ANGIMANGENG 7:12 - KITTA KAREBA MADECENG

¹² Rékko iyaro akkarobangngé riyakkasuwiyangengngi untu' mattarima kasi, nasibawang iyaro olokolo'é harusu' towi riyakkasuwiyangeng roti iya dé'é napaké ragi. Iyaro rotié wedding iya maompe'é polé ri lama labbu silaongngé minnya zaitun, wedditto roti rakko iya manipié iya risapuiyé sibawa minnya, iyaré'ga béppa labbu iya riyébbué silaong minnya zaitun.

ANGIMANGENG 7:12 Խաչաձեւ Հղումներ

ABBILANGENG 6:15

Harusu towi makkasuwiyangeng sibaku roti iya riyébbué dé' napaké ragi, iyanaritu roti mallébu iya riyébbué polé ri labbu'é ricampuru sibawa minnya zaitun, sibawa béppa nipi iya risapuiyé minnya zaitun. Rilainnaéro harusu towi makkasuwiyangeng akkarobangeng ripatala sibawa akkarobangeng énungeng.

ANGIMANGENG 2:4

Rékko iyaro riyakkarobangengngé roti iya ritunué ri laleng attunungngé, iyaro rotié harusu'i riyébbu temmakkéragi. Iyaro rotié wedding maompe, riyébbui polé ri lama labbu manenné'é sibawa minnya zaitun, wedding towi béppa iya risapuiyé bawang minnya zaitun.

1 PETRUS 2:5

Iko pada-padako batu-batu iya tuwoé. Rimakkuwannanaro sitinajako maélo ripaké untu' patettongngi Bolana Allataala iya rohanié. Nanallalengiro mancajiko imang-ngimang iya tuwoé banna untu' Allataala, sibawa iya naolaéngngi Yésus Kristus makkasuwiyangengngi lao ri Allataala, akkarobangeng rohani iya naéloriyé atinna Allataala.

IBRANI 13:15

Rimakkuwannanaro, naolai Yésus, sitinajaki tuli pojiwi Allataala; iyaro sinrupai akkarobangeng sukkuru'ta ri Aléna iya riyakkasuwiyangengngé naolai napowadaé témué untu' pakalebbii asen-Na.

EFESUS 5:20

Tuli sibawa passalenna muwi aga, sitinajako mattarima kasi lao ri Allataala Ambo'é ri laleng asenna Yésus Kristus Puwatta.

ROMA 1:21

Rupa tauwé naissengngi Allataala, iyakiya rupa tauwé dé' napakalebbii selaku Allataala sibawa dé'to natarima kasi ri Aléna. Sibalé'na mappikkiri'i rupa tauwé iya tessiratangngé; mapettanni atinna mennang.

LUKAS 17:18

Magi na tau polé-poléwé bawang lisu mattarima kasi ri Allataala?”

LUKAS 17:16

Nasuju'na sibawa mattarima kasi ri yolona Yésus. Iyaro tauwé séddiwi tau Samaria.

HOSEA 14:2

Lisuno ri Puwang Allataalamu, éh bangsa Israélié! Dosamu pura nallalengiko tappasolla sibawa menrung.

MAZMUR 116:17

Tiwika matu akkarobangeng sukkuru lao ri Iko, naupaénré towi sempajakku lao ri Iko.

MAZMUR 107:8

Sitinajai mennang sukkuru lao ri Puwangnge nasaba pammasé-Na, nasaba sining ébbu-Na iya mappabengngaé untu' tolinoé.

YEREMIA 33:11

Iyakiya ri onrong-ngonrongngéro riyéngkalingasi matu sadda ariyo-riyongngé sibawa arennungngé nenniya sadda pésta abottingengngé. Riyéngkalinga towi matu élonna sining tau iya tiwié pakkasuwiyang sukkuru lao ri Bola-Ku. Makkedai matu, ‘Sukkuru'no lao ri Puwang Iya Pommakuwasaé, nasaba makessingngi sibawa pammasé-Na mannennungengngi.’ Upédécéngiwi matu iyaé wanuwaé pada-pada pammulanna. Iyya, Puwang, pura mabbicara.”

MAZMUR 50:23

Tau iya makkasuwiyangengngé sukkuru selaku akkarobangenna, aléna ritu pakalebbi-Ka; sibawa lao ri tau passadiyaé laleng Ujellokengngi matu asalamakeng polé ri Iyya.”

NEHEMIA 12:43

Iyaro essoé maéga akkarobangeng riyakkasuwiyangeng lao ri Puwangnge. Mariyo-riyoni ra'ya'é nasaba Allataala pura mébbui mennang masennang. Sining makkunraié sibawa ana'-ana'é maccowé towi mappésta, na saddanna mennang iya marennué riyéngkalingai lettu mabéla.

2 TAWARIKH 33:16

Nainappa napédécéngi mézba onrong assompangngé ri Puwangnge, nanakkasuwiyangeng kuwaro akkarobangeng pappasidamé sibawa akkarobangeng sukkuru. Nasuro manengngi tau Yéhudaé massompa lao ri Puwang Allataalana Israélié.

2 TAWARIKH 29:31

Purairo makkedani Hizkia, “Nasaba makkekkuwangngé purano ripallaing untu' Puwangnge, na selaku pakkasuwiyang sukkuru'mu, harusu'ko tiwi akkarobangeng ri Bolana Puwangnge.” Nainappa sininna tauwé iya hadéré'é kuwaro tiwii iyaro sining pakkasuwiyanna, mala engkato iya nasibawangngé cenning ati tiwi olokolo untu' riyakkasuwiyangeng selaku akkarobangeng ritunu.

ANGIMANGENG 22:29

Rékko makkarobangekko akkarobangeng sukkuru lao ri Puwangnge, pogau'i iyaro situru peraturangngé, kuwammengngi naritarima akkarobangemmu.

ANGIMANGENG 7:15

Harusu'i riyanré jukuna ri esso riyakkasuwiyangenna iyaro olokolo'é, muwi céddé dé'to nawedding ritaro narapi pappa bajana éléé.

ANGIMANGENG 6:16

Labbu nasésaé harusu'i riyébbu roti iya dé'é raginna sibawa nanréi sining imangngé ri onrong iya ripallaingngé, iyanaritu ri seddéna Kémana Puwangnge. Iyanaro bagiyanna sining imangngé iya nabbéréyangngé Puwangnge lao ri mennang polé ri akkarobangeng inanré. Iyaro inanré mapaccing senna'i, pada-padai akkarobangeng paddampengeng dosaé sibawa akkarobangeng passullé arogingngé.

ANGIMANGENG 2:5

Rékko iyaro riyakkasuwiyangengngé roti iya ripanggangngé ri yasé'na appanggangengngé, iyaro rotié harusu'i riyébbu polé ri labbu manenné'é sibawa minnya zaitun, iyakiya dé' napaké ragi.

AMOS 4:5

Akkasuwiyangenno roti selaku kurru sumange'mu lao ri Iyya, sibawa abborono makkedaé purani mutiwi pattambana pakkasuwiyangngé! Pasti iyaro musennangi pogau'i!