2 Samuel 18:2 - Manobo Western Bukidnon OT

² Ne impehipanew zin sikandan he tetelu he vahin. Si Joab is egalen te sevaha, si Abishai he suled ni Joab is egalen te ikezuwa, ne si Itai he tig-Gat is egalen te iketelu. Migkeǥiyan sikandan ni Hadì David te, “Iyan ad eduma keniyu te kebpekidtebek niw.”

2 Samuel 18:2 Խաչաձեւ Հղումներ

2 Samuel 17:11

Umbe, edsembaǥan ku sikew he vurvuruna nu is langun he Israilihanen puun te Dan pehendiyà te Beersheba, he iyan egkeiringan niw is pantad diyà te veyvey he utew mezakel. Ne iyan ke en pengulu kandan te kebpekidtebek.

2 Samuel 21:17

Meupiya su nekeuma si Abishai he anak ni Zeruya is edtavang ki David, ne nepatey zin haazà is Filistihanen. Ne migkeǥiyan si David te menge sakup din te, “Kenè key en ebpemineg ke ed-uman ka eduma kenami te kebpekidtebek. Iring ka te sulù te Israel, ne kenè key egkesuat he maawè ka.”

2 Samuel 23:18

Si Abishai he suled ni Joab, he anak ni Zeruya iyan pengulu zutun te 30 he mevurut he menge sakup ni David. Nekepatey sikandin te 300 he menge Filistihanen pinaaǥi te vangkew zin. Umbe, nehimu he nevantug sikandin he iring duen te tetelu he mevurut he menge etew.

2 Samuel 8:16

Ne iyan pengulu te menge sundaru zin, si Joab he anak ni Zeruya. Ne iyan midseriǥan te menge libru te ginhedian din, si Jehoshafat he anak ni Ahilud.

1 Hadì 2:28

Si Joab wazà medtavang ki Absalom para mehimu he hadì si Absalom, piru midtavang sikandin ki Adonia. Umbe hein nezineg din is kedhimetayi ki Adonia, mibpelaǥuy sikandin pehendiyà te tulda te Nengazen ne migawed sikandin duen te menge sungeysungey te menge suyuk duen te pemuhatà.

Salmo 3:6

Minsan linibu pa he menge kuntada is edliǥuy kedì, ne kenà a egkahandek.

Zatù 7:16

Mibahin din te tetelu he grupu sikan is 300 he menge etew zin, ne mibeǥayan din is kada sevaha kandan te vudyung wey tivud he zuen sulù diyà te seled din.

Zatù 7:19

Liwazè en te kezukileman hein nekeuma si Gideon wey sikan is 100 he menge zuma zin diyà te dulunà te kampu te kuntada zan. Wazè pa meuǥet is kegkeilisi te ebantey zutun. Impezaǥing eni Gideon is menge vudyung dan wey mibpenrupet dan is menge tivud dan.

Zatù 9:43

Umbe, mibahin din te tetelu he grupu is menge etew zin. Ne midhendiyà sikandan te menge vevesukà ne zutun dan med-ayan su ebpekidtebek dan. Ne hein neehè dan he nenggawas en puun dutun te inged is menge tig-Shekem, mibpuun en sikandan med-etaki.

1 Samuel 11:11

Meǥaan en egkepawà dutun te sunud he andew, ne mibahinbahin ni Saul is menge sakup din te tetelu he grupu. Ne hein utew pa meselem dutun, midsurung dan is kampu te menge Amunihanen ne mibpenhimetayan dan taman te meudtu. Is wazà mepatey kandan nemelaǥuy he tigselimbaha.