ڒخذايم 10:35 - ثريفيث 2020

³⁵ أَربِّـي يقبّڒ يوْذَان زِي مْكُڒ ڒْݣنْس يِنِّي إِي ث يتݣّْوْذن تݣّن مِين يدْجَان نِيشَان.

ڒخذايم 10:35 Խաչաձեւ Հղումներ

1 يوحنا 2:29

خْمِي غَا ثسّْنم بلِّي نتَّا نِيْشَان إِݣ يدْجَا، أَتَاف اَذَايْوم ثِيڒِي تِّقث بلِّي بْنَاذم إِݣ يسْخدَّامن مِين يدْجَان نِيْشَان نتَّا يخْڒق-د زَّايس.

ڒخذايم 10:2

ذَايس دِّين يتݣّْوذ أَربِّـي، نتَّا ذ مَارَّا اَيثْبَاب ن ثدَّارْث نّس. ئِتݣّ ڒْخِير اَطَّاس ذݣ يِنِّي يحْذَاجن، وَار يخطِّي شَا ثْࢲَادْجِيث نّس.

أيث-كولوس 3:11

وَار يتْغِيمِي بُو ويُوْنَانِي نِغ ذ اَئِسْرَائِيلِي، نِغ ذ ونِّي يطهَّارن نِغ ذ ونِّي وَار يطهِّيرن شَا، نِغ ذ اَبَرْبَرِي نِغ ذ اَوحْشِيو، نِغ ذ يسْمغ نِغ ذ ونِّي يدْجَان حُرّ. لَّا، لْمَسِيح نتَّا ذ مَارَّا، أَقَاث ذِي مَارَّا.

ڒخذايم 15:9

وَار يݣِّي بُو س وُوْذمَاون جَارَانغ، ئِسِيرذ-اَسن ؤُڒَاون نْسن وَامِي ؤُمْنن.

22 أيث-كورينث 7:1

إِذن آي يمْعِيزّن ينُو، وَامِي ذَانغ يعَاهذ أَربِّـي خ ثْمسْڒَايِين-أَ لَابُد أَ نسِّيصْفَا يخف نّغ زِي مَارَّا مِين ذَانغ يسخْنِيزن ذِي دَّات ذ اَرُّوْح حمَا أَ نِيڒِي ذ صَّالِحِين بْڒَا اَخطِّي س ثِيݣّْوْذِي ن أَربِّـي.

ڒخذايم 9:31

ذِي ڒْوقْث نّي جْمَاعث ن ڒْمُوْمِنِين ذِي مَارَّا جْوَايه ن يَهُوْذِيَا ذ لْجَلِيل ذ سَمَارْيَا هْنَان. تْوَاجهْذن، تݣّْوْذن زِي سِيذِي أَربِّـي، تْوَاشجَّاعن س أَرُّوْح يقدّْسن، تْمَارْنِين ذِي لْعَدَد.

أيث-ؤفسوس 5:21

طَاعم إِ وَايَاوْيَا عْلَاحْسَاب ڒُوقَّر نْوم إِ لْمَسِيح.

أيث-ؤفسوس 1:6

أَذ يتْوَابَرَك اَرْضَا نّس يمْغَارن، ئِفَرغ-يث-يذ خَانغ أَربِّـي س مِّيس يعِيزّن.

أيث-ݣلاطيا 3:28

وَار ذِنِّي لَّا اَئِسْرَائِيلِي نِغ ذ اَيُوْنَانِي. وَار ذِنِّي لَّا يسْمغ نِغ ذ ونِّي يدْجَان حُرّ. وَار ذِنِّي لَّا اَرْيَاز لَّا ثَمْغَارْث. أَقَا كنِّيو مَارَّا إِذْوم ثْمُوْنم ذ يجّن ذِي عِيْسَى لْمَسِيح.

1 أيث-كورينث 12:13

لِأَنَّا نشِّين مَارَّا نتْوَاطهَّار س وَامَان س يِجّن ن أَرُّوْح بَاش أَ نِيڒِي ذ يجّن ن جْمَاعث، يعْنِي أَيث-إِسْرَائِيل نِغ ذ ييُوْنَانِيْين، ذ يِنِّي غَار يدْجَا بَاب نْسن نِغ ذ يِنِّي غَار ثدْجَا لْحُرِّيَا نْسن. نشِّين مَارَّا إِذْنغ يُوْشَا-ٱنغ أَ نْسو يعْنِي أَ نْشَرش ذݣ يِجّن ن أَرُّوْح.

أيث-روما 3:22

يعْنِي، أَربِّـي يسمْصْڒَاح اَكِذس مَارَّا ونِّي يتَامْنن زِي عِيْسَى لْمَسِيح، وَار يتْفرَّق جَار يِوْذَان. أَقَا مَارَّا عْصَان أَربِّـي، تْوَاحَرَّامن زِي لْعَظَمَا نّس.

أيث-روما 2:13

لِأَنَّا يوْذَان وَار تْمصْڒِيحن شَا اَك أَربِّـي مڒَا تْصنَّاطن وَاهَا إِ وَاوَاڒ ن شَّرِيعَا؛ لَّا، يِنِّي يتݣّن اَرَّاي س مِين ذَايس ذِي شَّرِيعَا، أَتَاف ذ يِنِّي إِي يتْمصْڒَاحن اَك أَربِّـي.

لوقا 1:28

يُوْذف غَارس لْمَلَاك نِّي ينَّا-ٱس: "آزُوْل يَا ثنِّي إِي خف يرْضَا أَربِّـي، أَقَا سِيذِي أَربِّـي اَقَاث اَكِذم."

أيث-فيليـپـي 3:3

شُوْف، ذ نشِّين إِݣ يدْجَان ذ طَّهَارث نِّي ن صَّح. يعْنِي نْعبّذ س أَرُّوْح ن أَربِّـي، غِير نْتفْتَخَر س عِيْسَى لْمَسِيح، وَار نتْرِيجِي شَا اَڒ لْحَسَانَات نّغ.

ڒخذايم 10:28

ينَّا-ٱسن: "قَا ثسّْنم بلِّي يسْرَائِيلِيْين غَارْسن حْرَام اَذ خلّْطن اَك ڒْبَارَّانِي نِغ اَذ اَذْفن ثَدَّارْث نْسن. وَلَكِن أَربِّـي يسْفَاهم-اَيِي-د قْبڒ وَار قَّارغ إِ حَدّ قَا شك حْرَام نِغ مكْرُوْه.

أيث-روما 2:14

أُو ذ صَّح، يِنِّي وَار يدْجِين شَا زِي أَيث-إِسْرَائِل وَار غَارْسن شَا شَّرِيعَا، مَعْلِيك تݣّن اَرَّاي س نِّيْيث نْسن مِين ذَايس ذِي شَّرِيعَا ن مُوْسَى، أَتَاف نِثْنِي اَذ يڒِين ذ شَّرِيعَا س يِيخف نْسن وَاخَّا وَار غَارْسن شَا شَّرِيعَا ن مُوْسَى.