1 Samuel 12:10 - Manobo Western Bukidnon OT

¹⁰ Mibuyù dan te tavang diyà te Nengazen. Ke sikandan te, ‘Nekesalè key, Nengazen. Mibelaǥad dey sikew su iyan mid-azap dey is ledawan ni Baal wey ni Ashtoret. Piru ǥuntaan, luwasa key puun te gehem te menge kuntada zey, ne ed-ezapen dey sikew.’

1 Samuel 12:10 Խաչաձեւ Հղումներ

Salmo 106:44

Piru ebpemineǥen gihapun sikandan te Megbevayà ke ebpengumew zan, ne edtevangan din gihapun sikandan te menge kelised dan.

Isaias 26:16

Nengazen, mibmansu nu is menge etew nu, ne tenged te kedlised dan midangep dan wey mibpengumew-umew kenikew.

Isaias 33:22

Ebeelan heini te Nengazen su iyan sikandin perehukum tew, perevaal te kesuǥuan tew, wey edhadì kenitew. Ne iyan sikandin edlibri kenitew.

Josue 13:31

Ragkes kayi is ketengà te Gilead, wey is Ashtarot wey Edrei, he menge dezekelà he inged diyà te Bashan he ginhedian ni Og. Iyan heini tanà he imbeǥey ziyà te ketengà te menge kevuwazan ni Makir te anak ni Manase, he mibahin diyà te kada pemilya zan.

Zatù 10:10

Umbe, mibuyù te tavang is menge Israilihanen diyà te Nengazen. Ke sikandan te, “Nekesalè key ziyà te kenikew, su mid-iniyuǥan dey sikew is Megbevayè dey su iyan dey mid-azap is menge ledawan te ed-ezapen he si Baal.”

Zatù 2:11

Mibaal te mezaat diyà te etuvangan te Nengazen is menge Israilihanen wey mid-azap dan is ledawan te ed-ezapen he si Baal.

Zatù 2:13

Su mid-iniyuǥan dan sikandin ne nenilbi zan ki Baal wey ki Ashtarot.

Zatù 3:15

Piru, hein mibuyù en maan te tavang is menge Israilihanen diyà te Nengazen, ne mibeǥayan din sikandan te sevaha he etew he ebpekelibri kandan. Iyan sikandin kes givang he si Ehud he anak ni Gera he ebpuun diyà te tribu ni Benjamin. Impehendiyà sikandin te menge Israilihanen te Moab su wey zin ikeveǥey is buhis te Israel ziyà te ki Hadì Eglon.

Zatù 3:7

Mezaat is mibeelan te menge Israilihanen diyà te etuvangan te Nengazen, su midlipatan dan is Nengazen he Megbevayè dan, ne mid-azap dan is menge ledawan ni Baal wey ni Ashera.

Zatù 3:9

Piru hein mibuyù te tavang is menge Israilihanen diyà te Nengazen, mibegayan din sikandan te sevaha he etew he ebpekelibri kandan. Iyan sikandin si Otniel he anak ni Kenaz te hazi ni Caleb.

Zatù 4:3

Si Jabin duen din 900 he kerwahi he menge putew. Ne utew zin midlisedlised is menge Israilihanen seled te 20 he tuig. Umbe mibuyù en maan te tavang is menge Israilihanen diyà te Nengazen.

Zatù 6:7

Dutun te kedtewaǥa zan te Nengazen,

1 Samuel 7:2

Neumahan te 20 he tuig diyà te Kiriat Jearim kes Kavan te Nengazen, ne zutun he menge tuig midlalew wey nemengumew te Nengazen is tivuuk he Israel he ebuyù te tavang.

1 Samuel 7:6

Dutun te netiǥum en sikandan langun diyà te Mizpa, migkuwa zan te wahig ne in-itis dan diyà te etuvangan te Nengazen. Te haazà he andew mibpuasa zan ne mibuyù sikandan te pesaylu te menge salè he nehimu zan diyà te Nengazen. Si Samuel is nengulu te menge Israilihanen diyà te Mizpa.