Jeremias 10:10 - Manobo Western Bukidnon OT

¹⁰ Piru iyan is Nengazen tutuu he Megbevayà. Iyan sikandin uuyag he Megbevayà ne Hadì sikandin te wazà pidtemanan. Emun egkepauk sikandin, egkehuyung is kelibutan ne ed-eles is diyà te menge nasyun.

Jeremias 10:10 Խաչաձեւ Հղումներ

Genesis 21:33

Mibpemula si Abraham te sengepuun he kayu he tamarisko ziyà te Beersheba ne mid-azap din dutun is Nengazen, he iyan kes wazà pidtemanan he Megbevayà.

1 Hadì 18:39

Ne hein naahà haazà te langun he menge etew zutun, midlangkeb dan is egkaǥi te, “Is Nengazen, iyan Megbevayà! Is Nengazen iyan Megbevayà!”

1 Hadì 8:60

su para metueni te langun he menge etew kayi te tivuuk he kelibutan he is Nengazen, iyan Megbevayà ne wazè en duma pa.

1 Cronica 29:11

Gemhanan ka, telehuzen ka, dungganen wey ereg he edeliǥen. Su kenikew is langun diyà te langit wey zini te tanà. Iyan ka hadì, he Nengazen, wey lavew ka te langun.

2 Cronica 15:3

Meluǥayad he timpu ne wazà kilelalaa te menge Israilihanen is tutuu he Megbevayà; wazè dan menge memumuhat he mibpenurù kandan, wey wazè dan menge kesuǥuan.

Job 9:6

Ibpelinug din kayi te tanà puun diyà te nesevukan kayi.

Salmo 10:16

Nengazen, edhadì ka te wazà pidtemanan. Egkengeawà is mezaat he menge nasyun kayi te kelibutan he midlimbag nu.

Salmo 100:3

Kilelaa niw he Megbevayà is Nengazen! Iyan sikandin midlimbag kenitew, ne ǥaked kiw zin. Menge etew kiw zin ne iring kiw te menge kerehidu he mid-elimahan din.

Salmo 100:5

Su meupiya is Nengazen; wazà pidtemanan te ǥaǥew zin, ne ebpedayun is kebmetinumanen din te taman te taman.

Salmo 104:32

Emun edtengtengan nu is kelibutan, ne egkehuyung heini. Ne emun edsemsamen nu is buntud, ne ed-evel heini.

Salmo 114:7

Egkeyunggat daan minsan is tivuuk he kelibutan diyà te etuvangan te Nengazen he Megbevayà ni Jacob;

Salmo 145:13

Is kedhadì nu wazà pidtemanan. Nengazen ka he metinumanen te langun he menge penaad nu, wey veliǥeǥawen ka te langun he linimbag nu.

Salmo 146:6

su haazà he edseriǥan, ne iyan sikandin kes Nengazen he nenlimbag te langit, tanà, daǥat, wey te langun he taǥù kayi. Iyan heini kes Nengazen he engayan he edseriǥan te wazà pidtemanan.

Salmo 18:7

Ne zutun ne midlinug, ne minsan is menge pundasyun te menge vuvungan ne neyunggat, tenged te kegkepauk nu, Nengazen.

Salmo 29:10

Is Nengazen iyan ebmandù te zalem te menge wahig; iyan sikandin kes hadì he ebmandù te wazà pidtemanan.

Salmo 31:5

Idsarig ku kenikew is untung ku. Libriya a kenikew, Nengazen, su iyan ka kes Megbevayà he egkeseriǥan.

Salmo 42:2

Egkemezahan a kenikew he iyan uuyag he Megbevayà. Keenu e pa vuwa ebpekehendiyà te valey nu te ked-uvey ziyà te etuvangan nu?

Salmo 68:11

Nenelaan ka, Nengazen, ne impenudtul haazà te mahabet he menge vahi:

Salmo 68:8

nehuyung is tanà wey mid-uzan su geina te nekeuma ka, is Megbevayà te Israel. Impezayag nu is keugelingen nu ziyà te Sinai.

Salmo 74:12

Iyan ka, Megbevayà, hadì dey puun pa zengan, ne kemahabet nu en libriya is menge etew kayi te kelibutan.

Salmo 76:7

Mekahahandek ka, Megbevayà. Wazà ebpekehimu he edsukul kenikew emun egkepauk ka.

Salmo 76:8

Ebpuun te langit imbeǥey nu is kukuman nu. Ne nengahandek is menge etew kayi te kelibutan ne wazà sikandan mekekaǥi hein

Salmo 77:18

Ne egkezineg is selenuhug te menge vagyu; is menge kilat neketayew te kelibutan; ne neyunggat is kelibutan.

Salmo 84:2

Egkesuat a utew he edhendutun! Mibulung ad te kedseled diyà te valey nu, He Nengazen. Is tivuuk he ǥehinawa ku engkanta te kegkelipey tenged kenikew te uuyag he Megbevayà.

Salmo 9:8

Edhukuman nu te hustu is menge etew kayi te kelibutan; mezait wey wazà egkevintahaan dutun te kedhukum nu.

Salmo 90:11

Wazè pa nekesaǥad te ipiktu te zekelà he pauk nu. Ne zutun te ked-iseg te keuluwanen dey te pauk nu, ne ed-iseg daan is kedtahud dey kenikew.

Salmo 90:2

Hein wazà nu pa limbaǥa is menge vuntud wey is kelibutan, ne Megbevayè ke en, ne iyan ka ǥihapun Megbevayà te wazà pidtemanan.

Salmo 93:2

Is kedhadì nu puun pa te puunà, su zaan ke en hein wazè pa is kelibutan.

Salmo 97:4

Is kilat din neketayew te kelibutan. Ne hein naahà heini te menge etew ne mibpengerker sikandan te kegkahandek.

Isaias 37:17

Nengazen, pemineg ka, ne tengtengi nu is langun he nehitavù. Pemineǥa nu is langun he migkaǥi ni Senakerib te ked-undaunda kenikew te uuyag he Megbevayà.

Isaias 37:4

Midsuǥù te hadì te Asiria is peremandar te menge sundaru zin te ked-undaunda te uuyag he Megbevayà. Kela ke seǥipaa te Nengazen he Megbevayè nu is mibpengaǥi zuen te peremandar te menge sundaru ne edsilutan sikandin tenged dutun, umbe pengemuyù ka para kenitew te nengesamà.”

Isaias 40:15

Iyan benar, is menge nasyun iring dà te tiǥis te wahig puun te teleǥuey kayi, etawa eliyavuk diyà te timbangan. Para te Megbevayà, is menge isla ke ebitbiten din, iring dà kahagkap te eliyavuk.

Isaias 40:28

Wazè niw ve metueni wey mezineg he is Nengazen iyan kes wazà pidtemanan he Megbevayà he midlimbag te tivuuk he kelibutan? Kenè sikandin egkeveley wey edluyahan, ne wazà ebpeketegkad te isip din.

Isaias 57:15

Iyan daan heini egkeǥiyen te Utew Lavew he Megbevayà, kes Waǥas he Megbevayà he wazà pidtemanan te untung din: “Diyà a ed-ubpà te metikang wey segradu he lugar, piru ed-ubpa a zaan duma te menge etew he kenà ebpelavew wey mid-iniyug te mezaat he ulaula su wey ku sikandan melig-eni.

Isaias 65:16

Is minsan hentei ziyà te tanà te Israel he ebpenuvadtuvad etawa ebpenangdù, ebeelan din heini pinaaǥi te ngazan ku te Megbevayà he egkeseriǥan. Su edlipatan ku en is midlavey he menge kelised; id-awè ku en heini ziyà te ked-ehè ku.’

Jeremias 23:36

kenè te egkaǥi sikandin te, ‘Duen menge lalag he ibpetudtul kandin te Nengazen.’ Su iyan heini egkeǥiyen dan su para tuuwi sikandan te zuma, umbe egketuis is menge lalag te uuyag he Megbevayà, he Nengazen he Mekeǥeǥehem.

Jeremias 4:2

ne ngazan ku zà is gemita nu emun edheǥeten nu is penangdù nu ne pengungubpaan ka he egkeseriǥan, hustu wey metazeng, ne egkehimu ka he tuvad te menge nasyun, ne ebeǥayan ke zan te zengeg.”

Jeremias 4:24

Neehè ku is menge vuntud wey menge vuvungan he nengehuyung.

Jeremias 50:46

Tenged te utew subra he kegkezeeti te Babilonia egkeenluwag is tanà, ne is erang dan ebpekeuma is kegkezineǥa zuen diyà te zuma he menge nasyun.”

Jeremias 51:29

Iring te etew he egkerkeren wey ebpekeerumpasey te kegkesekiti is Babilonia, su ebeelan te Nengazen is pelanu zin he ebpekesuǥat te Babilonia, ne egkehimu heini he mekevulungbulung he lugar su zutun wazè en ed-ubpà.

Daniel 4:3

Utew igkeinuinu wey utew mekeǥeǥehem is egkengein-inuwan he impaahà te Megbevayà! Is kedhadì din ne wazà pidtemanan.

Daniel 4:34

“Ne kegketapus te pitu he tuig, ne siak, si Nebucadnezar, midangep a ziyà te Megbevayà, ne zutun midlikù is meupiya he ked-isip-isip ku. Umbe midalig ku wey mibeǥayan ku te zengeg is Utew Lavew he Megbevayà he uuyag te wazà pidtemanan. Migkaǥi a te, ‘Is kedhadì din ne wazà pidtemanan.

Daniel 6:26

“Ebmandù a, he is langun he menge etew he sakup te ginhedian ku, kehendeki zan wey tehuza zan is Megbevayà ni Daniel. Su iyan sikandin uuyag he Megbevayà ne wazà pidtemanan te untung din. Ebpedayun is kedhadì din te minsan keenu. Ne wazà ebpekezezaat kayi.

Daniel 6:27

Edlibri sikandin wey ebaal te menge singyal wey menge egkein-inuwan he menge vaal ziyà te langit wey kayi te tanà. Midlibri zin si Daniel te kegkaid te menge erimaung.”

Daniel 7:14

Mibeǥayan sikandin te zengeg wey keǥehem te kedhadì, ne ebpenilbi kandin is langun he menge etew ziyà te nekedseselekawà he menge nasyun, menge kepuun, wey menge kineǥiyan. Ne ebpedayun is kedhadì din te wazà pidtemanan ne wazà ebpekezezaat kayi.

Joel 2:11

Ebmenduan te Nengazen heini is menge terapan he menge sundaru zin, ne edtumanen dan is menge suǥù din. Mekahandekhandek heini he menge terapan ne utew subra is kahabet dan. Mekehandekhandek utew haazà is andew te kedsilut te Nengazen; ne wazà ebpekeeguwanta kayi.

Micas 1:4

Egketunew is menge vuntud he egkeǥiekan din iring te kendilà he egketunew te hapuy, ne egkeǥadgad is menge suǥud he egkeǥiekan din iring te ebeyaan te wahig he edtudà diyà te kelendiǥan.

Nahum 1:5

Diyà te etuvangan din egkehuyung is kelibutan, ragkes is menge vuvungan, wey ragkes he egkerkeren is menge etew kayi te kelibutan.

Nahum 1:6

Hentei is ebpekeeguwanta emun utew egkepauk is Nengazen? Emun duen din egkepeukan ne henduen be te edrepu sikandin te hapuy, ne ebpememeka is menge vatu ziyà te etuvangan din.

Habakuk 3:10

Is menge vuntud henduen be te menge etew he egkerkeren emun egkeehè ke zan. Mid-uzan te mereǥes, mideǥurus is wahig diyà te zaǥat ne midekelà is menge vaǥel.

Habakuk 3:6

Emun edhitindeg ka egkehuyung is kelibutan, ne emun edtengteng ka ne egkerkeren te kegkahandek is menge etew wey egkengetiplak is neuǥet en he menge vuntud. Is menge paaǥi nu ebpedayun te wazà pidtemanan.

Malakias 3:2

Piru hentei vuwa is ebpekaantus dutun te andew te kebpekeuma zin? Hentei vuwa is ebpekehimu he ed-etuvang kandin emun ebpekelepew en? Su iring sikandin te hapuy he idlunsey te vulawan wey sabun he utew ebpekeimu te vuring.

Deuteronomio 32:4

Iyan sikandin batu he endilungè ku; utew hustu is menge vaal zin, wey metazeng is langun he menge paaǥi zin. Metinumanen sikandin he Megbevayà ne kenà sikandin egkesayep; metazeng sikandin ne hustu is menge vaal zin.

Deuteronomio 5:26

Duen be etew he egkeuyag minsan nezineg din is laǥeng te uuyag he Megbevayà he ebpuun te hapuy iring te nezineg tew?

Josue 3:10

Guntaan egketuenan niw he mibpekiduma keniyu is uuyag he Megbevayà, su emun edsurung kew en ne iyan sikandin edsegseg te menge Canaanhen, menge Hitihanen, menge Hivihanen, menge Pirisihanen, menge Girgasihanen, menge Amorihanen, wey menge Jebusihanen.

Zatù 5:4

He Nengazen, hein migenat ka he ebpuun diyà te Buntud he Seir, wey migawas ka te tanà he Edom, midlinug wey mid-uzan te utew mereǥes.

1 Samuel 17:26

Mid-insaan ni David is menge etew he nemenhitindeg diyà te uvey zin, “Hentei ves heeyan is Filistihanen he wazà mekekilala te Megbevayà? Maan is ebpemenhinggat te menge sundaru te uuyag he Megbevayà? Ne hengkey is egkezawat te etew he ebpekepatey kandin wey meengked is kebpeel-elezi zin te Israel?”

1 Samuel 17:36

Neveelan ku en heini ziyà te erimaung wey ziyà te bir, ne ebeelan ku zaan heini keniyan te Filistihanen he wazà medtuu te Megbevayà, tenged te edhinggaten din is menge sundaru te uuyag he Megbevayà.