ANGIMANGENG 9:15 - KITTA KAREBA MADECENG

¹⁵ Purairo makkasuwiyanni bémbé untu' paddampengeng dosana umma'é. Iyaro bémbé'é nagéréi sibawa nakkasuwiyangengngi pada-pada akkarobangeng untu' paddampengeng dosana muto.

ANGIMANGENG 9:15 Խաչաձեւ Հղումներ

IBRANI 5:3

Sibawa nasaba malemmai aléna, na harusu'i makkasuwiyangeng akkarobangeng, tenniya bawang nasaba dosa-dosana umma'é, iyakiya nasaba dosa-dosanato aléna.

IBRANI 2:17

Bettuwanna iyaé, makkedaé harusu'i mancaji pada-pada saudara-Na ri laleng sininna gau'é. Nanallalengiro weddingngi mancaji Imang Lompo iya matinulué sibawa maressé babuwaé. Nasaba pattumaninnaro, weddingngi riyaddampengeng dosa-dosana tolinoé.

ANGIMANGENG 9:3

Nainappa musuro bangsa Israélié makkasuwiyangeng sikaju bémbé lai untu' akkarobangeng paddampengeng dosa sibawa sikaju ana' saping enrengngé sikaju ana' bimbala iya tungke'-tungke'é makkéumuru sitaung sibawa dé'gaga sala-salanna untu' akkarobangeng ritunu.

TITUS 2:14

Purani nakkarobangeng Aléna untu' idi untu' paleppe'ki polé ri sininna jaé, sibawa pancajiki séddi umma' iya leppe'é polé ri dosaé, iya mancajiyé appunnangen-Na bawang, enrengngé mapato pogau'i makessingngé.

2 KORINTUS 5:21

Dé' namadosa Kristus, iyakiya Allataala mébbui Natanggungngi dosata, kuwammengngi tasimadécéngeng paimeng sibawa Allataala nasaba masséddiki sibawa Kristus.

YESAYA 53:10

Napuwéloi Puwangnge makkedaé manrasa-rasai, sibawa mabbéréyangngi aléna selaku akkarobangeng pappaledda dosa. Namalampé umuru'i matu sibawa mitai asaronna naolai aléna nakajajiyang élona Puwangnge.

ANGIMANGENG 9:14

Nainappa lise babuwana sibawa poppanna iyaro olokolo'é nabissai nanatunui silaong akkarobang ritunué ri yasé'na mézbaé.

ANGIMANGENG 10:16

Nainappa makkutana Musa passalenna bémbé untu' akkarobangeng paddampengeng dosaé. Ripaissengini makkedaé iyaro bémbé'é purani ritunu. Iyaro gau'é naébbui Musa macai lao ri Eléazar sibawa Itamar, nanakkedana lao ri mennang,

2 TAWARIKH 29:24

Purairo nagéréni sining imangngé iyaro sining bémbé'é sibawa natiri'i darana ri mézbaé selaku akkarobangeng paddampengeng dosana sininna ra'ya'é. Napogau'i mennang gau'éro nasaba arungngé pura mapparéntangngi kuwammengngi napakangka akkarobangeng ritunu sibawa akkarobangeng paddampengeng dosa untu' sininna ra'ya' Israélié.