Hibruu 12:25 - Gooti Toolluro Yogalokwono

²⁵ Kevnokwe togaikul wako neya dou'nogaulo. Gooti tool kemi yogalo ikudodowo'jure toollu kisuvolo to'no nuuwimwalpiyo. Neya duu'nyulo. Aiyoga kwako akavi Moosesol Gooti toolluro duudapi yogalo tokwe moruudoduke tovi Isuraiyolda'ai a'mwo abolo ton kisuvolo kwiyajupo toga kuudo wuuteyo'moneyokwe tovida'ai mabirolo'nugolokwiyajupogano. Gooti tool Moosesollu uuwolo'mdowodekono. Toro te aga kuga kuruv Gooti tool gami ago muunyu kai'muuda'ai duudapi yogalo nekudodowo'jure tovi nevu kisuvolo kwiya'ji tov muunyu toru'aro guureji kuudo nonekuuteyonekono. Toro tovida'ai ne kunol kuruv ku'nono mabirolo'nugolokwanonogano. Toro te nevu Gooti toolluro yogalo nekudodowo'jure tovi kisuvolo nuuwiya'jo.

Hibruu 12:25 Խաչաձեւ Հղումներ

Mollurolovomato 16:29

Nuu Gooti Yawel Sabat aikullabo toonyuno tov yiuwi'nokai iruko naba 6 tollugwoji wosamujuko ton iruko pullal nonomwallo'mo toru'aro ikullamwalmonyugono. Toro te iruko naba 7 tollugwojuno'gwowi kemi agwapto toru nokwo mwalopi pwolnodo kwol kuruv mabolokuumwalpinogaikikono. Kev togaikul nuu Sabat aikullabo toonyuno kuudo nyallulo'gwonpiyokweyo'mo su toro ikubwemwalmonyugono.” Gooti Yawel toro kuudokaikono.

Mollurolovomato 20:22

Toruda'ai Gooti Yawel Moosesollu kuudokaikono. “Guu Isuraiyolda'ai a'mwo abolo tonyu aro duudono. “Moro yogaimaguurai tov muunyu kai'muuda'ai wolodekwopiyabodore tovi kevnokwe togaikul me'no au'na'mapogaikikono.

Matyuu 17:5

Pital toro wuudoduke toga sulu'wo bako awopingikokwe puruv Jisasollu abwolobu'duvolomarokakwono. Sulu'wo abwolobu'duvolomaroka su tovi anakuuto tomuuda'ai yogaimaguurai puruv alokabokakwono. Toro tov aro adokakwono. “Akal moro Kwolaiyo kalo buuropino nyunodowodo tookono. Toro toolluno ilaiyo kuunodo anyunumaiyoo. Gamoro yogalo dodowo'jure tonyu kevu neya duu'nogaulo.” Adokakwono.

Matyuu 8:4

Toro ikulno sumaiyokwe Jisasol a'mwo su toollu aro amodapiyokaikono. “Guu moro agujukulmo tovino a'mwo pworai muudubinekugono. Toro kweku kuruv moro agujukulmo su tovino wuuduuwallo'mo tooku aro neya ibinekugono. Guu Moosesolluro puukwollo aro sakwolloka tovi neya duumjunono. A'mwo wonawiyo nobollokwe me'no sukullungiko tool pris toollomno plawo'ji wuuduuwallunonekono. Toro wuuduuwallunowo'ji toga Gooti toollu wiyo'moneyokwe dokato pworallu neya romiroudapiyonekono. Moosesolluro su toro sakwollungiko tov guu kuvinono neya ibinekugono. Toro yodo'bure toga pris tool gwonowo'ji gumino aro kuudo yaguuronekono. Oo a'mwo akal wonawiyo nobollomaiyoldeyo. Kuudo yaguuronekono. Toro te guu su toro tovino'mo dovlavono.” Jisasol a'mwo wonawiyo nobollokwe sukuloka toollu su toro amodapiyokaikono.

Kuurotokwe 7:35

Mooses su tool aiyoga Isuraiyolda'ai a'mwo abolo tonyu wiyo'mwojo'mo yoduke kwollu kuruv kisuvolo kwiyopogano. Toro wino sumaveyokwe aro kuudopogano. “Guu tooku nemi mido mollonekumwalo'bi kooti yogalo danekullo'mo su tov ala'mwolluro ajagubweyoka tovida'ai nekullumo'nubino'mekudeyo?” Kuudopogano. Isuraiyolda'ai ton kisuvolo toro kwiyopo kuvi kuruv a'mwo abolo su tonyu mido mollomwalowo'ji aki Ijupda'ai bomollurolovomokalokwiyo'moneyokwe tov Moosesol kwekono. Su tool Gooti toolluro me'no ajesungikekono. Toro toollomno Gooti tool gamoro ensel pwollu amoruuwopiyabokaikono. Ensel su tool i'jurako widuko bomjonugeloduke tovi'aro kwiyalo'nokaikono.

1 Tesaloonaika 5:15

Kemida'ai pugaikul Jisasolluro a'mwo abolo kaiya'no saikullugolpi tonyu kevu mido mallo'moneyokwe kaiyako nyugolpiyo. Toro kugaikul kuruv yiuwi'nokai toga kevuge avalo Jisasolluro a'mwo abolo su tobuurogai imgu amgu ilaiyo neya jungovlavogaulo. Aki yiuwi'nokai a'mwo abolo kwa'mguda'ai kunyu kuruv aval'no su toro neya jugolmovlavogaulo.

2 Timooti 4:4

Aki su toro toga a'mwo abolo ton kuuguudo nebal'nodo tovi wuu'nyo'mo mwinopi yiuno buulo to'no uugunyumopimwalpinogano. Aki toro ton kemi jupweyo kuuguudo toorai wuu'nyo'moneyokwe kinamjumwalpinogano.

Hibruu 1:1

Aiyoga Gooti tool nemi nellukweyago toorai gamoro yogalo tov proofet toorai'aro kuujajukekono. Toro tool bwotonyago toga judo'no judo'nodo tomgu'aro kuujajukekono.

Hibruu 11:7

Aki aiyoga Noowal Gooti toolluno kuudo kuubweyajukekono. Noowal Gooti toolluro lukomgu nyumo'nupino tonyuno duudapi yogalo wiyoduke tonyu kaduko kwiyokaikono. Toro wino sumaiyokwe Gooti toollu dolago tomuu amwallajukekono. Toro tool gami julkwolaiyo togai'aro tonumdotai buuru'allako tovida'ai kaiyako nomapiyokwe sip pwollu amodokaikono. Noowalluro su toro soka tovino tov yiuwi'nokai kwako akavida'ai a'mwo abolo Gooti toollu kuudo muubweyodupudo tobuurai kuu'maiyo aro kuuduuwallokaikono. Kevu kemi kirumwallo tov nomapinogaikikono. Aki yiuwi'nokai a'mwo abolo Gooti toollu kuudo kuubwepi tono'gwowi gamoro sumdo tovi sugudo wimo'nupinogano. Su toro to'busuko kubalno Noowal kwol kuruv Gooti toollu kuudo kuubweyoka tovi'aro Gooti toolluro sumdo tovi sugudo kwimo'nokaikono.

Hibruu 12:19

Aki biugel tov guureji kirapiyoduke tovi au'naropogano. Su toro toga Gooti tool Isuraiyolda'ai a'mwo abolo tonyu kuuguudo wuudoduke tovi kuu'nopogano. Toro wuu'nyuno sumaveyokwe Isuraiyolda'ai a'mwo abolo su ton Gooti toollu duumjukullo'moneyokwe Moosesollu guureji kuudoganopogano.

Hibruu 3:12

Toro te miyobuuravoo, kevu wako neya dou'nogaulo. Kevnokweyogaikulluro poowokalago ton kirovanyuvanyu kuudo tooro noullo'movaikwopimwalpiyo. Aki kemoro poowokalago su togai Gooti toolluno kuudo uubweyodupudo tovi nomolluduvolmwalpiyo. Aki kemoro poowokalago su ton Gooti aiyokwe toollu buulo uugunyumopiyo'moneyokwe nomollubworekumokavla'mwalpiyo.

Hibruu 3:17

Aki a'mwo abolo su ton Gooti toollu surodo i'gwolno i'gwolno yo'mno 40-pela kworomo tobuul kuuwolo'nokagano. A'mwo abolo ma'no ma'no pasudo sajupo su tonyuro kulako bwiyo ton kwako a'mwomaiyo yalukullo toru kwollajupogano.

Hibruu 8:5

Pris su tooro Gooti toollu ilomoropiyo'moneyokwe ago tovi womdo mujumovla'mdupudorogano. Toro kuvi kuruv kwako akavida'ai ago su tov Gooti toolluro ago muunyu kai'muuda'ai kuunodo tovino duuwallo'moneyokweyokwono. Aki kwako akavida'ai ago su tov muunyu kai'muuda'ai ago kuunodo tovuro wakuunonabolo to'busukokwono. Kuudo neya jaullulo. Moosesol Gooti toollu ilomoropiyo'moneyokwe sel ago tovi mojo'mo yoduke toga Gooti tool duudapi yogalo aro kuudokaikono. “Duu'nono. Muumuudo toollu muunyu toru nuu gumi me'no aguduuwallo tomgu'aro to'no uumjuno'bi yiuwi'nokai tonyu neya domodono.” Kuudokaikono.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

Adodolukuu'nosungiko 19:10

Ensel toro anyudoka toollu ilomoropiyo'moneyokwe nuu gamoro suvlo dolago tomuu kwolomuulo'naronyugono. Toro wolomuulo'na'dore kuvi kuruv ensel su tool aro anyudokaikono. “Guu mino milomonuwopiyabinono. Nuu kwonyu kuruv guvuge'aro gumoro avaiwomdokwe tekwojogai'aro toorekulbusuko Gooti toolluro womdo tovi aval'no wiyodumdekwonyugono. Gumoro avaiwomdokwe su tooro Jisasolluro yogalo kuu'maiyo toru'no me'no adodoluwosajuko su tovi gudupola'dupudorogano. Toro te kevu yiuwi'nokai toorekul yiuno Gooti toolluno to'no neya julomoropiyogaulo.” Su tov aro tovinokwono. Proofet yogalo tonyuro womdo aguto tov Jisasolluno kuu'maiyo neya adodoluwosopureyokwe tovinokwono.

Adodolukuu'nosungiko 22:9

Toro kuvi kuruv ensel su tool aro anyudokaikono. “Guu mino milomonuwopiyabinono. Nuu kwonyu kuruv guvubusuko Gooti toolluro womdokwe pwekwonyugono. Guvuge avalo proofet toorogai'aro aki yiuwi'nokai a'mwo abolo buukiyo akavida'ai kuuguudo wo'dupudo tonyu uumjunyokwe togai'aro yiuwi'nokai su togaikulbusuko nuu Gooti toolluro womdokwe tekwonyugono. Toro kuvi kuruv Gooti toolluno'gwowi guu neya julomoropiyogawono.” Anyudokaikono.