NEHEMIA 9:15 - KITTA KAREBA MADECENG

¹⁵ Wettunna mennang malupu sibawa akurangeng inanré, Mupanonnoi roti polé ri langié. Sibawa polé ri batu iya malise'é, masse sibawa matedde Mupassolo'i uwaié marajaé pappaleppe dekkaé. Musuroi mennang tudangiwi tana iya Mujanciyangngéngngi sibawa tanro.

NEHEMIA 9:15 Խաչաձեւ Հղումներ

ULANGENG 1:8

Iyya, Puwang, pura majjanciyangngi sininna daéraéro lao ri toriyolomu Abraham, Ishak sibawa Yakub enrengngé wija-wijanna mennang. Jaji laono tudangiwi tanaéro.’ ”

ASSURENG 17:6

Maélo-Ka tettong ri yolomu ri yasé'na séddié batu loppo ri Bulu Sinai. Unrui iyaro batué, namassu matu uwai angkanna iyaro sining tauwé weddingngi ménung.” Napogau'ni Musa makkuwaéro nasabbing sining pamimpinna Israélié.

ASSURENG 16:4

Nakkeda Puwangnge lao ri Musa, “Makkekkuwangngé maélo-Ka panonno inanré iya maonaé pada-padaé bosié untu' iko maneng. Tungke' esso harusu'ko paddeppungengngi iyaro inanré situju genne'é untu' siesso. Nanallalengiro maélo-Ka mojiwi umma'-Ku kuwammengngi Uwissengngi aga mennang naturusiwi parénta-parénta-Ku iyaré'ga dé'.

YEHEZKIEL 20:15

Ri padang kessi'éttonaro mangancak-Ka makkedaé bangsa Israélié dé' Utiwii matu muttama ri tana iya puraé Upassadiya untu' mennang, tana iya sugié sibawa macommo nenniya iya kaminang makessingngé ri sininna linoé.

MAZMUR 114:8

iya pinraéngngi batu karangngé mancaji kolang uwai, sibawa bulu batué mancaji mata uwai.

ULANGENG 8:3

Naleppessakko alupureng, nainappa Nawérékko manna untu' inanré. Iko sibawa toriyolomu dé' naengka nanréi iyaro inanré ri yolona. Napogau'i Puwangnge makkuwaéro untu' pagguruko makkedaé tolinoé dé' natuwo polé ri inanré bawang, sangadinna poléi risininna iya napowadaé Puwangnge.

NEHEMIA 9:20

Nasibawang akuwasam-Mu iya makessingngé Mupaggurui mennang. Manréi mennang manna sibawa ménungngi uwaié situju genne'é.

ABBILANGENG 14:30

Ri lainnaé Kaléb sibawa Yosua, dé' muwi séddi ri yelle'mu iya makkéumuru'é duwappulo taung liyasé muttamakiwi matu wanuwa iya Uwajjanciyangngé lao ri ikoro.

KAJAJIYANG 14:22

Nappébalina Abram, “Mattanroka ri yolona Puwangnge, Allataala Iya Pommatanré, Pappancajinna langié sibawa linoé,

ASSURENG 6:8

Iya manennaro pasenna Puwangnge napalettu'i Musa lao ri bangsa Israélié, iyakiya dé' namaélo mennang bati-batiwi Musa, nasaba angatangeng iya mabecco'éro pura mébbui mennang pettu paddennuwang.

ASSURENG 17:3

Iyakiya iyaro sining tauwé madekka senna'ni namatteruna mennang mannoko-noko lao ri Musa. Adanna mennang, “Magi mutiwiki massu polé ri Maséré? Kuwammengngi idi, ana'-ana'ta sibawa olokolo'ta matéi nataro dekka?”

YESAYA 48:21

Wettunna Napimping mennang molai padang iya makabuttué, dé' mennang namanrasa-rasa madekka. Puwangnge puwé'i bulu batué sibawa passolo'i uwai, polé ri batué jompii uwai untu' mennang.

YEREMIA 32:23

Iyakiya wettunna mennang lettu ri wanuwaéwé sibawa sittaiwi, dé' naturusiwi mennang parénta-parénta-Mu, sibawa dé' natuwo situru sining pappagguruwam-Mu. Sininna iya Muparéntangngéngngi mennang dé' muwi séddi iya napogau'é mennang. Rimakkuwannanaro Mupapoléi sininna abalaéwé ri yasé'na mennang.