Toro te kevu aiyogasuro nemi nellukweyago tooraino kuudo neya jaullulo. Su tooro aro sajuporogano. Moosesolluro loowo tonyu uumjunyo'mo jul'nyo to'busuko mollukwowa'dupudo kworo kuruv ku'nono muumjunyajuporogano. Aki nevu agasuro kunol kuruv Moosesolluro loowo su tonyu uumjunyo'mo tov jul'nyo to'busuko nekwo'dowodonogano. Toro kunol kuruv loowo tonyu ku'nono muumjunodowadonogano. Toro tovino tov kevu loowo su togai a'mwo abolo Juu toonolluro miyawosunodowado tonyu uubweyo'mo aikullunadopiko tov ilaiyo'maiyo. A'mwo abolo su ton nevubusuko Jisasolluro uumjunyokwe me'no kwimo'nopogano. Toro tonyu wiyo'mwojo'moneyokwe puuto soulubweyoka Gooti toollu surodo nyu'gwolpiyo. Toro tovino tov kevu Juu toonolluro miyawosunodowado tonyu jul'nyo su tov muubwepinono.
1 Koorin 8:1 - Gooti Toolluro Yogalokwono1 Aga ibesa'aiyo muugupto pun nodupudo tovino ikudumo'mokwono. Muugupto su tonyuda'ai pun kuunano gooti toorai ilomoropiyo'moneyokwe me'no kwiroudapingikogano. Muugupto su tonyuno nonyo'moneyokwe tovino nevu punol aro dodowadonogano. “Oo nevu yiuwi'nokai tonol su toro tovino pi'mwo kuudo kurukweyonogano.” Toro dodowado tonol ilomoropunyu nyuna'jo. Toro kunol kuruv Jisasolluro mollu'bwoto tonyu jurogudo duuwimwojo'moneyokwe to'gwowi nevu a'mwo abolo su tonyu kalo buuropino neya amollogawano. Տես գլուխը |
1 Koorin 8:1
35 Խաչաձեւ Հղումներ
Kevu wosamujuko pun kuunano gooti pworai me'no kwingiko su tonyuno kumako neya mwalmwalpinogaikikono. Aki allukuulolo boruko tovi'aro aromiyogubulosungiko toorai manmwalpinogaikikono. Aki mujako tov kuuno wo'dowo'jure toorai manmwalpinogaikikono. Aki kevu kwonyalo mimwalpinogaikikono. Adaikullumawono. Kevu su toro adaikullumawo tonyu kuvinono kuumjungovlapi tov ilaiyokwono. Mekonoo, nemoro kuuguudo tov aro'arokwono.” Pas tov toro sakwollopokwono.
Aki a'mwono moduvomwallokwe su tooro a'mwo abolo Juu tooravuro miyawosunodupudo tonyuno'gwowi aro adomwaloporogano. “Nevu muudu'nodo toga a'mwo abolo Juu toonolluro miyawosunodowado pun Jisasolluno kuudo me'no uubweyodupudo su tonyu pas puruv me'no sokwolluwapiyowonogano. Pas su tovi nemoro kuuguudo adomduukuurosowo tonyu neya uumjunmwalpino'moneyokwe aro sokwolluwapiyowokwono. Kevu wosamujuko pun kuunano gooti pworai me'no kwingiko tonyu nonyo'mo kumako neya domwalogaulo. Aki muugupto pworo mujako kuuno wo'dowo'jure tooraino kumako domwalogaulo. Aki allukuulolo tooro boruko tovi'aro aromiyogubulosungiko toorai manmwalpinogaikikono. Aki kevu kwonyalo mimwalpinogaikikono. Su toro yogalo ton pas tovi me'no sokwolluwapiyowokwono.” Adomwaloporogano.
Toro te miyobuuravoo, nuu yiulo yogalo puruv ikudumo'mokwono. Yiulo yogalo aikudumi su tovi kevu wuu'nopi aro nyulomodomoropinapiyo. “Oo nevu pi'mwo kuudokwe me'no imo'nodowadonogano. Aki toro tonol a'mwo abolo Juu tonyuro aiko toru ma'dowadonogano.” Su toro nyulomodomoropinapiyokwe yiulo yogalo akavi neya duu'nyulo. Aga Isuraiyolda'ai pun kemoro poowokalago kuudo tov lumdo me'no kuulopiyodupudogano. A'mwo abolo su tonyuro lumdo kuulopiyodupudo su tov yiunokuudo'maiyo. Lukomgu Juu tooravuro miyawosunodupudo pun Jisasolluro kuuguudo tovino kuudo kuubwepi ton Gooti toollomno nobumwalpinogano. Toro bodopure tonyu Gooti tool jagilno jagilno yowo'ji, Me'nodeyo, donekono. Toro ado'ji su toga'no'gwowi Isuraiyolda'ai a'mwo abolo kun kuruv Gooti toollomno kuudo youragunyumo'nupi Jisasolluno kuudo nuubwepinogano.
Kevu yiuwi'nokai a'mwo abolo togai sumwoluko aval'no neya wosunmwalpinogaikikono. Aki toro togaikul aro kuudo nyau'mwalpiyo. Oo nevu yovo agutokwe tonol pi'mwo kuudokwenogano. Su toro kuudo miyauropi kugaikul kuruv a'mwo abolo yovomaiyokwe tobuurai wuuru'maropi a'mwo abolo su tobuurogai neya yomjomwekovla'mwalpinogaikikono.
Toro te kevu Jisasolluro a'mwo abolo pubuuraino, “Oo ma'no ma'no yokweyogano,” dodupudo tov ilaiyo'maiyo. Aki su toro tobuuravuro kuudo yau'dupudo tovino, “Oo junorukuudo yaullokweyogano,” dodupudo kuruv ilaiyo'maiyo. Kevu kuudo neya jaullulo. Gooti tool nevu yiuwi'nokai tonollu domdukuuranekubweyo'moneyokwe gamoro kooti yogalo tovuro sumdollu toru nomonekudapiyononogano.
Kevu neya duu'nyulo. Nuu Aguto Jisasollu me'no uuguro'mwonyodumdo tovino tov nuu aro kuudo me'no yau'dumdonyugono. Gooti toolluro sumdo tovi wosamujuko kaiyako mollugolameyo'moneyokwe pun nonagutokwono. Toro kuvi kuruv a'mwo pwol aro kuudo sauro'ji tov, Oo wosamujuko su tov Gooti toolluro sumdo tovi kaiyako mollugolamo'mdowodokwono. Toro kuudo sauro'ji su toollu wosamujuko su tov kaiyako wimo'nonokwono. Toro tovino tov wosamujuko su tovi nono'jo.
Toro te kevu yiuwi'nokai wosamujuko tonyuno aro kuudo yau'dupudo togaikul, Oo yiuwi'nokai ton nokwo mujonugovla'mwalanonogano. Su toro kuudo yau'dupudo togaikul kemi kuudo su tov yiuno kevnokwe togaikulluno to'no neya jomullosogaulo. Aki Jisasolluro a'mwo abolo punyu kemoro kuudo su tonyu neya uumjunpino'moneyokwe madumuurolopinogaikikono. Toro kuvi kuruv yiuno guvnokwe judo tookuge'aro Gooti tooke'aro toorakullu ikwo'mwalonokwono. Toro te a'mwo pwol yiuwi'nokai wosamujuko tonyu nonyo'moneyokwe kuudo kwolallo miyourukwapiyowo'ji aro ado'ji tov, “Oo Gooti tool maironumwallononyugono,” su toro ado'ji tool ilaiyo to'no nokwo mujonugovla'mwalonekono.
Toro te a'mwo abolo sa'aiyo nodupudo ton a'mwo abolo kumako mwalodupudo tonyuno aro nobwolomodomorumwogapiyapiyo. “Oo weyogworogano.” Toro nobwolomodomorumwogapiyapiyo. Aki kumako mwalodupudo ton a'mwo abolo yiuwi'nokai wosamujuko nodupudo su tonyuno aro nodupiyo. “Awi, Gooti toolluro sumdo tovi ma'no ma'no sadokwovo.” Su toro nodupiyo. Gooti tool Jisasolluro a'mwo abolo su tonyu ilaiyo me'no molloma'dowodogano. Toro tovino tov su toro nodupiyo.
Miyobuuravoo, nuu kemino aro kuudo guureji yaikuu'dumdonyugono. “Oo a'mwo abolo su tobuuro sugudo mujumovlaiyo'moneyokwe kuudo ton me'no kuuluuwo'dowodogano. Aki Gooti toolluro yogalo tovida'ai yiuwi'nokai kuudo ton me'no youroma'dupudogano. Toro tonyuno tov kevuge avalo pubuurai nokwo yodubwasumwalpinogano.” Kemino su toro kuudo me'no yaikuu'dumdonyugono.
Toro te kevu Krais Jisaseke me'no uuguro'mwonyodupudo togaikul yiuwi'nokai sugudo go'no go'nodo tollovo me'no ma'dupudogaikikono. Toro togaikul bwotonyagokwe imo'nodupudogaikikono. Kevu Jisasolluro mollu'bwoto togaikul su toro me'no ma'dupudo tovino tov kevu kuuguudo ilaiyo to'no modomollodupudogaikikono. Aki Gooti toolluro yiuwi'nokai pi'mwo kuudo judo'no judo'no ikullabodowodo kugai'aro tonyuno you'movla'mdupudogaikikono.
Mi avalobuuravoo, kevu gabovo yogaljo tonyuda'ai jo'moneyokwe tovino kwoloraiyo kula'nyo tobuurobusuko kuudo nyau'mwalpiyo. Toro kugaikul kuruv kevu aguto me'no gullodupudo tonbusuko kubalno kavlo su tonyuno kuudo po'dogalo neya jouromarogaulo. Toro kuvi kuruv kevu kirovanyuvanyu pasudo tooraino'gwowi kwolaiyo muudoga kuudo nonaguto tonbusuko to'no neya jumo'nogaulo.
Kuudo neya jaullulo. Kevu aro dodupudogaikikono. “Oo nevu Krais toolluro pi'mwo kuudo kurukwenogano. Aki jurogudo imo'nodowa yovo aguto mallokwenogano.” Dodupudogaikikono. Toro kuvi kuruv nevu tekwojonolno'gwowi Krais toolluro womdo wiyodowado tekwojonolluno tov a'mwo abolo tonyuro sumdo tovi a'mwo junorukuudokwe pworobusuko wimo'nodowadonogano. Aki toro tekwojonol a'mwo wollainyo pworobusuko imo'nodowa yovo aguto mamallokwenogano.
Mi avalobuuravoo, kevu kuudo po'dogalo youromapino'moneyokwe nuvu Apooloseke toonalluno kuuguudo tov aikudadokwono. Kevu namoro yodowolo su tovino kuudo youromaropi Gooti toolluro yogalo sakwollungiko tonyu kevu pi'mwono nokwo uumjunpinogaikikono. Su toro kuumjunpi toga kevu a'mwo pwolluno kuu'dello wosodupudogaikuldeyokwe a'mwo su toolluno yovo tov nyulomoropiyapiyo. Aki kevu a'mwo gabovo pwekwojuno yovo tov nobwolomorumwogapiyapiyo.
Su toro yomollodole tovino kevu kumdato dopi wogulo nokwo subwosunopujukogaikikono. Aki kevu Jisasolluro mollu'bwoto togaikulluda'ai a'mwo su toollu nokwo amodovomjapiyopujukogaikikono. Toro kuvi kuruv kevnokwe togaikul ilomoropunyu yodapu kwonyalo pasudo su tovi nokwo wonyapino to'no sadokwopogaikikono.
Kevu ma'no ma'nodo su tovi wonyapino to'no yodupudo tovino ilomoropunyu sadokwopo su tov ilaiyo'maiyo. Kemoro su toro yodupudo tovino yovekurajo puruv arokwono. Flauwa tovi munyo'moneyokwe yis tov yiuno pwekwono kworo'ji kuvi kuruv yis su tov yiuwi'nokai tomuu kuullo'mowopiyowo'ji flauwa tov nomunonokwono. Su toro to'busuko kubalno kemida'ai yiuno pwolnodo kwol kuruv ma'no ma'no mujumovla'mdowo'jure toollu wonyapino supi tov kevu yiuwi'nokai Jisasolluro mollu'bwoto togaikullu aiyowomno noullo'movaikwopiyonokwono.
Toro te kuunano gooti pworai ilomoropiyo'moneyokwe ibesa'aiyo aromiroudapingiko su tonyu nodupudo tovino aro ikudumo'mokwono. Nevu kuudokwe tonol aro me'no youroma'dowadonogano. Oo kuunano gooti su tooro kuunodoromaiyo. Gooti kuunodo toolno'gwowi bwotonyagolmaiyo. Yiuno pwolnodekono. Nevu su toro kuudo me'no youroma'dowado tonol kuunano gooti toorai ilomoropiyo'moneyokwe ibesa'aiyo aromiroudapingiko su tonyu ana'ji tov ma'no ma'nodo'maiyo.
Toro kuvi kuruv Jisasolluro a'mwo abolo puno'gwowi kuudo su toro tovino po'dogalo miyouroma'dupudogano. Toro ton Jisasolluno kuudo me'no kuubweyopo kun kuruv kemi sumdomguda'ai kuunano gooti tooraino kuudo pun kuuno gudupola'dupudogano. Toro tovino tov aga kuga kuruv, Kuunodorodeyo, kuuno yau'dupudogano. A'mwo abolo su ton kuunano gooti pworai ilomoropiyo'moneyokwe sa'aiyo me'no kwiroudapingiko su tonyu anpi toga aro kuudo molla'mopto yaullokweyogano. Aiyoo, nevu kuunano gooti pworai me'no kwingiko tov anmawo tovino tov Gooti tool ilaiyo mwinadopiyo. Su toro kuudo yau'dupudo ton ilaiyo mibwosunodupudogano.
Toro toollu dolago tomuu mwalodowado tonol yiuno ilaiyo to'no guro'mwonyodowadonogano. Aro to'busukokwono. Kulako tovuro yiuwi'nokai suvlatodeyo ton go'no go'nodogano. Toro kunyu kuruv suul wuudowago'mdeyo oo aruu'wago'mdeyo ton yiuwi'nokai su tonyu aval'no momgurowosodowodokwono. Su toro to'busuko kubalno nevu yiuwi'nokai Jisasolluro a'mwo abolo tonollu Krais gavnokwe tool aval'no moguro'mwojanekubweyodowodonogano. Toro tonol kulako yiuno puru'mono imo'nodowadonogano. Toro tonollu Gooti tool womdo go'no go'nodo ton nekubweyodowodekono. Su toro nekubweyodowodo tonyu neya amjumovlavogawano. Nevu yiuwi'nokai pwolno puru'monodo tonol su toro mujumovlavowa'ji imgu amgu kalo buuropino neya inmwalanonogano. Nevu Krais toolluro kulako puru'mono imo'nodowado tonol su toro somjomwekovlawa'ji tov aguto yogullumovlavowa'ji jurogudo imo'numwalanonogano.
A'mwo pwol kemi aro ikudonekono. “Oo nuu wojo suwo'numwa'jo tovida'ai pasudo muuduko uumjunyo'mo puvino me'no kwonoma'mwa'jonyugono. Su tov arokwono. Kevnokwe togaikul neya bwolomorumwogapinapi ensel toorai julomoropiyogaulo. Moro wojo kwonmwa'jo su tov agutokwono. Toro tovi kevu neya duumjunyulo.” Ikudonekono. A'mwo pwol su toro aikudo'ji kuvi kuruv kevu muumjunpinono. A'mwo su toolluro yogalo aikudo'ji tovi kevu kaduko kwipi tov a'mwo su tool kemoro muunyu kai'muuda'ai mubiyo sugudo tonyu nyupolekumaro'jo. Toro te kevu a'mwo su toollu kaduko nuuwimwalpiyo. Kuudo neya jaullulo. A'mwo su tooro kemi kuudo uumdo toorai uumjunodupudo tovino tov ilomoropunyu bwotonyo yodapudorogano.
Toro kuvi kuruv gumi yogalo pun aro mojurugologumollumo'monyugono. Aiyogasuro a'mwo pwolluno yovo tov Balamolekono. Toro tool a'mwo gabovo pwollu aro sodubwasajukekono. Isuraiyolda'ai a'mwo abolo ton ma'no ma'no yopi bwolorapino'moneyokwe guu neya dode'nomarogawono. Sodubwasajukekono. A'mwo gabovo su toolluno yovo tov Balakolekono. Toro tool Isuraiyolda'ai tonyu ki'nomallo'moneyokwe wosamujuko ton kuunano gooti toorai me'no kwiroudapingiko tonyu nonyo'mo tokwe'aro aki kwonyalo yo'mo tokwe'aro tovalluno sodubwasajukekono. Su toro yodubwasoduke tovida'ai Isuraiyolda'ai ton uumjunodupu kuunano gooti su toorai sulomoropiyajupogano. Agasuro kemida'ai a'mwo pworo Balamolbusuko pasudo su toorai aval'no yodupudorogano. Su toro yodopure toorai guu wonyapino to'no yodumdo tovino nuu yogalo amodagujurogolmono.
Toro kuvi kuruv gumi yogalo aro modagujurugolmo'monyugono. Abolo puruv moro a'mwo abolo womdokwe tobuurai ma'no ma'nodo tomuuno mogaibworomokavla'mdowodokwono. Toro mogaibworomokavla'mdowo'jure tovi guu wonyapino to'no yodumdekugono. Abolo su tov aguto kwin Jesebelo'busukokwono. Toro tov aro dodowodokwono. “Oo nuu proofet to'migono.” Dodowodokwono. Toro tov moro womdokwe a'mwo abolo tobuurai kuunano ibwaso tokwe youkuu'nuudodowodokwono. Toro tovuro youkuu'nuudodowo'jure tovi moro womdokwe pubuuro uumjunodupu kwonyalo yodupudogano. Aki wosamujuko pun kuunano gooti toorai ilomoropiyo'moneyokwe me'no kwiroudapingiko tonyu nodupudogano.