeyo oo noonyumwonyu punyuno kwanyu sumdo kinuwiyodupudorodeyo oo imo'wonyo bwotonyo nopi amomo yodupudorodeyo oo magu'nyo yodupudorodeyo oo noonyumwonyu a'mwo punyuro kuto ivito ki'noma'dupudorodeyo yiuwi'nokai su toro mujumovla'mdupudo tooro aguto kig Gooti toolluro mido mollomwalo tovi anakuuto tomuu ku'nono maulomwalpinorogano.
Aki kevu Gooti toolluro a'mwo abolo kuunodo me'no wimo'nodupudo togaikulluno tov kaiya'no pasudo akarai nomjumovla'mwalpiyo. Kwonyalo yo'mo toorogai'aro kemi kulako tokwe kaiyako igolamo'nyo'mo pasudo toorogai'aro kwanyu sumdo kinuwiyo'moneyokwe toorogai'aro ma'no ma'no pasudo su toorai kemida'ai pwolnodo kwol kuruv nyumwalo'jo.
Kevu kuudo neya jaullulo. A'mwo pwol kwonyalo yodowodoldeyo oo kaiyako igolamo'nodowodoldeyo oo kwanyu sumdo kinuwiyodowodoldeyo pasudo su toorai yodowodo tool Gooti tooke'aro Krais tooke'aro tooralluro aguto kig mido mollomwalo tomuu ku'nono maulomwalonekono. A'mwo abolo kwanyu sumdo kinuwiyodupudo ton kwako akavida'ai noonyumwonyu pun kemi kuunano gooti pwollubusuko ilomoropiyodapudogano.
Toro te kevu kwako akavida'ai pasudo kuuno kuulaikwo'dupudo toorai neya joromiyosogaulo. Kwonyalo pasudo toorogai'aro kaiyako igolamo'nyo'mo toorogai'aro kwanyu sumdo kinuwiyo'mo toorogai'aro aki kirovanyuvanyu kiroungovlaiyo'mo kuudo toorogai'aro su toorai kevu manyu tomuu'aro neya domwalogaulo. Aki a'mwo pwolluro noonyumwonyu tonyuno magwesumdo kuruv nenuwimwalpiyo. Su tov aro tovinokwono. Guu a'mwo pwolluro kwako akavida'ai noonyumwonyu tonyuno magwesumdo ainuwibi su tov noonyumwonyu su ton gumi kuunano gooti toorobusuko gujumo'nopi kworai ilomoropiyabinekugono.
A'mwo kuunano ibwasokwe su tooro kemi sumdo togai kwonyalabolo punyu yo'mgonomallo'mo guureji ya'mgonodupudorogano. Aki su tooro aro to'busukorogano. A'mwo sumwoluko manyuto'nodowodo pwol yiuwi'nokai toga wosamujuko tov guureji nugovlaiyo'mo winodowodekono. Toro toolbusuko kubalno a'mwo su tooro ma'no ma'no pasudo tonyuno yiuwi'nokai toga nonyuto'nugovlaiyo'moneyokwe guureji winodupudorogano. Aki a'mwo su tooro a'mwo abolo pubuurai ki'nomallokwerogano. A'mwo abolo su tobuuro Gooti toolluno kuudo me'no uubweyodupudo kuvi kuruv guureji magudupola'dupudogano. Toro magudupola'dupudo tobuurai ma'no ma'no ipureyokweyo'mo a'mwo kuunano ibwasokwe su tooro ki'nomallokwerogano. Aki a'mwo kuunano ibwasokwe su tooravuro poowokalago tonyu nuugwiyo bwotonyago ki'nomallo'mo kuudo tov kuullo'mowopiyodowodokwono. A'mwo su tooro Gooti toolluro tabunyuwuulo nuubweyono tovi dolago tomuu me'no mwalodupudorogano.
A'mwo kuunano ibwasokwe su tooro nuugwiyo bwotonyago tonyu ki'nomallo'mo guureji winyokwerogano. Toro tooro kemoro nuugwiyo tonyu ki'nekumallo'moneyokwe kuunano yogalo togai yekubwasupinorogano. Gooti tool kooti yogalo tovi mollomwalokwekono. Toro tool a'mwo kuunano ibwasokwe su toorai nerumwallo'moneyokwe tovino aiyoga me'no adomdukuurosokaikono. Toro te kuunano ibwasokwe su toorai kaiyako nomollounapiyono tool sa mwollokwekono. Toro kwol kuruv a'mwo su toorai lukomgu nerumwallono tovino yiuwi'nokai toga sogwollo to'no kinyokwekono.
Oo Gooti tool a'mwo su toorai kirumwallo'moneyokwe tabunyuwuulo bwotonyo tov nuubweyonorogano. Toro uubweyono tovino kavlo tov arokwono. A'mwo su tooravuro pasudo tov aiyoga Kenolluro pasudo amjumovlaiyajuko to'busuko kubalno aval'no mujumovla'mdupudorogano. Aki toro tooro nuugwiyo ki'nomallo'moneyokwe aiyoga Balamolluro kaiya'no pasudo sajuko to'busuko kubalno kaiya'no pasudo yiuno aval'nodo tonyu guureji mujumovla'mdupudorogano. Aki aiyoga Koora'weke'aro a'mwo pworogai'aro tooro kisuvolo wiyodopure toorai Gooti tool aromiyebuuropiyokarogano. A'mwo su toorai kwimo'noka to'busuko kubalno Gooti tool a'mwo kuunano ibwasokwe kworai kuruv aval'no noromiyebuuropiyonorogano.
Գովազդներ