Adodolukuu'nosungiko 1:4 - Gooti Toolluro Yogalokwono4 Nuvu Joononyu kevu kwako Esiya tomuuda'ai Jisasolluro 7-pela mollu'bwoto go'no go'nodo togaikullu pas akav sokwollekwopiyamono. Toro togaikulluno nuvu aro nyunodowodonyugono. Gooti tool gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo ikubwemwalonekono. Agasuro Gooti mwalodowodo su tool aiyoga amjomwekelabiyajukekono. Aki lukomgu kuga kuruv kuuno mujomwekovla'mwalonekono. Aki Gooti toolluro Kuullo kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo aikubweyogawono. Gooti toolluro Kuullo su tool 7-pela kuullo toorobusuko imo'nodowodekono. Toro tool Gooti toolluro sia kig tovi sumdollu toru ilomwalodowodekono. Տես գլուխը |
Adodolukuu'nosungiko 1:4
41 Խաչաձեւ Հղումներ
Gooti Yawelluro Kuullo tool a'mwo su toollu bwolmwalowo'ji pi'mwo kuudo tov uubweyonekono. Toro uubweyodowo'jure tokwe jurogudo imo'nowo'ji a'mwo abolo tonyu ilaiyo to'no mido mollomwalmwalonekono. Toro tool Gooti Yawelluro ilaiyo winodowo'jure tonyuno kuudo you'movla'mwalonekono. Aki toro tool Gooti Yawellu dolago tomuu mwalowo'ji kwolluno ilomoropi imwolawonekono.
Gooti Yawel aro adokaikono. “Juuda towai wagwolago bwotonyo ton wo'dupudorukono. Toro kuvi kuruv wagwolago puru'gwowi ajumiyo Efrata towai wo'dowodo tovino yovo tov Betelemovokwono. Wagwolago su tov kula'nyo kuvi kuruv yovo agutokwe imo'nonokwono. Toro tov aro tovinokwono. Isuraiyolda'ai tonyu mido mollomwallo'moneyokwe a'mwo aguto pwol wagwolago su to kuvida'ai bwonekono. A'mwo su tool toro bwono kuvi kuruv Ganumiyago toolno'gwowi wagwolago su toruda'aiyolmaiyo. Toro kwol kuruv aiyoga kuunodo togasuro amjomwekobiyajukekono. Toro te a'mwo aguto imo'nono su tool aiyogasuro amjomwekobiyajuko su to kwollurekono.”
Nevu akaru abumwakuuwo toonol kantri go'no go'no tomuuda'ai abumwakuuwono. Toro toonol kantri aro tomuuda'ai abumwakuuwono. Pwonol kantri Patiyada'aiyonogano. Pwonol kantri Midida'aiyonogano. Aki pwonol kantri Elamda'aiyonogano. Aki pwonol kwako Mesoopootemiyake Juudiyake tomuuda'aiyonogano. Aki pwonol proovins Kapadoosiyake proovins Poontoseke proovins Esiyake tomuuda'aiyonogano.
Gooti tool kevu Roomda'ai togaikulluno kalo buuropino wino'no gamoro a'mwo abolo kuunodo wimo'nyo'moneyokwe me'no adekumarokagaikikono. Toro te nuugebuuravoo, nuu kemi pas akav yakwollodum aro ikudumo'monyugono. Gooti toolluro yasuwa'wino sugumaluko ton nekubwemwalonekono. Nemi Nellunumiyago Gooti tooke'aro Aguto Jisas Kraiseke'aro tooralluda'ai yasuwa'wino sugumaluko su ton kuvinono noma'mwalpinogaikikono. Toro amapi tovida'ai kemoro sumwoluko ton kavo wosopi ilaiyo nokwo yomjomwekovla'mwalpinobuurekikono.
Yiuwi'nokai sugudo ma'dowado togai'aro yasuwa'wino sugumaluko ma'dowado togai'aro ton nemi Nellunumiyago Gooti tool muunyu kai'muuda'ai wolomonekwopiyabodowodogano. Nemi Nellunumiyago su tool kuujo tooke'aro lobako tooke'aro sullugabwo togai'aro yiuwi'nokai bakokwe su tonyu sokwollosokaikono. Gooti sokwollosoka su tool wakuunonabolo to'busuko pumgu'aro mamoropiyodowodekono. Toro kwol kuruv yiuno aval'no imo'nyokwekono.
Kuuguudo akav sumdomgu yiulo yogalo sumo'nyajuko kuvi kuruv lukomguno'gwowi Jisas Kraisol kuu'maiyo toru'no me'no adodolukuurosokakwono. Kuuguudo su tov noonyumwonyu pun wobo toga nyumo'nupino tonyunokwono. Toro te Gooti tool kuuguudo su tov malluno sumaiyokwe Jisasollu kwiyokaikono. Jisasol gamoro a'mwo abolo womdokwe tonyu kuu'maiyo toru'no wuuduuwallo'moneyokwe kuuguudo su tov gami ensel pwollu kwiyokaikono. Toro te ensel su tool kuuguudo tokwe mokabino sumaiyokwe nuvu Jisasolluro ki'nato womdokwe pwekwonyu anyabokaikono. Mino yovo tov Joonolonyugono.
Yogaimaguurai su tov aro adokakwono. “Guu yiuwi'nokai kwonbi tonyuno puukwollo yakwollo'bi Jisasolluro 7-pela mollu'bwoto ton wagwolago go'no go'no wo'dupudo tonyomno duuwapiyono. Mollu'bwoto su tonyuno yovo tov arogano. Efesosokwe Sumenakwe Pegamomokwe Taitairokwe Sadisokwe Filadelfiyakwe Leyadisiyakwe togano.” Yogaimaguurai tov toro adokakwono.
Aki guu sumdo me'no kwonmado tovuro kavlo kuruv puukwollo neya jakwollono. Moro anato tovi 7-pela sullugabwo amworako tokwe'aro gool tovida'ai 7-pela gworeko gudupolallo'moneyokwe tokwe'aro tovalluno kavlo tov arokwono. Moro anato tovida'ai 7-pela sullugabwo amworako su tobuul 7-pela a'mwono moduvomwallokwe tooraino'busukogano. Su tooro ensel pworobusuko moro 7-pela mollu'bwoto tonyu moduvomwalodupudorogano. Aki 7-pela gworeko gudupolallo'moneyokwe su ton moro 7-pela mollu'bwoto go'no go'nodo tonyuno'busukogano.”
Gooti Aguto tool aga kuuno mujomwekovlaiyokwekono. Aki toro tool yiuwi'nokai aiyoga toga amjomwekelabiyajukekono. Aki toro tool lukomgu kuga kuruv yiunokuudo nomjomwekovla'mwalonekono. Aki Gooti su tool Jurogudo Kuunodekono. Toro tool aro dodowodekono. “Nuvu Muudu'no Kuunodolenyugono. Aki toro toonyu Aiyowo'mo Kuunodolenyugono.” Dodowodekono.
Nuvu Joononyu kemi telludai'yago toonyubusuko ikullumo'nodumdonyugono. Toro te nuu toonyuge'aro kevuge'aro nevu yiuwi'nokai tonol Jisasollu aval'no me'no kuuguro'mwonyowonogano. Aki aguto kig Gooti toolluro mido mollomwalo tovi dolago tomuu nevu yiuwi'nokai tonol aval'no me'no kuulomwalodowadonogano. Aki a'mwo abolo pun kaiyako yanekullugolodopure tovida'ai nevu yiuwi'nokai tonol danyu'nyuwuulo aval'no ibwosunodowadonogano. Toro ibwosunodowado kuvi kuruv nemi Gooti toollu muugollu'mo'mdowadonogano. Aki toro toollu guureji to'no gudupola'dowadonogano. Nuu Gooti toolluro yogalo tokwe'aro Jisasolluno nebal'no kuuguudo tokwe'aro tovake moruudomollodore tovino tov aku'momdo akawai ameranubweyoponyugono. Aku'momdo akavino yovo tov Patimoosovokwono.
Toro imo'nyuno sumaveyokwe nuu ensel pwol yiuwi'nokai wonyo tonyu mollomwalodowodo toollu kwononyugono. Toro toolluro deko tov aro doduke tovi kuu'nonyugono. “Oo Gooti sugumaluko to'nodo tooku aiyoga yiuwi'nokai toga amjomwekelabiyajudekugono. Toro tooku aga kuga kuruv kuuno mujomwekovla'mdumdekugono. Guu a'mwo abolo kaiya'no kuumwiyo tonyu kirumwallo'moneyokwe tabunyuwuulo amorapimado su tov yiuno sugudo to'no sumodekugono.
“Aki guu pas akavi wagwolago Taitairoda'ai Jisasolluro mollu'bwoto tovuro ensel moduvomwallokwe toollu aro jokwollapiyono. Kuuguudo akav nuu Gooti toolluro Kwolaiyo toonyurokwono. Numoro sumdo toval widuko to'busuko guureji pwopiyodubulovakono. Aki moro suvlo toval aiyon sallukwa'jo ailogullumowopingiko tovida'ai yainyunyo to'busukovakono. Toro toonyu kuuguudo aro agudumono.
“Aki guu wagwolago Sumenada'ai Jisasolluro mollu'bwoto tovuro ensel moduvomwallokwe toollu pas akavi aro jokwollapiyono. Muudu'nodo tool nuu kwonyugono. Aki aiyowo'mo tool nuu kwonyugono. Toro toonyu me'no abolo kwonyu kuruv aga'no'gwowi aiyo aiko te mujomwekovla'mdumdonyugono. Toro toonyu kuuguudo tov aro agudumono.
Jisasol aro ikudodowodekono. “Nuu Jisasonyu moro ensel pwollu kemiyomno amekwopiyabonyugono. Ensel su tool kevu moro mollu'bwoto go'no go'nodo tobuurekullu kuuguudo akakwe kuu'maiyo toru dodoluvaikubweyo'moneyokwe amekwopiyabekono. Nuvnokwe toonyu a'mwo aguto kig Devitolluro iko tovasuda'ai sodolo to'busuko suruvonyugono. Aki nuu aguto kig Devitolluro jukweyago kwolaiyo toonyu gamoro aiko toru mallo'moneyokwenyugono. Aki nuu kabwo bako guureji pwopiyodowodo toolbusukonyugono.” Jisasol toro ikudodowodekono.
“Aki guu pas akavi wagwolago Sadisoda'ai Jisasolluro mollu'bwoto tovuro ensel moduvomwallokwe toollu aro jokwollapiyono. Kuuguudo akav amogwopiyamo toonyu 7-pela kuullo toorobusuko imo'nyokwe Gooti toolluro Kuullo su tool kuulonumwalodowodonyugono. Aki toro toonyu 7-pela sullugabwo tonyu mwora'dumdonyugono. Toro toonyu kuuguudo tov aro aikudumono. Nuu kemoro yiuwi'nokai pasudo yodupudo tonyuno kuudo nyau'mwakono. A'mwo abolo pun kemi yiuno kwa'mgu tomguno to'no ikwonopi aro dodupudogano. Oo a'mwo abolo akan aiyo mujomwekovla'mdupudogano. Su toro dodupudo kuvi kuruv moro sumdo tovino'gwowi kevu a'mwo abolo me'no abollungopo togaikulbusuko nyumo'nodupudogaikikono.
“Aki guu pas akavi wagwolago Leyadisiyada'ai Jisasolluro mollu'bwoto tovuro ensel moduvomwallokwe toollu aro jokwollapiyono. Nuu Gooti toolluro subuu'yamju tonyu suuwiyo imwojodumdonyugono. Subuu'yamju su tonyuno, “Nebal'nodogano,” dodumdonyugono. Toro toonyu Gooti toolluro yogalo tovino kuu'maiyo toru bomollolupto'noso'moneyokwe nebal'no yogalo togai pi'mwono dodoluwosokwenyugono. Gooti tool yiuwi'nokai kwako tokwe sulugumdo tokwe toval sokwollosoka su tov yiuno mi'aro to'no sokwollosokagano. Su toro toonyu kuuguudo tov aro agudumono.
“Aki guu pas akavi wagwolago Filadelfiyada'ai Jisasolluro mollu'bwoto tovuro ensel moduvomwallokwe toollu aro jokwollapiyono. Nuu yiuno sugudo to'no yodumdonyugono. Aki nebal'no yogalo to'no dodumdonyugono. Toro toonyu aiyoga a'mwo aguto kig Devitol gamoro mido mollomwalo tomuu kuulomwallo'moneyokwe ki tovi amworallajuko to'busuko kubalno nuu aguto kig toonyuro mido mollomwalo tomuu kuulomwallo'moneyokwe ki tovi mwora'dumdonyugono. Toro toonyu kudo'aiko ausosumi tovi a'mwo pwolnodo kwol kuruv ku'nono mamallukuronekono. Aki toro toonyu kudo'aiko me'no amollukurosumi su tovi a'mwo pwolnodo kwol kuruv ku'nono mausonekono.
Aki sia kig su tovida'ai molamopto tov amdolopiyajukokwono. Aki kuuloulo kuruv ai'nugolokabiyajukokwono. Aki sia kig su tovi sumdollu toru 7-pela gworeko gudupolallo'moneyokwe pun widuko nodupudogano. Gworeko gudupolallo'moneyokwe su ton 7-pela kuullo toorobusuko imo'nyokwe Gooti toolluro Kuullo su toolluno duuwallo'mogano.
Yiuwi'nokai aiyokwe aral aral su tooro 6-pela puviyo go'no go'nodo ton kurukwerogano. Aki toro tooravuro puviyo tonyu imgu amgu sumdo bwotonyago tooro aiyowomno so'mowopingoporogano. Toro tooro iruko togake'aro surakuuto togake'aro yiuwi'nokai toga aro mujodomwekovla'mdupudorogano. “Sugudoloo, Sugudoloo, Sugudoloo, Aguto Gooti su tool Jurogudo Kuunodekono. Toro tool yiuwi'nokai aiyoga amjomwekelabiyajuko su tool aga kuga kuruv kuuno mujomwekovla'mdowodekono. Aki yiuwi'nokai lukomgu kuga kuruv yiunokuudo mujomwekovla'mwalonekono.” Su toro mujodomwekovla'mdupudorogano.
Aki nuu Sipsip Muugunyo pwol me'no aromiyosungiko toolbusuko pwollu kwononyugono. Toro tool sia kig toruke'aro aiyokwe aral aral tooro mwalodupudo toruke'aro tonyu akuuto toru adavokaikono. Aki toro da'mduke toollu 24-pela a'mwono moduvomwallokwe tooro aiyowomno amomwodovomaropekono. Aki Sipsip Muugunyo su tool 7-pela koomwo toorogai'aro aki 7-pela sumdo toorogai'aro kurukwekono. 7-pela sumdo su tooro 7-pela kuullo toorobusuko imo'nyokwe Gooti toolluro Kuullo toolluno duuwallo'moneyokweyorogano. Gooti tool gami Kuullo su toollu yiuwi'nokai kwako akavuro go'no go'nodo tomuuno amorapiyokaikono.
Գովազդներ