1 YOHANES 4:21 - PERJANJIAN BARU NALCA YUBA

²¹ Ban nenesa leboka, Kristus adya unulululum aboka nuk elegesuk yub era ban: ”Heknedya Imik Neyung ak wanaʾ ulumla dara, wera alkab ek anaba wanaʾ ululul,” hyok.

1 YOHANES 4:21 Խաչաձեւ Հղումներ

MATIUS 5:43

”Ugunda yuba hnon ulumlaʾ ara, Ugun kabo nim ek ara wanaʾ ulumunukanya, ugunja isaʾ nang ek ara lek ganya bololulum an yub ek ella ululum.

LUKAS 10:37

Dara, Yesus ak sene heil yeilimoknya bedya dara, ”Oblomekaʾ anyek angoo yadyek senewoka arawoknya benyek alkabo dangamok, senewan,” hyok. Yesus adya benyek lebokaʾ ara, ”Wei, wera anasa, ambabya biniboka anaso unulumnulam!” hyok.

YOHANES 15:12

Ban oruklesin: Nara ugunuk wanaʾ ulusin sok, ugumba wanaʾ uldalamnalum aboka orugeisin.

GALATIA 5:14

Nidyaʾ unuwanalum an yub ek momnya dobokaʾ ara, ban yub enedya ok gaka dangalamlaʾ ara, ”Andamnya wanaʾ uldalalam sok, nimi yok nang ek unu neikso wanaʾ ulululum,” aro lebok. Dara, ban hnonok ok unululam bok, nidyaʾ gobdo unululam.

GALATIA 5:6

Nimi Kristus Yesus lomok ulumak nim era, bolaʾ garalamakaʾ, orokaʾ ara, hnon dib nong ak unggulumla. Alda dib senenaʾ ara, wanaʾ unaʾ adya welemla dara, nenyek dib nong ara an.

1 TESALONIKA 4:9

Imik Neyung adya ugun kabo nim ek wanaʾ ubdanalum aboka seleb nekesukaʾ anasa, wera, ban yub en onoʾ momnya dobnenggunusibya.

1 PETRUS 3:8

Anasa damok ara, ugunda nidyaʾ pe neik ganya boboka, neik yuba saboka ulululum. Ugunja unaʾ era neik noungousa enesoʾ anyek wanaʾ uldalalulum. Ugun moumen wanaʾ uldalamunukanya, ganya sokok nenebdangoka ulululum.

1 PETRUS 4:8

Nim ara sik moumen wanaʾ uldalamnaʾ adya, onoʾ malya unaʾ nauba bok, laga lebdangoka doboka bologoldalamakaʾ anasa, yok-yok ununaʾ era mek so bok, ugun moumen anyek hyak nauba wanaʾ uldalalulum.

1 YOHANES 2:7

Nadya hyak wanaʾ ulusin hemyabo nim o! Nadya wen ban momnya doboka beibsin anara wenyek yuba gom. Alda ugun anam Kristus ak dib senewoka dob einilum sum ugunuk seleb lesiknya nenyek, ugun anam sum Imik Neyung yuba nonga kelum yub ek beibsin.

1 YOHANES 3:11

Nunda wanaʾ uldalamnemab an yub era, men youbuka ugunuk seleb leb elegesik.

1 YOHANES 3:14

Alda nunja ella ulumabnya nera, nunda somoknaʾ damok ok ab ara goubuka, embengaʾ unaʾ damok ok sam yeilimoubnya hnonok, ella ulumab. Nunda ban nen ella ulumabaʾ ara, nun kabo nim ek wanaʾ ulumabaʾ adya, anara ella ulumab. Wanaʾ unggulusilnya bera, wera weneba alda somoknaʾ lomok or anam ulumla.

1 YOHANES 3:18

Najabo yab o! Nunda sibamaʾ adyok gom, yuba dem adyok wanaʾ uldanaʾ ara mem. Bok nunda ganya goluwoka dib arawoka, dib aralemab anaʾ ara, nunja dib unulumnamabaʾ adya, wanaʾ uldalamnamab.

1 YOHANES 3:23

Imik Neyung adya unulululum aboka oruklesilnya nera an: Nunda alja me si Yesus Kristus ak dib senewoka, onoʾ Kristus adya nuk lebsuk sok, nun moumen wanaʾ uldalamnemab aboka oruklesil.

1 YOHANES 4:11

Nadya wanaʾ ulusin hemyabo nim o, Imik Neyung adya nuk anaso unu wanaʾ ulusil dara, wera numbabya nun moumen wanaʾ uldalanob.