Toro tool a'mwo aguto kig Devitolluro aiko toru marowo'ji a'mwo abolo tonyu yiunokuudo mido mollomwalmwalonekono. Aguto kig sumo'no'ji su tool yiuno sugudo to'no yomjomwekovlavowo'ji gamoro mido mollomwalo tov yiuno pi'mwono yomollomokavla'mwalonekono. Aki toro toolluro mido mollomwalo tov yiuwi'nokai toga jurogudo imo'nugovla'mwalonokwono. Toro imo'nugovla'mdowo'jure toga a'mwo abolo ton molo mingovlavopi kuvi kuruv kavo to'no mujomwekovla'mwalpinogano. Gooti Yawel Jurogudo Kuunodokwe tool gami a'mwo abolo tonyuno kalo buuropino winodowodo toolluro yodowo'jure tovida'ai yiuwi'nokai su ton kuvinono imo'nupinogano.
2 Pita 1:11 - Gooti Toolluro Yogalokwono11 Aki aguto kig Jisas Kraisolluro mido mollomwalo tovi anakuuto tomuu kuulomwallo'moneyokwe kudo'aiko me'no kuusaikubweyodowodekono. Gamoro mido mollomwalo su tov yiunokuudo mujo'movla'mwalonokwono. Toro tovi kuulomwalodopure toga Gooti tool kemino ilaiyo bwotonyo nomollekumaronekono. Krais Jisas su tool nemi Agutekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono. Տես գլուխը |
2 Pita 1:11
23 Խաչաձեւ Հղումներ
Su toro toga aguto kig toonyu a'mwo abolo anato tomgu amwalpi tonyu aro wuudumonyugono. “Oo moro Nyunumiyago toolluro sugudo pun ikubweyodowodogaikikono. Toro togaikul aguto kig mido mollomwalo tovida'ai sugudo ton kuvinono mapino'moneyokwe dobiloo.” Wuudumonyugono. Sugudo mapino su ton aiyoga kwako akavi muudu'no sokwollosoka togada'ai kemiyo'mo me'no sovrovaikubweyokagano.
Kuuko pwol abwo'ji tov yiuno kuuko'mo tokwe'aro noromiyoso'mo tokwe'aro kaiyako mollounapiyo'mo tokwe'aro tonyu yo'moneyokwe bodowodekono. Toro kuvi kuruv nuvno'gwowi a'mwo abolo ton aiyo yiunokuudo mujomwekovla'mwalpino tovi mapino'moneyokwe abonyugono. Aiyo mapino su tov aiyowomno kuullutovaikwopimwalonokwono.
Toro kuvi kuruv kevu neya duu'nyulo. Gooti sugudo ikubweyodowodo su tool yere nokwo amovaikugu'mwojowo'jujuko kwol kuruv kemi sogwollo to'no ikinodowodekono. Kevu kemi ma'no ma'nodo tonyuno buulo uugunyumopiyopi Gooti toollomno neya youragunyumo'nupureyokwe sogwollo to'no ikinodowodekono. Gooti tool kemi ilaiyo yaikullugolodowodo tovida'ai toro ikinodowodekono. Toro te kevu Gooti toolluro su toro ikullodowodo tovino kuudo yau'dupudorekuldukono?
Su toro toga kwako akavuro aiyowo'mo imo'nonogakono. Aki su toro toga Krais tool yiuwi'nokai kuullo ma'no ma'nodo mido mollomwalokwe toorogai'aro jurogudokwe toorogai'aro yovo agutokwe toorogai'aro yiuwi'nokai su toorai kaiyako nomollounapiyonekono. Su toro me'no mollounapiyowo'ji aiyowo'mo su toga aguto kig Krais tool gamoro mido mollomwalo tov gami Ganumiyago Gooti toollu nomorubweyonekono.
Nevu aro kuudo nyau'mwakuuwono. Nemoro kwako akavida'ai kulako tov sel ago to'busukokwono. Sel ago su tov awo'dolopiyo'ji tov Gooti tool kulako muuduko puruv nonekullabwonekono. Kulako muuduko su tov nemi ago muuduko to'busuko nonekullumo'nonokwono. Ago muuduko su tov kwako akavida'ai a'mwo tooravuro ato togai mododupudo'maiyo. Toro kuvi kuruv Gooti gavnokwe toolluro sokwollanekubweyo'ji su tokwe gamoro mwalodowodo muunyu kai'muu aiyo yiunokuudo mujomwekovla'mwalanonogano.
Gooti tool gavnokweyolluro jurogudo tokwe nemoro poowokalago tonyu guureji danekullumwojodowodekono. Gamoro jurogudo su tov womdo nekulloduke tovi'aro buro'nyo buro'nyodeyo pun yo'mo kwino'ji kuvinono nokwo yonekono. Noonyumwonyu punyuno kuudogana'jo'mdeyo oo kuudo to'no saura'jo'mdeyo kuruv nokwo yonekono. Aki muunyu toru gavnokweyolluro pugai'aro nokwo yonekono. Toro toolluno to'no neya ilomoropiyogawano.
Yogalo akav agasuro Jisasolluro a'mwo abolo pun nuugwiyo bwotonyagokwe tonyu dumul'mwojo'mokwono. Toro te guu a'mwo abolo su tonyu guureji aro neya duudogawono. “Kevu ilomoropunyu kuudo nyau'mwalpiyo. Aki kemoro nuugwiyo su ton yere imagwo'nodupudo tonyuno tov kemi nuugwiyo su tonyuno kuudo bwotonyo nuubwemwalpiyo. Toro kuvi kuruv Gooti toolluno'gwowi kuudo neya duubweyogaulo.” Duudogawono. Gooti su tool nemi ilaiyo yanekullugollo'moneyokwe yiuwi'nokai noonyumwonyu supto yodowado ton bwotonyago youllanekubweyodowodekono.
Toro te yiuwi'nokai judo'no judo'nodo tomgu'aro kaiyako yanyugolodupudo kuvi kuruv Aguto toolno'gwowi bomollurolovonumokalokwowo'ji gamoro ago muunyu kai'muuno nonumokailawonekono. Toro anumokailawo'ji toga aguto kig su tool gamoro mido mollomwalodowodo toru ilaiyo to'no nomonumwallonekono. Nevu Aguto su toolluno yiuwi'nokai toga yovo aguto to'no wiyowa'ji yiunokuudo ilomoropimwolowanekono. Nebal'nodokwono.
Toro te aga resis su tovi me'no uuwolo'mdupudo toorai mubiyo tov Aguto tool me'no mollovrowosodowodekono. Toro mollovrowosodowodo tovida'ai numiyo'moneyokwe tov mino sogwollo ainyunadopiyo. Numiyo'moneyokwe mubiyo su tov arokwono. A'mwo aguto kig tooravuro miguto yesodupudo tokwono. Miguto su tov yiuwi'nokai a'mwo abolo Gooti toolluro sumdo tovi sugudo wimo'nodupudo tonyuno to'no mapinokwono. Aguto tool a'mwo abolo tonyu pi'mwono jainyubwo'dowodo su toolluro iruko kwolabwo'ji toga miguto su tov kuvinono nonyabwonekono. Aki yiuno nuu judo toonyuno to'no nyabwonolmaiyo. Toro kwol kuruv yiuwi'nokai a'mwo abolo Aguto Jisasolluro aikomgu wolabwono tovino sogwollo kinodupudo kubuurai kuruv miguto su tov nuuwiyonekono.
Su toro to'busuko kubalno Gooti tool a'mwo abolo subuu'yamju nomarano tonollu aro nekuduuwallo'mo kwinokaikono. “Nuu Gooti toonyu kuudo me'no sovo'dogallau'mi toga kuudo su tovi miyuu'dapiyokwenyugono.” Su toro tovino nekuduuwallo'mo winyuno sumaiyokwe gavnokwe tool Eburaiyamollu aro kuudokaikono. “Guu moro subuu'yamju gudodumdo tonyu kuvinono noma'binokwono.” Gooti tool gavnokweyolluro yovo tovi'aro Eburaiyamollu subuu'yamju su toro aduuwiyokaikono.
Mino yovo tov Saimoon Pitalonyugono. Toro toonyu Jisas Kraisolluro ki'nato womdo tov yodumdonyugono. Aki gamoro kuurotokwe wimo'nodumdonyugono. Kevu nemoro kuudo uubweyodowado su tollugwoji aval'no uubweyodupudo togaikullu nuu pas akav sokwollekwopiyamono. Nemoro kuudo uubweyodowado su tov nemi Jisas Kraisolluro pasudo idopto'nodo tovi'aro ma'dowadokwono. Jisas Kraisol nemi Gootekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.
Toro te a'mwo abolo pun Aguto Jisas Kraisolluno kuudo me'no youroma'dupudogano. Su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Toro toolluno kuudo youroma'dupudo tovi'aro kwako akavuro kaiyako mollugolameyo'mo pasudo tooraida'ai me'no birolo'nugolokwodupudogano. Toro kuvi kuruv lukomgu kaiya'no pasudo toorai wuulo to'busuko awapi tov kaiya'no pasudo su tooro a'mwo abolo tonyu aki aiko te nomollubworomokavlapiyo. A'mwo abolo su ton kaiya'no pasudo toorai aiko te awapi tov kirumwallo bwotonyo nomapinogano. Kirumwallo su tov kemoro sumdomguda'ai kirumwallo amaropujuko tovi nuuwolowonokwono.
Toro kuvi kuruv kevu nemi Aguto Jisas Kraisollu'aro jurogudo neya jogullumwoju'nugovlavogaulo. Su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Kevu gamoro yasuwa'wino sugumaluko togai'aro Krais toolluno kuudo togai'aro tonyuno kuudo souromapi tovida'ai aguto yogullumwoju'nugovlavopi kwolluno nokwo ilomoropimwolapinekono. Agake'aro aki lukomgu aiyo yiunokuudo mujomwekovla'mwalano kugake'aro yiuwi'nokai iruko tollugwojai gamino yovo tov neya ilomoropiyo'moneyokwekono. Nebal'nodokwono.
Գովազդներ