1 أيث-كورينث 12:28 - ثريفيث 2020

²⁸ ذِي جْمَاعث-أَ ن ڒْمُوْمِنِين يرتّب أَربِّـي ذ اَمزْوَارُو أَرُّسُل، وِيس ثْنَاين لْأَنْبِيَا، وِيس ثْڒَاثَا يمْسڒْمَاذن، منْبَعْد يِنِّي يسْخدَّامن لْمُعْجِيزَاث ذ يِنِّي غَار دْجَانْت لْقُدْرَاث بَاش اَذ سْݣنْفَان يوْذَان، ذ يِنِّي يتْعَاوَانن، ذ يِنِّي يتْكلَّافن س ڒْخذْمث، ذ يِنِّي يسَّاوَاڒن س ڒبْعَاض ن لُّغَاث رُوْحِيَاث.

1 أيث-كورينث 12:28 Խաչաձեւ Հղումներ

مرقس 16:17

ذ ثِيْنَا ذ لْعَلَامَاث إِي د غَا يمظْهَارن اَك يِنِّي يتَامْنن: أَقَّا نِثْنِي اَذ سُوْفْغن جْنُوْن عْلَاحْسَاب يسم ينُو، أَذ سِّيوْڒن س يِيڒسَاون ذ جْذِيذ.

لوقا 6:14

ذِنِّي سِمْعَان، ئِسمَّا-ث بُطْرُس، ذ وُوْمَاس أَنْدْرُوْس، ذ يَعْقُوْب، ذ يُوْحَنَّا، ذ فِيلِيپَّـاس، ذ بَارْتُوْلُوْمَاي،

ڒخذايم 11:27

ذِي ڒِيَّام نِّي هْوَان-د شَان ن لْأَنْبِيَا زِي لْقُدْس غَار وَانْطَاكْيَا.

ڒخذايم 20:28

حْضَاث يخف نْوم. حْضَاث ثْحِيمرْث نْوم، ثنِّي إِي زِي كنِّيو يكلّف أَرُّوْح يقدّْسن. اَروْسث جْمَاعث ن ڒْمُوْمِنِين ن أَربِّـي قَا نتَّا يسغ-يت س يذَامّن نّس.

1 أيث-كورينث 10:32

وَار غطّْڒث حَدّ وَاخَّا نِثْنِي ذ يسْرَائِيْلِيْين نِغ ذ ييُوْنَانِيْين نِغ ذ جْمَاعث ن ڒْمُوْمِنِين ن أَربِّـي.

1 أيث-كورينث 12:18

وَلَكِن ڒخُّو أَربِّـي يستّف طْرُوْفَاث ن دَّات يسّن كُڒ يشِتن مَامّش يخس اَت يݣّ.

1 أيث-كورينث 12:29

مَا زَعْمَا مَارَّا إِذْسن ذ اَرُّسُل؟ مَا مَارَّا إِذْسن ذ لْأَنْبِيَا؟ مَا مَارَّا إِذْسن ذ يمْسڒْمَاذن؟ مَا مَارَّا إِذْسن سْخدَّامن لْمُعْجِيزَاث؟

1 أيث-كورينث 12:30

مَا مَارَّا إِذْسن غَارْسن لْقُدْرَاث اَذ سْݣنْفَان؟ مَا مَارَّا إِذْسن سَّاوَاڒن س لُّغَاث رُوْحِيَاث؟ مَا مَارَّا إِذْسن سْتَرْجَامن؟

1 أيث-كورينث 14:2

شُوْف، ونِّي يسَّاوَاڒن س لُّغَا رُوْحِيَا، مَا يسَّاوَاڒ اَك يِوْذَان؟ لَّا، ئِسَّاوَاڒ اَك أَربِّـي. وَار ذِنِّي حَدّ إِي ذَاس يفهّْمن، ئِقَّار ثِمسْڒَايِين س أَرُّوْح يقدّْسن ذَايْسنْت ڒْمَعْنَاث ينُوْفَّرن.

1 أيث-كورينث 14:4

ونِّي يسَّاوَاڒن س لُّغَا رُوْحِيَا يسْتنْفَاع يخف نّس. ونِّي يسَّاوَاڒن س مِين يعْڒم زِي أَربِّـي يسْتنْفَاع جْمَاعث ن ڒْمُوْمِنِين.

1 أيث-كورينث 14:5

إِيوَا خْسغ مَارَّا كنِّيو اَذ تسِّيوْڒم س لُّغَاث رُوْحِيَاث، وَلَكِن مْلِيح عَاذ اَذ تسِّيوْڒم س وَاوَاڒن إِي ثْعڒْمم زِي أَربِّـي. ونِّي يسَّاوَاڒن س وَاوَاڒ إِݣ يعْڒم زِي أَربِّـي نتَّا يمْغَر خ ونِّي يسَّاوَاڒن س لُّغَاث رُوْحِيَاث، إِلَّا مڒَا شَان يِجّن اَذ يسْتَرْجم حمَا اَذ يسْتنْفع جْمَاعث ن ڒْمُوْمِنِين.

أيث-ؤفسوس 2:20

ثَدَّارْث-أَ نتَّاث ثبْنَا خ دْسَاس ن يِيزْرَا يدْجَان ذ اَرُّسُل ذ لْأَنْبِيَا. أُو لْمَسِيح س يِيخف نّس اَقَاث ذ اَزْرُو نِّي يدْجَان ذݣ ومْشَان اَصبْحَان ذِي ثْغمَّارْث ن دْسَاس نّس.

أيث-ؤفسوس 3:5

ڒْمَعْنَا-يَا وَار ثِيذ يسْمظْهَار شَا أَربِّـي إِ ثَارْوَا ن آدَم ذِي زْمَانَاث إِي يعْذُوْن اَم مَامّش ثِيذ يسْمظْهَار ڒخُّو س أَرُّوْح يقدّْسن إِ اَرُّسُل صَّالِحِين اَك لْأَنْبِيَا.

1 تيموتاوس 5:17

ئِمقّْرَانن ن جْمَاعث ن ڒْمُوْمِنِين يِنِّي يتحْكَامن مْلِيح أُو لَابُد اَثن تْوقَّرم ذ ضُوْبْلِي، خَاصَّتَان يِنِّي يخدّْمن اَطَّاس ذݣ وحدّث ذ وسڒْمذ.

يعيبرانيين 13:17

طَاعث إِ يِنِّي خَاوم يتْرَايَّان، ݣّم-اَسن اَرَّاي مِينْزِي ذ يِنِّي إِݣ يحطَّان ڒَعْمَار نْوم. أَذ ؤُشن نِثْنِي ڒحْسَاب خ مَانَايَا إِ أَربِّـي. طَاعث إِ يِيْنَا بَاش ڒْخذْمث نْسن اَزَّايس فَرْحن وَار خَاسن تْبسِّيڒ شَا. مڒَا ثݣِّيم ثَغنَّانْت اَتَاف وَار كنِّيو ينفّع وَالُو.

يعيبرانيين 13:24

سِيوْضم-اَسن سْڒَام إِ مَارَّا يِنِّي إِي خَاوم يتْرَايَّان ذ مَارَّا صَّالِحِين. يِيْنَا زِي إِطَالْيَا سَاوَّاضن-اَوم-د سْڒَام.