أيث-روما 15:15 - ثريفيث 2020

^15-16 وَلَكِن زعْمغ ؤُرِيغ ثَبْرَات-أَ غَارْوم خ ڒبْعَاض ن ثْمسْڒَايِين حمَا وَار ثنْت تتُّوْم شَا. لِأَنَّا نش تݣّغ ڒْخذْمث ن ڒفْقِي تْبشَّارغ س وَاوَاڒ ن أَربِّـي س لْبَرَاكَا نِّي إِي ذَايِي يوْشَا بَاش اَذ يڒِيغ ذ اَخدَّام ن عِيْسَى لْمَسِيح إِ كنِّيو وَار يدْجِين شَا زِي أَيث-إِسْرَائِيل. حمَا اَكنِّيو قدّْمغ اَم يِجّن ن صّذْقث ثصْفَا س اَرُّوْح يقدّْسن حمَا اَت يقْبڒ أَربِّـي.

أيث-روما 15:15 Խաչաձեւ Հղումներ

أيث-روما 12:3

فَا س لْبَرَكَا إِي ذَايِي يُوْشَا أَربِّـي قَّارغ إِ مْكُڒ يجّن زَّايْوم: وَار حسّب شَا يخف نّش كْتَار زِي مِين ثعْنِيذ. شك فكَّر س ڒَعْقڒ نّش عْلَاحْسَاب مشْحَاڒ ن لإِيمَان إِي ذَاش يُوْشَا أَربِّـي.

1 أيث-كورينث 15:10

وَلَكِن نش س اَرْضَا ن أَربِّـي ذوْڒغ مَامّش دْجِيغ ڒخُّو. ثُمَّا اَرْضَا نّس وَار يدْجِي بُو خَافِي س بْڒَا نّْفَع؛ لَّا، نش شَّاثغ تَمَارَا كْتَار زَّايْسن مَارَّا. مَاشِي ذ نش زَعْمَا؛ لَّا، ذ اَرْضَا ن أَربِّـي إِي كِذِي.

أيث-روما 12:6

عْلَاحْسَاب لْبَرَكَا إِي ذَانغ يمُّوْشن غَارْنغ نشِّين لْقُدْرَاث، كُڒ لْقُدْرَا وَار تْشِيبِّيه شَا ذِي ثنّغْنِي. ئِجّن مڒَا يُوْشَا-اَس أَربِّـي لْوَاحِي، أُو لَابُد اَذ يسخْذم لْقُدْرَا-يَا عْلَاحْسَاب لإِيمَان نّس.

أيث-روما 1:5

أَقَا زِي عِيْسَى أُو خ سَّبَاب ن يِيسم نّس يݣَّا ذَايِي أَربِّـي لْبَرَكَا حمَا اَذ يڒِيغ ذ اَرَّسُوْل، أَذ بشَّرغ يوْذَان زِي مَارَّا ڒݣْنُوْس اَزَّايس اَمْنن اَذَاس طَاعن.

1 يوحنا 5:13

نش ؤُرِيغ-اَوم-د ثِمسْڒَايِين-أَ إِ كنِّيو إِي يُوْمْنن س يِيْسم ن مِّيس ن أَربِّـي حمَا اَذ تسّْنم إِلَّا غَارْوم ثُوْذَارْث ن ڒبْدَا ن ڒبْدَاث.

2 بطرس 3:15

حسْبم صّْبَر ن سِيذِيثْنغ نتَّا اَم يِجّن ن ڒْحَاجث إِي كنِّيو يسنْجَامن. ذ مَانَايَا إِي ذَاوم د يُوْرَا ؤُمَاثْنغ يعِيزّن بُوْلُس س ڒفْهَامث إِي ذَاس د يمُّوْشن.

1 بطرس 5:12

ؤُرِيغ-اَوم-د ثَبْرَات-أَ ثَمزْيَانْت خ ؤُفُوْس ن سِيْلْوَان حسّْبغ-ث نش اَم ؤُمَاثْنغ ذَايس تِّقث. تْشجَّاعغ-كنِّيو، شهّْذغ مِين قَّارغ مَانَايَا ذ اَرْضَا ن أَربِّـي ذ صَّح. بدّم ذَايس نِيْشَان.

يعيبرانيين 13:22

فَا آي أَيثْمَا تتَّارغ-اَوم اَذ تصْبَرم إِ وَاوَاڒ ينُو إِي زِي كنِّيو تْوصِّيغ مِينْزِي ؤُرِيغ-اَوم-د غِير يجّن ن ثبْرَات ذ ثَمزْيَانْت.

ثبرات غار تيتوس 3:1

سْفكَّر إِ ڒْمُوْمِنِين اَذ ݣّن اَرَّاي إِ ڒْحُكَّام ذ ڒْمخْزن، أَذَاسن طَاعن اَذ يڒِين وجْذن إِ كُڒ ڒْخذْمث ذ ثَصبْحَانْت.

2 تيموتاوس 2:14

سْفكَّر ڒْمُوْمِنِين خ ثْمسْڒَاِيِين-أَ. عْڒم-اَسن زَّاث إِ أَربِّـي بَاش وَار تْمنْغِين شَا خ وَاوَاڒن. أَمنْغِي نِّي وَار ذَايس وَالُو، غِير اَذ يسُوْفغ زݣ وبْرِيذ يِنِّي يتسْڒَان.

2 تيموتاوس 1:6

خ مَانَايَا اَش فكَّرغ بَاش اَذ تْسنْهزّذ لْقُدْرَا نِّي إِي ذَايش يدْجَان زِي أَربِّـي عْلَاحْسَاب وَامِي خَاش سرْسغ يفَاسّن ينُو.

1 تيموتاوس 4:6

ثِمسْڒَايِين-أَ مڒَا ثسْبيَّانذ-ثنْت-يد إِ أَيثْمَاثْنغ اَذ تِيڒِيذ شك ذ يجّن ن وخدَّام ذ اَصبْحَان ن عِيْسَى لْمَسِيح، أَذ تِيڒِيذ تْوَاربِّيذ س وَاوَاڒن ن لْإِيمَان ذ تَّعْلِيم نِّي اَصبْحَان إِي ثْذفَّارذ شك.

أيث-ݣلاطيا 2:9

يَعْقُوْب ذ بُطْرُس ذ يُوْحَنَّا يتْوَاحْسَابن ذ يمقّْرَانن ذِي جْمَاعث نِّي، فهْمن اَرْضَا إِي ذَايِي يُوْشَا أَربِّـي سدْجْمن خَانغ نش ذ بَرْنَابَا س وفُوْس اَفُوْسِي نْسن اَمْعَاشَر. قبْڒن-اَنغ نشِّين أَ نْرَاح أَ نْبشَّر إِ يِنِّي يدْجَان ذ ييُوْنَانِيْين، نِثْنِي اَذ بشَّرن إِ يِنِّي يدْجَان زِي أَيث-إِسْرَائِيل.

1 أيث-كورينث 3:10

نش عْلَاحْسَاب اَرْضَا إِي ذَايِي يُوْشَا أَربِّـي ݣِّيغ يجّن ن دْسَاس اَم يِجّن ن لمْعَلّم يفْسُوْس نتَّا. يُوْسَا-د يجّن نّغْنِي يبنَّا خ دْسَاس-أَ. وَلَكِن أُو لَابُد كُڒ يجّن اَذ يَارّ ڒْبَاڒ مَامّش غَا يبْنَا خ دْسَاس-أَ.