LAMKALTU 17:13 - Lai (Hakha) Common Language Bible 2006

¹³ Sihmanhsehlaw Thesalonika khua i a ummi Judah mi hna nih khan Paul nih Berea khua zongah Pathian bia a chim hoi ti an theih tikah an ra i mi cu an hung forh hna i an hung tuai hna.

Laibaibal Thiang (BSI)

¹³ Asinain Thesalonika khua i Judah mi hna nih Paul nih Beria khua ah Pathian bia a chim ti kha an theih tikah an ra i mizapi kha an tukforh hna.

LAMKALTU 17:13 Խաչաձեւ Հղումներ

LAMKALTU 21:27

Ni sarih kha a dongh deng nawn tikah khin Asia ram in a rami Judah mi tlawmpal hna nih Paul kha biakinn chungah cun an hmuh. Mizapi kha an tuai ciammam hna i Paul kha an tlaih.

LAMKALTU 17:5

Sihmanhsehlaw Judah mi kha an nah a chuak i khualak i a vak sawhsawhmi zeiruaramlo minung pawl kha an pumh hna i cu hna cu an au an khuang i khua kha a ning piin hnahnawhnak an tuah. Jason inn kha an va nam i an i ruahnak ah cun khika ah khan Paul le Silas kha an rak um lai i mizapi hmaiah kan chuahpi hna lai an ti.

LAMKALTU 14:2

Sihmanhsehlaw a zum duh lomi Judah mi hna nih khan Jentail mi kha an forh hna i unau pawl kha an huatter hna.

LAMKALTU 6:12

Cuticun mizapi le upa hna le Phungbia cawnpiaktu saya hna kha an tuai hna. Steven cu an fuh i an tlaih i khawngsil hmaiah an chuahpi.

MATTHAI 23:13

“Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna. Vancung Pennak cu mi kha nan kharkanh hna, asinain nanmah cu nan lut duh ṭung lo i luh a duhmi zong kha nan awnh fawn ṭung hna lo.

PHUNGTHLÛKBIA 28:25

Hakkauhnak nih cun rem lonak lawng kha a chuahter ko, cucaah Bawipa i bochan cu a ṭha deuh suaumau.

LUKA 12:51

Vawlei cungah hin remnak tlunter awkah a ra ti ah dahra nan ka ruah? Remnak si loin ṭhennak tu tlunter awkah ka ra.

PHUNGTHLÛKBIA 15:18

Thintawi nih siknak a chuahter, sihmanhsehlaw lungsaunak nih rem lonak a damter.

1 SIANGPAHRANG 21:25

(Bawipa mithmuh i thil ṭha lo tuah awkah aa pemi Ahab bantuk ahohmanh an um lo — cu vialte cu a nupi Jezebel nih a forh ruangah a si.

LAMKALTU 17:1

Amfipolis khua le Apollonia khua kha an hei palpah hna i Thesalonika khua kha an phan; khika ah Judah mi pumhnak inn pakhat a rak um.

LAMKALTU 17:10

Zan a si cangka tein unau pawl nih khan Paul le Silas cu Berea khua ah an kalter hna. Khika an va phak tikah Judah mi pumhnak inn ah khan an kal.

LAMKALTU 20:4

Berea khuami Pirhas fapa Sopater le Thesalonika khuami Aristarkas le Sekandas le Derbe khuami Gaius le Asia ram mi Timote, Tikhikas le Trofimas kha a sinah cun an kal.

2 KORIN 11:26

Ka khualtlawnnak ah hin voi tampi tilian ṭihnung ka ton, mifir ṭihnung ka ton hna, ka phunhawi Judah mi hna sinin le Jentail mi hna sinin harnak ka hmuh, khuapi chungah khuapi chung ummi thil ṭihnung ka ton hna, ramlak ah ramlak i a ummi thil ṭihnung ka ton hna, rili cungah rili cung i a ummi thil ṭihnung ka ton hna i ka hawikom taktak a rak si lo, mi hlennak kha ka huah tawn.