2 Koorin 10:5 - Gooti Toolluro Yogalokwono

⁵ Gooti toolluro noonyumwonyu jurogudokwe su togai nevu kuudo kaiya'nodo toorai kirowo'dolapiyodowadonogano. Kuudo pworo Gooti tooke youllajunyo'mo toorogai'aro aki Gooti toollu ga'gaivolo wiyo'moneyokwe kuudo go'no go'nodo toorogai'aro yiuwi'nokai kuudo kaiya'nodo su toorai kirowo'dolapiyodowadonogano. Aki nevu Krais toollu uumjunyo'moneyokwe tov ikomago toorai mogalerosodupudo to'busuko kubalno nevu yiuwi'nokai kuudo kaiya'no yau'dowado toorai wuulo to'busuko mogalerosodowadonogano.

2 Koorin 10:5 Խաչաձեւ Հղումներ

Muuduko 8:21

Toro romiroudapiyoduke tovida'ai wobeya sudo tov Gooti Yawellu kuunokakwono. Toro kuunoka tovino Gooti Yawel gami poowokalago kuunodo tokwe aro sajunokaikono. “A'mwo abolo ton ma'no ma'no yodopure kunyu kuruv nuu aki aiko te kwako akavi kaiyako migolmonyugono. Yiuwi'nokai a'mwo abolo ton kwolaiyo taiyo kula'nyo mwalodopure togada'ai ma'no ma'no pasudo tovi mujumelabopudogano. Toro kuvi kuruv yiuwi'nokai aiyo amwalopo tonyu kaiyako amollounapiyo to'busuko kubalno aki aiko te mamollounapimonyugono.” Sajunokaikono.

Da'buukiyo 139:2

Guu manyu tomuu mwalodumdo kweku kuruv moro kuudo tonyuno'gwowi me'no youronuma'dumdekugono. Aki moro yiuwi'nokai yodumdo kunyu kuruv me'no nuwonodumdekugono.

Mollurolovomato 5:2

Toro kuudolo kuvi kuruv Feroo tool kuudokaikono. “Yawel ala'mwoldeyo? Nuu Yawelluno kuudo maiyonyugono. Toro toonyu Isuraiyolda'ai pla'mdopure tonyu, “Wonyapino neya jono,” anyudumoka tovi kaduko wimonyudukono? Awiyo, nuu kaduko ku'nono mwimekono. Aki Isuraiyolda'ai pla'mdopure togaikullu ikwonyapino mimonyugono.” Kuudokaikono.

Matyuu 15:19

A'mwo toolluro poowokalago anakuuto tomuuda'ai bolokwodopudo su ton aro tonyuno aikudadokwono. Ma'no ma'no kuudo togai'aro romiyosi togai'aro abekuuko togai'aro kwonyalo togai'aro kuuko togai'aro kuunano togai'aro burolyogalo togai'aro yiuwi'nokai su togano.

Luuk 1:51

Toro tool gamoro ato tokwe womdo bwotonyo tov me'no sokaikono. Aki toro tool a'mwo pworo kemi poowokalago kuudo togai ilomoropunyu yodapudo toorai amojo'bworapiyoka tooro gomno gomno sounopiyoporogano.

Room 1:21

Toro me'no wonoma'dupudo kun kuruv Gooti kuunodo su toolluno ilomoropiyo'mo mwinodupudogano. Aki toro ton Gooti su toolluno, “Nenoloo,” nokwo kuudopujuko kun kuruv muudodupudogano. A'mwo abolo su toro yodupudo ton junorukuudokweyogano. Toro tonyuno tov kemoro kuudo tooro dugumwuulo toollu anakuuto tomuu wo'dupudorogano. Aki toro tonyuro kuudo kworo kuruv noo'nookwo to'no yodupudogano.

Room 1:5

Toro toolluno yovo tovi ilomoropiyo'moneyokwe nuu gamoro kuuguudo sugudo tokwe moruudomollodo'mure tovida'ai yiuwi'nokai a'mwo abolo pumuuda'ai ton Jisasolluno kuudo uubweyopi kwollu nokwo uumjunmwalpinogano. Toro tovino'mo Gooti gavnokwe tool gamoro Kwolaiyo Jisasollu'aro yasuwa'wino sugumaluko tov anubweyokanyugono. Toro toonyu kuurotokwe imo'nodum gamoro womdo tov yomjumovlaiyo'moneyokwe ajanubweyokanyugono.

Room 16:26

Nevu yiulo yogalo sumo'nyajuko su tovi yiuwi'nokai a'mwo abolo tonyu kuu'maiyo toru'no moruudomollodowadonogano. Yiuwi'nokai a'mwo abolo Juu tooravuro miyawosunodupudo kunyu kuruv Jisasolluno kuudo neya uubwepino'moneyokwe nevu proofet tooravuro puukwollo sakwollajupo togai yodubwasodowadonogano. Su toro yodubwasodowore tovi'aro yiulo yogalo sumo'nyajuko su tov yiuno kuu'maiyo toru'no bomollupto'nubweyodowadonogano. Aki Gooti aiyo yiunokuudo mujomwekovla'mdowodo toolluro yogalo nekudodowo'jure tomgu'aro kuvinono moruudomollodowadonogano.

Room 7:23

Toro nyunodowo'jure kuvi kuruv moro poowokalago tovida'ai kuudo uumdo kuulanuwo'dupudo toorono'gwowi kuudo ilaiyo yau'do'mure su tovi molo wiyodowodokwono. Toro wiyowo'ji kuuwolowo'ji toga ma'no ma'nodo tov mi wuulo kironumwallodowodokwono.

1 Koorin 1:19

Su toro tovino Gooti toolluro yogalo puruv aro sakwollungikokwono. “Nuvu a'mwo abolo kuudo do'moptokwe tonyuro pi'mwo kuudo tovi kaiyako nomolloujulowapimonyugono. Aki toro tonyuro kuudo yovo'dogallau'dopure kullovai kuruv yiunokuudo nuumjuku'monyugono.” Sakwollungikokwono.

1 Koorin 3:19

Su tov aro tovinokwono. Kwako akavida'ai a'mwo pi'mwo kuudokwe tooro Gooti toolluro sumdo tovino'gwowi a'mwo junoruko toorobusuko wimo'nodupudorogano. Su toro tovino Gooti toolluro yogalo puruv aro sakwollungikokwono. “A'mwo abolo pun, Pi'mwo kuudokwenogano, dodupudo su tonyu Gooti tool kevnokweyonyuro pi'mwo kuudo yau'dopure tovi'aro wuulo kuurowabwo'dowodekono.”

2 Koorin 11:20

A'mwo su tooro kemi aro tomgu'aro kaiyako yaikullugolodupudorogano. Pugaikullu ki'nato womdo'mo amerekumokovlapiyo'mdeyo oo kemoro nuugwiyo tonyu avipolekumapiyo'mdeyo oo a'mwo su tooro kevnokwero ilomoropunyu yodopureyo'mdeyo oo kemoro suuwado tonyu allukurekumollupiyo'mdeyo kemi kaiyako su toro yaikullugolodopure kuvi kuruv kevno'gwowi a'mwo su toorai nokwo wonyapino to'no yodupudogaikikono.

2 Koorin 9:13

Kevu womdo su tovi toro sopipi tov kwako Juudiyada'ai a'mwo abolo ton kemi kamwoga yaikworopi aro kuudo yaupinogano. Oo Koorinda'ai a'mwo abolo su ton Krais toolluno kuuguudo sugudo tovi duumjunmwakovo. Toro ton nuugwiyo bwotonyo i'bworosodupu nevuge'aro yiuwi'nokai Jisasolluro a'mwo abolo pugai'aro tonollu donekullo'mwojumwakovoo. Su toro kuudo yaikuuropi Gooti toolluno yovo tov nyulomoropiyapinogano.

Filipai 4:7

Aki kemoro subusu'nyogalo su tovi'aro Gooti toolluro kavo wosunyo'moneyokwe tov nekullamwalonekono. Gooti toolluro kavo wosunyo'moneyokwe su tov yiuwi'nokai kwako akavida'ai kuudo youroma'dupudo tonyu uuwolo'mdowodokwono. Aki kevu Krais Jisasollu uuguro'mwonyodopure tovi'aro Gooti toolluro kavo wosunyo'moneyokwe su tov kemoro poowokalago togai'aro kuudo togai'aro tonyu pi'mwono yellukuromollekumwalmwalonokwono.

2 Tesaloonaika 2:4

Kirovanyuvanyu kuumwiyo su tool a'mwo abolo tonyuro noonyumwonyu ilomoropiyodapudo toorai ikomago wimo'nonekono. Aki a'mwo abolo tonyuro, “Oo nemi gootorodeyo,” dodupudo su toorai bwolomorumwogapiyawo'ji gavnokwe toolluno ilomoropunyu yawonekono. Aki toro tool wagwolago Jeruusalemda'ai Gooti toollu ilomoropiyo'moneyokwe ago tovi anakuuto tomuu kuulodavowo'ji kuu'maiyo toru'no aro donekono. “Oo nuvnokwe toonyu Gooti toonyugono.” Donekono.

2 Tesaloonaika 2:8

kirovanyuvanyu kuumwiyo su tool yiuno kuu'maiyo toru'no nobillalo'nonekono. Su toro abillalo'no'ji toollu Aguto Jisasol gami mago tovida'ai suumjudo lokabodowodo tokwe noromiyosonekono. Aki Aguto Jisasolluro abwo'ji togasuro bako bwotonyo pwopiyono tokwe kirovanyuvanyu kuumwiyo su toollu kaiyako yiunokuudo nomollounapiyonekono.

Hibruu 4:12

Neya duu'nyulo. Gooti toolluro yogalo tov aiyo kurukweyokwono. Aki yogalo su tov womdo bwotonyo yodowodokwono. Gooti toolluro yogalo su tov molo'mo kwallu'mopto puul imgu amgu do'nyo do'nyo avairo'nyungiko tousi uuwolovowo'ji a'mwo abolo tonyuro poowokalago tovi juulowosodowodokwono. Kwallu'mopto su toul a'mwo abolo tonyuro suvlo'aru'wago tokwe'aro yogudo tokwe'aro tovallu do'mdowodo to'busuko kubalno Gooti toolluro yogalo tov a'mwo abolo tonyuro kuudo tokwe'aro kuullo tokwe'aro tovallu anakuuto tomuu kuuluuwo'dowodokwono. Gooti toolluro yogalo su tov nemi me'no kuulanekwo'dowodo tovino tov nemoro poowokalago tonyuro yiulkuudo yau'dowa'jure togai'aro nemoro noonyumwonyu pasudo pun yo'mo nekullunodowo'jure togai'aro su tonyu bomollolupto'nosowo'ji janekunyubwo'dowodokwono.

Hibruu 5:9

Aki Krais su tool gamoro yiuwi'nokai womdo tovi sopiyoka toga Gooti tool yogalo aro adubweyokaikono. “Melkisodekol pris womdo sajuko toolbusuko kubalno guu pris aguto imo'numwalbinekugono.” Adubweyokaikono. Krais toolluro womdo sopiyoka su tovi'aro yiuwi'nokai a'mwo abolo kwollu kuumjunpi ton kemi ma'no ma'nodo tovuro kirumwallo tovida'ai birolo'nugolokwopi aiyo yiunokuudo mujomwekovla'mwalpinogano.

1 Pita 1:2

Jisas Kraisolluro Ganumiyago Gooti tool aiyogada'ai kemi me'no ikwono'no ajaikubweyokaikono. Aki gamoro Kuullo kuulekumwalodowodo toollu'aro kevu gamoro a'mwo abolo kuunodo wimo'nodupudogaikikono. Gooti toolluro kemi su toro saikullugoloka tov aro tovino'mokwono. Kevu Jisas Kraisolluro yogalo tovi uumjungovla'mwalpino'moneyokwe tovinokwono. Aki gamoro mujako tokwe kemi mollol'movaikudukwopiyono'moneyokwe tovinokwono. Oo Gooti tool gamoro yasuwa'wino sugumaluko ton kemi guureji nokwo ikubwemovla'mwalonekono. Aki kevu sumwoluko kavo wosungovlaiyo'moneyokwe kuruv Gooti tool nokwo ikullo'mwojumwalonekono.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.