Nebal'no ikudumo'mokwono. Gooti tool kooti yogalo aduuwiyo'ji iruko su tollugwoji wagwolago su tovida'ai a'mwo abolo ton kirumwallo bwotonyo tov nomapinogano. Kemoro kirumwallo mapino su tov wagwolago Soodoomke Goomoorake tovalluda'ai a'mwo abolo tonyuro kirumwallo amaropo su tovi nuuwolowonokwono.”
1 Koorin 3:13 - Gooti Toolluro Yogalokwono13 Toro tooravuro womdo mujumelabodupudo ton sugudo'mdukono oo kaiya'nodo'mdukoneyokwe tovino lukomgu kuu'maiyo toru nobomollolupto'nosonokwono. Iruko pullugwoji Krais tool a'mwo abolo tonollu kooti yogalo adanekullo'ji su toga yiuwi'nokai pwolno puru'monodo tonolluro womdo mujumelabodowado tov duko tokwe yamju wiyoganonekono. Duko tovi toro amollurowo'ji toga a'mwo abolo tonolluro womdo go'no go'no yodowado ton sugudo'mdukono oo kaiya'nodo'mdukoneyokwe tovino kuu'maiyo toru bomollolupto'nosonokwono. Տես գլուխը |
1 Koorin 3:13
28 Խաչաձեւ Հղումներ
Toro wiyodopure tovino tov a'mwo abolo su tonyuro yiulkuudo ton kemi poowokalago tomuu kuuluuwo'dupudo su tonyu kuu'maiyo toru nobomollolupto'nosonogano. Toro te guu gumi kwolaiyo akallu su toro wimo'nodowo'jure tovino jul'nyo tov kwallu'mopto to'busuko gumoro sumwoluko tovi nojuulovagubweyono'guugono.” Simiyoonol toro kuudokaikono.
Toro te lukomgu Gooti toolluro iruko me'no ajesungiko toga abai'mowo'ji moro yiuwi'nokai kuuguudo sugudo moruudomollodumdo akav kuvinono nyumo'nonokwono. Su toro toga yiuwi'nokai a'mwo abolo tonyuro jupweyo kuudo yau'dupudo toorai yiuno kuu'maiyo toru'no bomollolupto'nubweyowo'ji kooti yogalo duuwiyonekono. Gooti tool Krais Jisasollu'aro toro yonekono. Moro kuuguudo moruudomollodumdo tov torokwono.
Awiyo, kevu toro kuudo miyau'dupudo kuvi kuruv kemoro poowokalago tono'gwowi lumdo kuulopiyopi kemoro kuudo kun kuruv dogaipo'nyo kuumwiyo bwotonyo yau'dupudorekikono. Toro toorekulluro kirumwallo tov bwotonyo imo'nugelodawodokwono. Toro te aiyowo'mo toga Gooti tool gamoro kooti yogalo idopto'nodo tokwe daikullowo'ji airekumwallo'ji toga gamoro surodo tov yiuno kuu'maiyo toru'no ikuduuwallonorekikono. Toro aikuduuwallo'ji tovi noonpinorekikono.
Toro te a'mwo pworo ago mojudapiyo'mo sulo su toollu muunyu toru kemi go'no go'nodo togai neya modumelabumwalpinorogano. A'mwo pworo ikodeyo oo kwoptodeyo oo wit yogudodeyo wollainyo su tobuurogai modumelabupinorogano. Toro kuvi kuruv a'mwo pworo pi'mwono mojo'mo kwinpi toorono'gwowi kemi goolodeyo oo silvadeyo oo sulo sugumalukollovodeyo tollovogai modumelabupinorogano.
Toro te Aguto tool yere mabodowo'jure toga kevu a'mwo pworavuro moduvomwallo'moneyokwe womdo tovino yere nojagilmwalpiyo. Yiuno kemi Aguto tool abwo'ji toga yiuwi'nokai poowokalago tovida'ai kuudo dugumwuulo tomuu yiulo kuulopuu'na'dupudo su toorai bako tovi nobomorosonekono. Su toro abomoroso'ji toga kuu'maiyo toru'no bomollolupto'nosonekono. Aki Gooti tool yiuwi'nokai pwolno pwolnodo toonolluro womdo tonyuno kaiya'nodo'mdukono oo sugudo'mdukoneyokwe tovino kuudo me'no youroma'dowodekono. Gooti su tool a'mwo pwolluno aro ado'ji tov “Oo a'mwo akal womdo sugudo yodowodekono,” ado'ji tov Gooti tool a'mwo su toolluno yovo tovi nyulomoropiyawonekono.
Toro te nuu womdo su tonyu yodore tovida'ai jul'nyo akan ama'mwakonyugono. Toro kuvi kuruv nuu jul'nyo ama'mwako tovino wogulo mibwosunmwakonyugono. Su tov aro tovinokwono. Nuu kuudo uubweyodumdo Krais Jisasolluno aro kuudo me'no youroma'dumdonyugono. Oo su toolluro iruko aguto tollugwo yere mabai'mo'mdowo'jure akaga moro womdo yomjumovla'mdo'mure tonyu Krais tool pi'mwono nokwo mollonumwalmwalonekono. Tono tono mollonumwalowo'ji yiuno gamoro iruko aguto tollugwo abai'mowo'ji toga'no pi'mwono nokwo yellukuromollonumwalmwalonekono. Kuudo yau'dumdonyugono.
Toro tooro subwasupi kuvi kuruv kemoro yogalo to'gwowi ku'nono mabomje'nugoulawonokwono. Su tov aro tovinokwono. Iruko pullugwoji yiuwi'nokai a'mwo abolo ton a'mwo su tooraino aro nyuworovomapinogano. Oo a'mwo ibwasokwe su tooro kuudomaiyorodeyo. Nyuworovomapinogano. Su to'busuko kubalno aiyoga Janeseke Jabreseke toorallu aval'no me'no suworovomallajuporakono.
Toro te aga resis su tovi me'no uuwolo'mdupudo toorai mubiyo tov Aguto tool me'no mollovrowosodowodekono. Toro mollovrowosodowodo tovida'ai numiyo'moneyokwe tov mino sogwollo ainyunadopiyo. Numiyo'moneyokwe mubiyo su tov arokwono. A'mwo aguto kig tooravuro miguto yesodupudo tokwono. Miguto su tov yiuwi'nokai a'mwo abolo Gooti toolluro sumdo tovi sugudo wimo'nodupudo tonyuno to'no mapinokwono. Aguto tool a'mwo abolo tonyu pi'mwono jainyubwo'dowodo su toolluro iruko kwolabwo'ji toga miguto su tov kuvinono nonyabwonekono. Aki yiuno nuu judo toonyuno to'no nyabwonolmaiyo. Toro kwol kuruv yiuwi'nokai a'mwo abolo Aguto Jisasolluro aikomgu wolabwono tovino sogwollo kinodupudo kubuurai kuruv miguto su tov nuuwiyonekono.
Jisasolluro a'mwo abolo pun kevuge avalo pubuurogai mi'bwo'nodupudogano. Kevu su to'busuko aval'no nyumwalpiyo. Toro kuvi kuruv kevno'gwowi neya ju'bwo'nomwalogaulo. Su toro i'bwo'nomwalopi Jisasolluro a'mwo abolo tobuurogai imgu amgu jurogudo doduuwimwoju'nogaulo. Toro togaikul aro wonomapinogaikikono. “Oo Aguto tool aikomgu nobai'mowono'mo tov wobo toga'deyo.” Su toro tovi kwonomapi toga jurogudo duuwimwoju'numwalpino su tov muunyu toru'aro guureji jogaulo.
Kevu tagunyo baikullumo'nodopure toorai kula'nyo toga'gwo mokavla'mdopure su tovi'aro Gooti tool kemoro kuudo uubweyodupudo tovi yamju ikulloganyokwekono. Kevu gool tovino kuudo nyau'mwakovo. Gool tov kuunodo'mdukoneyokwe tovino yamju wiyoganyo'mo tooro gool tovi duko tokwe dovelogullumowopiyodupudorogano. Su toro to'busuko kubalno buro'nyo buro'nyo tagunyo kemi abaikullumo'nupi su tooro kemoro kuudo uubweyodupudo tov kuunodo'mdukoneyokwe tovino yamju ikulloganyo'morogano. Toro kuvi kuruv kemoro kuudo uubweyodupudo to'gwowi gool tovi uuwolo'mdowodokwono. Aki Jisas Kraisol kuu'maiyo toru'no abwiyalo'no'ji toga kemoro kuudo uubweyodupudo tovino ilomodomoropiyawo'ji gamoro jurogudo tov kemi nekubweyonekono. Aki yovo aguto nekullabwonekono.
Mi ibwoto'nyobuuravoo, tabunyuwuulo bwotonyo pun duko nosodupudo to'busuko kemi abaiki'mo'mwakopo tonyuno kevu mollolokurosi yopi aro nodumwalpiyo. “Oo tabunyuwuulo bwotonyo akav buro'nyo kavlo tovino dukonekullumo'nadopiyo?” Su toro nodumwalpiyo. Gooti tool kemoro kuudo uubweyodupudo tovi yamju ikulloganyo'moneyokwe tabunyuwuulo su ton ikullumo'nodupudogano.
Aguto toolluro wolabwono iruko tollugwo aro to'busuko imo'nonokwono. A'mwo abolo pun, “Oo kuuko tool nobwonoldeyo” kuudo miyau'dopure toga a'mwo kuuko tool bai'mo'mdowodekono. Su toro to'busuko kubalno a'mwo abolo ton kuudo miyau'dopure su toga Aguto tool nobai'mowonekono. Toro abai'mowo'ji toga sulugumdo tov uuwiyago bwotonyo ki'nowo'ji nyounopiyonokwono. Aki duko tov kuujo tooke'aro lobako tooke'aro sullugabwo togai'aro tonyu amonoso'ji toga noduuwiyopipinogano. Aki su toro toga kwako tokwe'aro kwako akavida'ai pasudo kworogai'aro kworo kuruv nyounopipinorogano.
Aki lukomgu Gooti toolluro yogalo avalo su tovi'aro sulugumdo tokwe kwako tokwe toval duko tovi noso'moneyokwe sogwollo to'no kinodubulovakono. Gooti tool gami kisuvolo wiyodupudo tonyu mollounapiyo'moneyokwe aiyowo'mo toga kooti yogalo duuwiyonekono. Iruko su tollugwo yere mabai'mo'mdowo'jure toga Gooti tool sulugumdo tokwe kwako tokwe tovallu kuuno mollomwalmwalonekono.
Su toro tovi wonyuno sumoneyokwe aki aro tovi kwononyugono. Gooti tool gami sia kig su tovi mwaloduke toolluro sumdollu toru a'mwo abolo yovo agutokwe togai'aro yovo maiyokwe togai'aro yiuwi'nokai me'no abollungopo su ton abodavopogano. Su toro da'mdopure toga ensel tool Buukiyo Aiyo Yiunokuudo Mujomwekovlaiyo'moneyokwe tovi ausokaikono. Aki buukiyo pugai'aro ausokaikono. Buukiyo su tonyu aro tovino sakwollungopogano. A'mwo abolo ton sumdomgu yere mabolodopure toga kemoro yiuwi'nokai pasudo mujumelabodupudo tonyuno buukiyo su tonyu me'no sokwollosumelabiyajupogano. Toro te ensel tool buukiyo su tonyu kuusuno sumaiyokwe yiuwi'nokai a'mwo abolo me'no abollungopo su tonyuro pasudo amjumelabiyajupo tonyuno buukiyo tonyuda'ai kuu'maiyo toru'no amojagilokaikono. Su toro mojagiloduke tovi'aro Gooti tool yiuwi'nokai a'mwo abolo me'no abollungopo su tonyu kooti yogalo aduuwiyokaikono.
Գովազդներ