TITAS 1:7 - Lai (Hakha) Common Language Bible 2006

⁷ Khrihfabu hruaitu cu Pathian rian ṭuantu a si caah mawhchiat awk a um lomi a si lai. Miruamkai a si lai lo, mithintawi a si lai lo, zurit hmang a si lai lo, mi-aukhuan hmang a si lai lo, mihakkau a si lai lo.

Laibaibal Thiang (BSI)

⁷ Zeitintiah kawhhran hotu cu Pathian chawkengtu a si caah, sawi awk um lomi a si hrimhrim awk a si, mahnawl ummi, thinhun fawi, misurhang-duhtukmi, mi velhhmang, chawva ah hâkkaumi an si awk a si lo,

TITAS 1:7 Խաչաձեւ Հղումներ

GENESIS 49:6

An biathli ah khan kaa tel duh lai lo, an i pumhnak ah khan ka um duh lai lo, zeicahtiah an thin a hun tikah mi kha an thah hna i siamsaknak men ah cawtum kha an tha an pheh hna.

PHUNGTHLÛKBIA 14:17

Mi thin tawi nih cun thil hrut kha an tuah tawn, sihmanhsehlaw mifim deuhmi cu an lung a sau.

PHUNGTHLÛKBIA 15:18

Thintawi nih siknak a chuahter, sihmanhsehlaw lungsaunak nih rem lonak a damter.

PHUNGTHLÛKBIA 16:32

Thinhun leiah a khul a nuarmi cu thazang a ṭhawngmi nakin a ṭha deuh. A lungthin aa uk khomi cu khuapi a latu nakin a ṭha deuh.

PHUNGCHIMTU 7:9

Na thin i sum khawh kha i zuam, lungchung in mi uam peng hi hruh a si.

ISAIAH 28:7

Profet hna le tlangbawi hna hmanh kha zu an ri tuk i an sawn lengmang. Zu le zureu tam tuk an din caah lungmit in an ril lengmang i khoika zawn ah kan kal ti hmanh kha an hngal lo. Cucaah profet nih Pathian sinin langhnak an hmuhmi ah an palh i tlangbawi nih bia an ceihnak ah an palh.

EZEKIEL 44:21

Tlangbawi ahohmanh, chungchin tual kha a luh lai ah zu a ding lai lo.

LEVITIKAS 10:9

“Nangmah nih siseh, na fapale hna nih siseh, tonnak thlam chungah nan luh tikah mitsur hang siseh zu siseh nan ding lai lo, nan thih sual nakhnga lo; mah cucu a zungzal in nan tefa hna chan tiangin nawlbia a si lai.

MATTHAI 24:45

“Cu a si caah aho cu dah zumh awk a tlakmi le a fimmi sal cu a si? Cu bantukin zumh awk a tlak i a fimmi sal cu, a Bawipa nih a sal hawi zohkhenhtu dingah, a caan hmaan tein an rawl a petu dingah, a chiahmi kha a si.

LUKA 12:42

Bawipa nih a leh i, “A si ahcun, aho cu dah zumhawktlak le a fimmi sal cu a si? Zumhawktlak le a fimmi sal cu a bawipa nih a innchungkhar zohkhenhtu ah a chiah i sal dang kha anmah le an caan te cio ah an co awk hnga rawl a pemi hna cu a si.

EFESA 5:18

Zu ri hlah u, zu cu nanmah hrawktu lawnglawng a si ko, Thlarau tu khan khat deuh u.

FILIPI 1:1

Khrih Jesuh sal Paul le Timote nih, Filipi khua i a ummi Pathian mi nan dihlak, Khrih Jesuh a zummi hna cu, nan pastor hna le Khrihfa upa hna he, ca kan in kuat hna.

TITAS 1:5

Krit tikulh i kan chiahtak ah khan ka rak i tinhmi cu, kan ṭuannak i kan nganh tami kha a ningcang tein na hun sersiam hna lai i khua kip ah Khrihfa upa kha na hun chiah hna lai, ti a si. Na hun zulh awkah tiin cawnpiaknak kan chiahtami kha philh hna hlah.

TITAS 2:3

Nutar deuh pawl kha, nan umtuning ah mi hmaizah a thiammi nan si awk a si, na ti hna lai. Mi congoih hmangmi le mizuram an si awk a si lo.

1 PETER 4:10

Pathian laksawng kengtu ṭha bantukin Pathian sinin nan hmuhmi laksawng kha midang ca ṭhatnak ah hmang cio u.

1 PETER 5:2

Pathian nih an pekmi hna tuurun a khaltu kha si u law Pathian nih zohkhenh hna seh ti an duh hna bantukin lungtho lo si loin lungtho tein zohkhenh hna u. Ṭuan man hmuh ding men ah si loin ṭuan nan duh taktak ruang tu ah nan rian kha ṭuan u.

2 PETER 2:10

Cu hna cu an pumsa duhnak fihnung a zul i Pathian zei i a rel lomi kha an si khun. Hi cawnpiaktu hmaanlo hna hi an ral a ṭha i an i porhlaw; cunglei van i a ummi hna kha zei ah an rel hna lo; an serhsat lehlam hna.