Gooti Yawelluro Kuullo tool a'mwo su toollu bwolmwalowo'ji pi'mwo kuudo tov uubweyonekono. Toro uubweyodowo'jure tokwe jurogudo imo'nowo'ji a'mwo abolo tonyu ilaiyo to'no mido mollomwalmwalonekono. Toro tool Gooti Yawelluro ilaiyo winodowo'jure tonyuno kuudo you'movla'mwalonekono. Aki toro tool Gooti Yawellu dolago tomuu mwalowo'ji kwolluno ilomoropi imwolawonekono.
1 Koorin 1:30 - Gooti Toolluro Yogalokwono30 Yiuno Gooti judo toolluro kemi ilaiyo yaikullugoloduke tovida'ai kevu Krais Jisaseke me'no uuguro'mwonyodupudo togaikul kweke mujomwekovla'mdupudogaikikono. Toro mujomwekovla'mdupudo su toollu'aro Gooti tool gamoro pi'mwo kuudo ton nekuduuwallodowodekono. Aki Krais Jisas su toollu'aro nevu Gooti toolluro sumdo tovi sugudo imo'nodowa gamoro a'mwo abolo kuunodo wimo'nodowadonogano. Aki toro toollu'aro Gooti tool nemi mobiyonekuma'dowodekono. Տես գլուխը |
1 Koorin 1:30
76 Խաչաձեւ Հղումներ
Kevu toro yodupudo tovino tov Gooti tool gami pi'mwo kuudo tokwe yogalo puruv aro adokaikono. “Nuu a'mwo abolo tonyomno proofet pworogai'aro a'mwo kuurotokwe pworogai'aro toorai nomorapimonyugono. Toro amorapimi kuvi kuruv su tooravuro pwekwojai noromiyosupinorogano. Aki pwekwojai kaiyako nyugolpinorogano.” Adokaikono.
Nuu kemoro mago tonyu davo'mi aki pi'mwo kuudo ton nekullamonyugono. Moro yogalo aikullami su togai kevu nokwo wuudupinorekikono. Moro yogalo tokwe kuudupi su tovi kemoro yiuwi'nokai ikomago tooro ku'nono muuwolopinorogano. Aki kemoro yogalo su tovi ikomago kworo kuruv ku'nono mabwolomorumwogapiyapinokwono.
Toro kuudoka tovi Jisasol aro kuudokaikono. “Nuvnokwe toonyu puutonyugono. Aki nuu yogalo nebal'nodonyugono. Aki nuu aiyo yiunokuudo mujomwekovlaiyo'moneyokwenyugono. Toro te a'mwo pwolnodo kwol kuruv moro Nyunumiyago toollomno biyo'mo kwino'ji tool puuto pumgu'aro abwo'ji tov ku'nono mabai'mowonekono. Toro kwol kuruv yiuno numi'aro abwo'ji toolno'gwowi nokwo bai'mowonekono.
Nuu a'mwo abolo su tobuurai gumino yovo tovino kuu'maiyo toru me'no amoruujajonyugono. Aki nuu gumino yovo su tovino kuuno nomoruudumwalmonyugono. Su tov aro tovinokwono. Guu mino kalo buuropino gujunodowodo to'busuko kubalno kalo buuropino pasudo su tov moro a'mwo abolo akabuurai nokwo kuuluuwo'mwalonokwono. Aki nuvnokwe toonyu moro a'mwo abolo su tobuurai noulomwalmwalmonyugono.” Jisasol subusu'nyogalo toro kuudokaikono.
Su tov aro tovinokwono. Nuvu gumoro yogalo anyabodo ton me'no kwiyonyugono. Yogalo kwiyo su tonyu me'no ma'dupu mino aro kuudo souronuma'mwakopogano. Oo su tool Gooti toolluda'ai nebal'no kwolabokaldeyo. Kuudo souronuma'mwakopogano. Aki toro ton mino tov aro kuudo kuubwemwakopogano. Oo Gooti toolluro amonekwopiyabokaldeyo. Kuudo kuubwemwakopogano.
Toruda'ai Jisasol a'mwo abolo tonyu aiko te sodubwasoka toga aro kuudokaikono. “Nuu yiuwi'nokai a'mwo abolo kwako akavi mwalodupudo tonyu bako wimo'nodumdonyugono. A'mwo pwol numi anumjuno'ji su tool dugumdo tomuu miyomjomwekovla'mwalonekono. Toro kwol kuruv aiyo yiunokuudo mujomwekovlaiyo'moneyokwe bako to'gwowi kurukwe imo'nonekono.” Kuudokaikono.
Toro te nuu a'mwo abolo su tonyomno amogwapimo tov aro tovinokwono. A'mwo abolo su ton dugumdo tomuu kuulomwalodupudogano. Toro tonyu gumoro kuuguudo yodubwasodo'bure tovida'ai kemoro sumdo ton delukuulludapiyo'bi bako tovi nokwo wonmwalpinogano. Toro ton Satanyolluro jurogudo tovi dolago tomuuda'ai birolo'nugolokwopi Gooti toolluro jurogudo tovi dolago tomuu nokwo kuulomwalpinogano. Aki toro ton mino kuudo anubwepi tovino tov nuu kemoro ma'no ma'nodo tovuro kirumwallo tovi modukwopiyo'mi Gooti toolluro a'mwo abolo kuunodo me'no ajesungiko nyumo'numwalpinogano.” Yogaimaguurai tov su toro anyudokakwono.” Kuudokaikono.
Toro tov Gooti tool a'mwo abolo tonol gamoro sumdo tovi sugudo wimo'nyo'moneyokwe puuto soulonekubweyoka tovino nekuduuwallodowodokwono. Toro te a'mwo abolo yiuno kuuguudo sugudo su tovino kuudo kuubwepi tono Gooti toolluro sumdo tovi sugudo nokwo wimo'nupinogano. Toro tovino Gooti toolluro yogalo sakwollungiko puruv aro dodowodokwono. “A'mwo abolo kuudo kuubwepi ton Gooti toolluro sumdo tovi sugudo wimo'nopi aiyo yiunokuudo mujomwekovla'mwalpinogano.” Gooti toolluro yogalo sakwollungiko puruv toro dodowodokwono.
Kuudo neya jaullulo. Gooti su tool muudu'nodo toga yiuwi'nokai noonyumwonyu tonyu yokwolloso'no gavnokwe tool mollomwalodowodogano. Toro sokwollosoka toolluno tov yovo aguto neya ma'mwalono'moneyokwekono. Toro te ne kunol kuruv gamino yovo tov yiunokuudo neya ilomoropimwolowanekono. Nebal'nodokwono.
Aki moro iko avalo tovasuda'ai Adroonikoseke Juuniyaseke tooral nuuge wuulo killo'mo ago tovi aule'nallajuuwolorakono. A'mwo su tooral yovo ilaiyo kurukweyorakono. Toro tooral nuu Krais toolluno kuudo yere muubweyodore toga kworalda'ai me'no kuubweyajulorakono. Aki toro tooralluno Jisasolluro kuurotokwe tooro kuudo me'no youroma'dupudorakono. Toro toorallomno moro, “Ilaiyokwonoo,” tov kuuwopiyamono.
Aki aiyoga a'mwo aguto kig Devitolluro puukwollo ajakwolloka puruv aro tovinokwono. A'mwo abolo pun ma'no ma'nodokwe tonyuno tov kevnokwenyuro sugupasudo'mdeyo tovida'ai Gooti tool ilaiyo molloma'dowodolmaiyo. Toro kun kuruv yiuno Gooti toolluno kuudo uubweyodopure tonyu Gooti tool gamoro sumdo tovi sugudo wimo'nyo'moneyokwe ilaiyo molloma'dowodekono. A'mwo abolo molloma'dowodo su tobuuro kemi poowokalago togai ilaiyo bwotonyo ibwosunodupudogano. Su toro tovino kig Devitolluro puukwollo ajakwolloka tov arokwono.
Aki puruv a'mwo pwolnodo toolluro Gooti toollu kisuvolo kwiyoka tovasuda'ai bwotonyago tonol Gooti toolluro sumdo tovi ma'no ma'nodokwe sumo'nyajuwonogano. Su toro to'busuko kubalno a'mwo pwolnodo tool Gooti toollu pi'mwono kuumjunoka tovida'ai nevu bwotonyago tonol Gooti toolluro sumdo tovi sugudo wimo'nodowadonogano.
Kevu kuudo neya jaullulo. Muudu'nodo toga ma'no ma'nodo tovi dolago tomuu mwalodowa abollajuwonogano. Toro kuvi kuruv aga'no'gwowi nevu Gooti toolluro yasuwa'wino sugumaluko tovi dolago tomuu mwalodowadonogano. Nemi su toro kuulomonekumwallo'moneyokwe Aguto Jisas Kraisol womdo me'no sopiyokaikono. Toro tovino tov nevu Gooti toolluro sumdo tovi sugudo wimo'nodowa aiyo yiunokuudo mujomwekovlaiyo'moneyokwe tovi ma'dowadonogano.
Danyu'nyuwuulo su tov yiuno Gooti toolluro sokwollosoka avalo puno ibwosunodupudo'maiyo. Ne kunol kuruv nemi poowokalago tokwe danyu'nyuwuulo aval'no ibwosunodowadonogano. Toro ibwosunodowado kuvi kuruv nevu Gooti toolluro Kuullo tool me'no amarowonogano. Kuullo su tool Gooti toolluro yasuwa'no nekullabiyo'moneyokwe tovida'ai muudu'no amarowekono. Gamoro yasuwa'no nonekullabwono puno'gwowi yere mama'dowado tovino tov yiuno sogwollo to'no kingovla'mdowadonogano. Aki gamoro kwoloraiyo tonollu gavuge ilomwallo'moneyokwe sulowa'ji toga kulako muuduko ton nonekubweyono tovino sogwollo kingovla'mdowadonogano. Toro kingovlavowa'ji toga nemoro poowokalago togai danyu'nyuwuulo ton ibwosungovla'mdowadonogano.
Toro toonal kevu wagwolago Koorinda'ai Gooti toolluro mollu'bwoto togaikullomno pas akav saikuukwollumwakuuwolo. Krais Jisasol gavnokweyolluro a'mwo abolo sugudo wimo'nyo'moneyokwe me'no ajaikubweyokaikono. Aki yiuwi'nokai tomuuda'ai a'mwo abolo ton nemi Aguto Jisas Kraisolluno yovo tovida'ai, “Donekullo'mwojonoo,” subusu'nyogalo wuudodupudo kunyu kuruv Gooti tool gamoro a'mwo abolo wimo'nyo'moneyokwe jesodowodogano. Toro te kevuge'aro nevuge'aro yiuwi'nokai tonollu Aguto nonekullumo'nodowodo tool Krais Jisasol kwol kuunogano.
A'mwo abolo pun su toro dodupudo kuvi kuruv Gooti toolluro me'no doma'dowodo Juuwodeyo oo a'mwo abolo Juu miyawosunodupudodeyo yiuwi'nokai su tonyuno'gwowi kuuguudo su tov Krais toolluno yodubwasodowodokwono. Gooti toolluro jurogudo tokwe'aro pi'mwo kuudo tokwe'aro toval Krais toolluda'ai lokabodubulovakono.
Neya duu'nyulo. Kemi tellunumiyago ikullumo'nodowodo tool yiuno nuu judo toonyunodokwono. Su tov nuvu kuuguudo sugudo tokwe moruudekumollodore tovi kevu wuu'no'mno Krais Jisasolluno kuudo kuubweyopogaikikono. Su toro tovi'aro kevu moro kwoloraiyo tobuurekulbusuko me'no anyumo'nopogaikikono. Toro togaikullu a'mwo bwotonyago kuunodo tooro Krais toolluno sodekubwasupi kuruv nuvubusuko kemi tellunumiyago maikullumo'nupinorogano.
Kevu pugaikul sumdomgu su toro sumo'nyajupogaikikono. Toro kuvi kuruv aga'no'gwowi Gooti tool kemoro ma'no ma'nodo tonyu me'no mollol'movaikudukwopiyo'no gamoro a'mwo abolo kuunodo me'no wimo'nodupudogaikikono. Toro togaikul aro tovalluda'ai gamoro sumdo tovi sugudo kwimo'nopogaikikono. Aguto Jisas Kraisolluno yovo tokwe'aro nemi Gooti toolluro Kuullo tool womdo ikulloduke tokwe'aro tovalluda'ai kevu gamoro sumdo tovi sugudo kwimo'nopogaikikono.
14-pela kworomo tobuul me'no abawoka toga nuu Krais toollu uuguro'mwonyodumdo toonyu Gooti tool gamoro ago muunyu kai'muuno anumokailokanyugono. Toro numokailno sumaiyokwe sulugumdo puruvallu uuwolokailano sulugumdo naba 3 tovi sulai'movonyugono. Su toro sulai'movo toga nuu moro kulako tokwe sulai'movonyudukono oo moro kuullo tooke sulai'movonyudukono. Su toro tovino nuu kuudo miyau'mwakono. Yiuno Gooti toolno'gwowi kuudo nyau'mwallo.
Kuudo neya jaullulo. Gooti tool aro me'no adokaikono. “Dugumwuulo tomuuda'ai bako tov imo'nono.” Toro adoka Gooti su tool nemoro poowokalago tonyu Jisas Kraisolluro bako tov me'no anekuuwokaikono. Gooti toolluro bako bwotonyo su tov Jisas Kraisolluro sumdomago tovi'aro nevu me'no wonoma'dowadonogano. Toro te bako su tov nemoro poowokalago tonyu anakuuto tomuu me'no pwopiyodowodokwono.
Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.
Toro te nevu Moosesolluro loowo su tovi kisuvolo me'no yodowore tonollu Gooti tool kaiyako sanekullugolowo'jujukekono. Toro kuvi kuruv nemino tov kaiyako nomapiyokwe Krais tool aro abiyonekumorabokaikono. Krais su tool nemoro aiko toru malluno sumaiyokwe i'noguropte tovi ilejuku'na'duke toollu Gooti tool kaiyako sugolokaikono. Su toro tovino Gooti toolluro yogalo puruv aro sakwollungikokwono. “Yiuwi'nokai a'mwo iko te sulejuku'napi toorai Gooti tool kaiyako igolodowodorogano.” Sakwollungikokwono.
Gooti toolluro womdo sugudo yo'mo winodowodo su tov arokwono. Gooti tool gamoro muunyu kai'muuda'ai sokwollosoka togai'aro aki kwako akavida'ai sokwollosoka kugai'aro yiuwi'nokai tonyu avalo puru mollu'bworosowo'ji Krais toollu dolago tomuu wollo'moneyokwe me'no adomduukuurosokaikono. Gooti toolluro adomduukuurosoka su tov gavnokweyolluro me'no ajesungiko toga kuvinono nyonekono.
Toro te Gooti tool gamoro kuunodo wimo'nyo'moneyokwe nemi me'no abiyonekumarokanogano. Toro tonollu gamoro Kuullo tool me'no anekubweyokaikono. Toro anekubweyoka su tool aro tovino nekuduuwallo'mekono. Gooti toolluro yiuwi'nokai nonekullabiyo'mo subuu'yamju yodowodo su tonyu aga yere mama'mwakuuwo kuvi kuruv lukomgu kuvinono nomaranonogano. Toro tovino tov Gooti jurogudo toolluno yovo tovi neya ilomoropimwolowanonogano.
Toro te neya duu'nyulo. Nevu yiuwi'nokai toga sugupasudo tonyu mujumovlaiyo'moneyokwe Gooti tool aiyogada'ai me'no sovrovanekubweyajukekono. Sugupasudo su tonyu kuvinono uumjungovlaiyo'moneyokwe Gooti tool nevu Krais Jisasollu uuguro'mwonyodowado tonollu aiyo aiko te me'no yokwollanekubweyodowodonogano.
Aki neya duu'nyulo. Gooti toolluro Kuullo aikullaboka tool aro tovino jaikubweyo'moneyokweyokwono. Lukomgu Gooti tool kemi ikumokailawo'ji ilaiyo to'no nyulomwalpinogaikikono. Su toro tovino jaikubweyo'moneyokwe Kuullo su tool aikullabokaikono. Toro tovino tov Gooti toolluro Kuullo su toollu kisuvolo wiyopi jul'nyo nuubwemwalpiyo.
Aki Krais toollu yiuno'no uuguro'mwonyo'moneyokwe to'nodonyugono. Toro te nuvnokwe toonyu Moosesolluro loowo tovi'aro Gooti toolluro sumdo tovi sugudo wimo'nodumdonyumaiyo. Toro kuvi kuruv nuu Krais toollu kuudo kuubweyo tovi'aro Gooti toolluro sumdo tovi sugudo wimo'nodumdonyugono. Kuudo neya jaullulo. Yiuno Krais toolluno kuudo uubweyodowa'jure tovida'ai to'no nevu Gooti toolluro sumdo tovi sugudo wimo'nodowadonogano.
Krais toolluno kuuguudo sugumaluko tov kemoro yiuwi'nokai anakuuto tomuu neya kuullo'movaikwopimwalonokwono. Toro togaikul Jisasolluro a'mwo abolo tobuurai Gooti toolluro pi'mwo kuudo ikullabodowo'jure togai neya yodubwasopi dodumul'mwojogaulo. Kemoro poowokalago tonyu Gooti toollu, “Nenoloo,” wuujo'moneyokwe tov neya kuulaikwo'mwalonogaikikono. Toro kuulaikwo'dowo'jure toga kevu dato puruvapuruv tomgu'aro dodomwalogaulo. Dato pun Gooti toolluro yogalokwe buukiyo tovi wo'dupudogano. Aki dato pun Gooti toollu ilomoropiyo'moneyokweyogano. Aki dato pun Gooti toolluro Kuullo tool ikubweyodowodogano. Dato su toro togai kevu neya dodomwalogaulo.
Oo kemino tov aro anekullunadopiyo. Gooti sumwoluko kavo wosunyo'moneyokwe tool kemi womdo nekullumwalonekono. Toro ikullodowo'jure tovida'ai kemoro yiuwi'nokai somjomwekovlapi tomgu'aro Gooti gavnokwe toolluro kuunodo nokwo wimo'numwalpinogaikikono. Toro wimo'nugovlavopi nemi Aguto Jisas Kraisol abwo'ji toga kevu a'mwo abolo kaiya'nodomaiyokwe to'no neya imo'nupinogaikikono. Su toro kuvinono ikullumo'nyo'moneyokwe Gooti tool pi'mwono nomollekumwalonekono. Kemoro poowokalago togai'aro kuudo togai'aro kulako togai'aro tonyu nokwo mollekumwalmwalonekono. Su toro tovino anekullunadopiyo.
Jisas Kraisol a'mwo noromiyoso'mo tooravuro ato tovi gavnokwe tool morubwenyuno sumaiyokwe yiuno'no abolokaikono. Gamoro aboloka su tov nevu yiuwi'nokai ma'no ma'nodo tonyuro womdo tovi ki'na'dowore tonollu amollurolovonekwapiyokaikono. Aki gamoro a'mwo abolo kuunodo wimo'nowa'ji sugupasudo to'no guureji yomjomwekovla'mwalano'moneyokwe amollol'movonekumarokanogano.
Toro te Krais tool muunyu kai'muuda'ai Gooti toolluro pwekwapto kuunodo su toru yiuno puru'monodo toga'no aulokaikono. Toro tool meme toorogai'aro buulmokau taiyo toorogai'aro tooravuro mujako tokwe amokaulokalmaiyo. Toro kwol kuruv gavnokweyolluro mujako abwoloka tokwe amokaulokaikono. Gamoro mujako abwoloka su tovi'aro a'mwo abolo tonol aiyo yiunokuudo mujomwekovlaiyo'moneyokwe nemi ma'no ma'nodo tovuro kirumwallo tovida'ai abomollurolovonekumokalokwokaikono.
Aki kemida'ai pweku pi'mwo kuudo tovino supto subi tov Gooti toollu pi'mwo kuudo pun agujabwoneyokwe tovino neya duudoganogawono. Toro kuudoganbi tookuji Gooti tool yogalo mamodagujurugolonekono. Nemi Gooti su tool yanyagekono. Toro toolluno tov pi'mwo kuudo tovino kuudoganbi su tookuji kuvinono nogujabwonekono.
Jisas Kraisolluro Ganumiyago Gooti tool aiyogada'ai kemi me'no ikwono'no ajaikubweyokaikono. Aki gamoro Kuullo kuulekumwalodowodo toollu'aro kevu gamoro a'mwo abolo kuunodo wimo'nodupudogaikikono. Gooti toolluro kemi su toro saikullugoloka tov aro tovino'mokwono. Kevu Jisas Kraisolluro yogalo tovi uumjungovla'mwalpino'moneyokwe tovinokwono. Aki gamoro mujako tokwe kemi mollol'movaikudukwopiyono'moneyokwe tovinokwono. Oo Gooti tool gamoro yasuwa'wino sugumaluko ton kemi guureji nokwo ikubwemovla'mwalonekono. Aki kevu sumwoluko kavo wosungovlaiyo'moneyokwe kuruv Gooti tool nokwo ikullo'mwojumwalonekono.
Mino yovo tov Saimoon Pitalonyugono. Toro toonyu Jisas Kraisolluro ki'nato womdo tov yodumdonyugono. Aki gamoro kuurotokwe wimo'nodumdonyugono. Kevu nemoro kuudo uubweyodowado su tollugwoji aval'no uubweyodupudo togaikullu nuu pas akav sokwollekwopiyamono. Nemoro kuudo uubweyodowado su tov nemi Jisas Kraisolluro pasudo idopto'nodo tovi'aro ma'dowadokwono. Jisas Kraisol nemi Gootekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.
Jisas Kraisol kwako akavi me'no abiyalo'nokaikono. Toro abiyalo'noka su tov yiuno gamoro wonyo kuuvollunoka to'no anekuduuwallokalmaiyo. Toro kwol kuruv pasudo puruval tovake anekuduuwallokaikono. Pasudo puruv Jisas Kraisolluro wonyo kuuvollunoka tokwono. Aki puruv gamoro mujako abwoloka tokwono. Pasudo su tovalluno Gooti toolluro Kuullo tool kuu'maiyo toru'no adodoluwosokaikono. Gooti toolluro Kuullo su tool yiuno nebal'no yogalo to'no jokwekono. Toro toolluro yogalo adodoluwosoka tov Jisasolluro pasudo su tovalluno kuu'maiyo toru'no nekuduuwallodowodokwono.
A'mwo su tooro abolo puru'monodo kurukwe kuruv sumwonyo miyodupudorogano. Toro tooraino tov kaiyako migolamo'nodupudorogano. Aki toro tooro Sipsip Muugunyo tool buro'nyo buro'nyomdeyo tomuu yomolloduke toollu uumjunodupudorogano. Toro toorai Gooti tool yiuwi'nokai a'mwo abolo kwako akavi mwalodupudo tonyuro akuuto tomuuda'ai me'no abiyomarokarogano. Toro abiyomaroka su tov aro tovino'mokwono. Wosa kuto sumdomguda'ai mulodupudo to'busuko kubalno a'mwo su tooro Gooti tooke'aro Sipsip Muugunyo tooke'aro tooralluro sumdomguda'ai wimo'nupino tovino'mokwono.
Aki aiyokwe aral aral toorogai'aro 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe dato muuduko puruv aro adoporogano. “Guvu judo tookuno puukwollikwiyo aweyogunyugolowosungiko su tovi maro'bi gamoro 7-pela gwomalo amugutowopingiko su tonyu nokwo modogaipolodukwopibinekugono. Yo'bi puukwollikwiyo su tovi guu nokwo kuusogunyugolowosubinekugono. Su tov aro tovinokwono. Gumi aromiyagubweyopo toga guu judo tookujuro mujako abwoloka tokwe Gooti tool a'mwo abolo tonyu abiyomarokagano. A'mwo abolo abiyomaroka su ton yiuwi'nokai judo'no judo'no yovodolobunyo togai'aro aki judo'no judo'no yogaljo togai'aro aki judo'no judo'no kula'nokakwe togai'aro aki judo'no judo'no kantri tovida'ai togai'aro yiuwi'nokai su tonyuda'ai a'mwo abolo tonyu Gooti tool gamiyo'mo abiyomarokagano.
Գովազդներ