1 Tesaloonaika 3:13 - Gooti Toolluro Yogalokwono13 Aki Aguto tool kemoro poowokalago tonyu jurogudo adaikullumwojogawono. Toro daikullumwojodowo'jure tovida'ai kevu nemi Nellunumiyago Gooti toolluro sumdo tovi gavnokweyolluro kuunodo wimo'nopi aki a'mwo abolo kaiya'nodomaiyokwe nokwo wimo'numwalpinogaikikono. Su toro kwimo'nupi togaikul lukomgu nemi Aguto Jisasol gami a'mwo abolo kuunodo togai kwolabwo'ji toga ilaiyo nokwo wuuru'mapinogaikikono. Gooti tool su toro daikullumwojumwalono tovino nevu subusu'nyogalo wuudoganodowadonogano. Nebal'nodokwono. Տես գլուխը |
1 Tesaloonaika 3:13
28 Խաչաձեւ Հղումներ
Agasuro a'mwo abolo akan Gooti toollu buulo uugunyumopiyodupu ma'no ma'no bwotonyo amjumovla'mwakopogano. Su toro tonyuda'ai a'mwo pwol numino tokwe'aro moro yogalo tokwe'aro tonyuno wogulo'mo nyo'jo. A'mwo mino wogulo'mo so'ji su toolluno nuu A'mwo Kwolaiyo Kuunodo kwonyu kuruv wogulo'mo imekono. Nuu mi Nyunumiyago toolluro bako bwotonyo pwopiyodowodo tovi anakuuto tomuu gamoro ensel toorogai nomokamonyugono. Toro amokami su toga a'mwo mino wogulo'mo so'ji su toolluno nuu kwonyu kuruv wogulo'mo imekono.” Kuudokaikono.
Kuudo neya jaullulo. Kevu a'mwo pwolluro womdo wiyodowodo tekwojuno aro nodupiyo. “Oo a'mwo su tool kaiya'no yodowodekono.” A'mwo womdokwe su tekwoji su toro wuujo'mo tov kemi maikuuwoso. Yiuno gami womdo wiyodowodo aguto toolluro ato tovi kwoso. Toro te gami aguto toolno nokwo wuudonekono. “Oo guu kaiya'no sadokuuno oo ilaiyo sadokuuno tov.” Toro to'busuko kubalno Gooti Aguto tool gamoro womdo wiyodowado tonollu, “Oo kevu sugudo sadokwovo,” kuvinono anekudoneyokweyo'mo gavnokwe tool jurogudo danekullumwojumwalonekono.
Aga nevu yiuno Gooti toolluno to'no neya ilomoropimwolowanonogano. Gooti su tool kuuguudo sugudo nuu modomollodumdo tovi'aro kemi jurogudo nokwo daikullumwojumwalonekono. Kuuguudo sugudo su tov aiyoga manyu kuunodo togada'ai yiulo yogalo mujumo'nugelabino mujumo'nugelabino sumaiyokwe kworomo bwotonyago kuuwolo'nyajukokwono. Toro kuvi kuruv aga'no'gwowi yiuno kuu'maiyo toru'no me'no abiyanekulo'nadopikokwono. Kuuguudo sugudo su tov yiuno Jisas Kraisollunokwono. Toro te kevu kuuguudo sugudo su tovino kuudo neya uubwemovlavopi jurogudo nokwo yogullumovla'mwalpinogaikikono.
Toro kuvi kuruv nevu yiuwi'nokai pwolno puru'monodo tonolluro aiyo aiko te dukaiyo'moneyokwe toga'no Gooti tool me'no ajesokaikono. Aiyo aiko te nodukawano su tov Gooti toolluro me'no ajesungiko tomgu'aro neya uumjungelabwonokwono. Toro te sumdomgu Krais tool aiyo aiko te muudu'no me'no adukavokaikono. Aki lukomgu Krais tool aikomgu kwolabwo'ji toga gamoro a'mwo abolo kunol kuruv aiyo aiko te noduko'moulowanonogano.
Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.
Su toro amollol'movonekumaroka tov aro tovino'mokwono. Nevu Krais toolluro mollu'bwoto tonol gavnokweyolluro sumdo tovi davowa'ji toga sugumaluko neya wimo'nyo'moneyokweyokwono. Aki gamoro sumdo tovi nevu muu'imuulokweyo'mdeyo oo iwakuumwiyokweyo'mdeyo oo kaiya'no kuumwiyokweyo'mdeyo nuuwimo'na'jokweyo'mokwono. Toro kunol kuruv gamoro sumdo tovi sugudo to'no wimo'nyo'moneyokwe amollol'movonekumarokaikono.
Aki kevu pasudo sugudo tollovaino yenyubworomaropi pi'mwono neya domolludo'movlavogaulo. Toro togaikullu Krais tool kooti yogalo duuwiyo'moneyokwe kwolabwo'ji toga kevu kaiya'no nonagutokwe to'no imo'nupinogaikikono. Kevu su toro sumo'nupi togaikulluno a'mwo pwolnodo kwol kuruv ku'nono mabwolomekumwogapiyawonekono.
Kevu su toro sumo'nyajupo kugaikullu kuruv Gooti toolno'gwowi Krais toolluro kulako aboloka tovi'aro gamiyomno wobo toru ikumokabo'no ibwoto'nyo'moneyokwe me'no amollumo'naikubweyokaikono. Su toro amollumo'naikubweyoka tov aro tovinokwono. Kevu Krais toolluro a'mwo abolo togaikul gavnokweyolluro sumdo tovi adapi toga yiuno sugumaluko neya wimo'nupino'moneyokwe tovinokwono. Aki gamoro sumdo tovi kevu kaiya'no kuumwiyo nonagutokwe neya wimo'nupino'moneyokweyokwono. Kevu su toro kwimo'nupi togaikulluno a'mwo pwolnodo kwol kuruv aro nekudumwalpiyo. “Kaiya'no yodupudogaikikono.” Toro nekudumwalpiyokwe tovino'mo Gooti tool kemi gamoro ibwoto'nyo'moneyokwe amollumo'naikubweyokaikono.
Nemi Aguto Jisasol aikomgu kwolabwo'ji toga nevuge'aro kev kugaikike'aro tonol gamoro sumdollu toru guureji daiyo'mo tovino sogwollo kinodowadonogano. Aki guureji da'mdowa'jure kev togaikulluno ilaiyo yowa'ji aro ilomodomoropiyowanonogano. “Oo nevu kemi akuuto toru mwalodowa kuuguudo tokwe amoruudekumollajuuwo tov sulo me'no ai'nokakwono. Sulo su ton kev togaikikono.” Toro togaikulluno ilaiyo ilomodomoropiyokwenogano.
Toro domdukuurosuno sumawoneyokwe Sailaseke navu Timootiyollu kemiyomno yere amekwopiyabowolonakono. Timootiyol nemi nellugwai'yago toolbusuko nekullumo'nodowo Gooti toolluro womdo tovi aval'no yodowadonogano. Aki toro tool Krais toolluno kuuguudo sugudo tokwe aval'no modomollodowadekono. Toro toollu kemiyomno amekwopiyabowolekono. Su tool kemoro kuudo uubweyodupudo tovino guureji gudupola'mwalpino'moneyokwe daikullumwojonekono.
Aguto toolluda'ai yogalo bodowodo akav ikudumo'mokwono. Aguto tool aki aiko te kwolabwo'ji toga nevu punol aiyo kuuno amwala'ji tov Jisasollu sumdomgu yere muuru'maranonogano. Toro kuvi kuruv Krais toolluro a'mwo abolo me'no abollungopo ton a'mwo buuso tovi wo'dupudo su tono'gwowi sumdomgu kunda'ai ilapi wuuru'mapinogano.
Su toro me'no aduko'melapi toga'no'gwowi lukomgu nevu aiyo kuuno amwala'ji tonol sulu'wo tomuuno ilowanonogano. Toro tonol a'mwo abolo me'no aduko'melapi su togai Aguto toollu sulugumdo tomuu illuru'maranonogano. Toro me'no sulluru'mara'ji tonol Gooti Aguto tooke yiunokuudo mujomwekovla'mwalanonogano.
Oo kemino tov aro anekullunadopiyo. Gooti sumwoluko kavo wosunyo'moneyokwe tool kemi womdo nekullumwalonekono. Toro ikullodowo'jure tovida'ai kemoro yiuwi'nokai somjomwekovlapi tomgu'aro Gooti gavnokwe toolluro kuunodo nokwo wimo'numwalpinogaikikono. Toro wimo'nugovlavopi nemi Aguto Jisas Kraisol abwo'ji toga kevu a'mwo abolo kaiya'nodomaiyokwe to'no neya imo'nupinogaikikono. Su toro kuvinono ikullumo'nyo'moneyokwe Gooti tool pi'mwono nomollekumwalonekono. Kemoro poowokalago togai'aro kuudo togai'aro kulako togai'aro tonyu nokwo mollekumwalmwalonekono. Su toro tovino anekullunadopiyo.
Aguto tool iruko su tollugwoji kwolabwo'ji toga gamoro kuunodo wimo'nyo'moneyokwe kuudo uubweyodupudo tono'gwowi yovo aguto wipinekono. Aki toro toolluno ilaiyo bwotonyo mollomapinekono. Kev kugaikul kuruv nemoro kuuguudo kuu'maiyo toru adodoluvaikubweyowo tovi kuudo me'no kuubweyopogaikikono. Toro togaikulluno tov ilaiyo aval'no mollomapinekono.
Aki Aguto Jisasol Gooti toolluro ago tomuuda'ai kuu'maiyo toru'no nobiyalo'nonekono. Toro abiyalo'no'ji toga kemoro tabunyuwuulo mo'movla'mdupudo su tonyu Gooti tool nomodukwopiyonekono. Su toro amodukwopiyo'ji toga kevu yiuno paiko to'no ibwosungovla'mwalpinogaikikono. Aki ne kwonollu kuruv aval'no nonekullonekono. Aki Aguto Jisasol toro abiyalo'no'ji su toga gami ensel jurogudo kuunodo toorogai mokwolabowo'ji widuko bomjonugelodowo'jure tokwe wolabwonekono.
Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.
Aki Adamolluro jukweyago pwolluno yovo tov Inookolekono. Inookolluro jukweyago tooro Adamolluda'ai yowosungelabino yowosungelabino sumaveyokwe Inookol naba 7 tousuda'ai abillumo'nokaikono. Inookol a'mwo kuunano ibwasokwe su tooraino proofet yogalo puruv aro me'no ajakwollokaikono. “Kevu duu'nyulo. Aguto tool gavnokweyolluro ensel bwotonyago toorogai nobwonekono. Ensel su toorai ku'nono majagilpinorogano.
Oo kevu ma'no ma'no pasudo toorai nobwolorapiyokweyo'mo Gooti tool nokwo ikullo'mwojumwalonekono. Aki toro toolluro ikullo'mwojodowo'jure tovida'ai kevu ma'no ma'nodo maiyokwe imo'numwalpinogaikikono. Toro togaikullu gamoro jurogudo tovuro bako bwotonyo pwopiyodowodo tomuu nokwo kuulomekudapiyonekono. Su toro aulomekudapiyo'ji toga kemi poowokalago togai ilaiyo bwotonyo ipinogaikikono.
Գովազդներ