JOHAN 16:20 - Lai (Hakha) Common Language Bible 2006

²⁰ Biatak kan chimh hna: nannih cu nan ṭap nan ai len lai, sihmanhsehlaw vawlei cu aa lawm lai; nan ngaih a chia lai, sihmanhsehlaw nan ngaihchiatnak cu lunglawmhnak ah a cang te lai.

Laibaibal Thiang (BSI)

²⁰ Biataktein, biataktein, kan chimh hna, nannih ngaihchia in nan ṭap lai, vawlei tu cu â nuam lai, nannih nan ngaih a chia lai, asinain nan ngaihchiatnâk cu lunglomhnâk ah a cang lai.

JOHAN 16:20 Խաչաձեւ Հղումներ

JEIM 1:2

Ka u le ka nau hna, nan cungah hneksaknak a phunphun a tlun tikah vanṭha ah i rel u,

MATTHAI 5:4

A ṭap a hrammi cu lunglawmmi nan va si dah! Pathian nih an hnemh hna lai.

2 KORIN 6:10

kan ngaihchiatnak cu an tuah nain kan lung aa lawm zungzal, sifak ngai kan lo sihmanhsehlaw mi tampi kan rumter hna, zeihmanh a ngei lomi ko kan lo, asinain a taktak ti ahcun kan ngeih lomi a um lo.

MARKA 16:10

Mary cu a kal i a hawile kha a chimh hna. An ngaih a chia, an rak ṭap i,

JEREMIAH 31:25

A bami cu ka hrimhter ṭhan hna lai i rawlṭam in thazang a tlawmmi cu rawl khim tein ka pek hna lai.

JUDAS 1:24

Tlu loin an umter khotu hna le a hmaika ah soi awk zeihmanh um lo le lunglawm tein an chuahpi khotu hna —

LUKA 24:21

Kannih nih cun amah cu Israel mi hna a luattertu a si rua lai tiah kan rak i ruahchan. Cu pinah cun, cu thil a umnak hi atu hi a ni thumnak a si.

SALM 30:11

Ka ngaihchiatnak cu lunglawmh lamnak ah na ka thlenpiak cang, ka mithi ngaihnak puan cu na ka lakpiak i lunglawmhnak puan kha na ka pek.

SALM 30:5

A thinhun cu caan tawite chung lawng a si; a ṭhatnak tu nih cun chantlung a nguh. Zan ah mitthli tlaknak um hmanh seh law zinglei ah cun lawmhnak a ra ṭhan ve.

GALATI 5:22

Sihmanhsehlaw Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak,

ROM 5:11

Cu lawng cu a si rih lo, kannih cu Pathian hawikom i a kan sertu kan Bawipa Jesuh Khrih thawngin Pathian ah cun kan i lawm.

LUKA 24:17

Jesuh nih cun a thawh hna i, “Nan kal pah in zeidah pakhat le pakhat nan i ceih len ko?” tiah a ti. Cun hmaichia ngaiin an dir.

LUKA 23:27

Mi tampi nih an zulh i cu hna lakah cun a ṭang aa cum i amah a rak ṭah lengmangmi nu tlawmpal zong an um.

ISAIAH 61:3

Zion i ngaihchia in a ummi vialte hna cu vutcam caah pangpar ṭhi, mitthli caah lawmhnak chiti le thangṭhatnak hla pek awkah a ka thlah. Annih cu Bawipa hrimhrim nih a phunmi thingkung bantuk an si lai. Thil ṭha kha an tuah lai i Pathian cu a tuahmi thil ruangah khan an thangṭhat lai.

BIAPHUAN 18:7

Sunparnak le nuamhnak amah le amah a rak i pek zat te khan, Temhinnak le ngaihchiatnak pe ve u. Zeicahtiah aa thawh i, Keimah cu bawiṭhutdan cung i a ṭhumi siangpahrang bawinu ka si. Nuhmei ka si lo, ngaihchiatnak cu ka ing bal lai lo, a ti.

BIAPHUAN 11:10

Hi profet pahnih hna nih hin vawleicung mi kha temhnak tampi an pek hna caah, hi hna pahnih an thihnak ah hin vawlei cung mi cu an i lawm lai i an thihnak cu an tuk an aih lai i pakhat le pakhat laksawng an i ṭhen lai.

LAMKALTU 5:41

Khawngsil pumhnak cun lamkaltu pawl cu an chuak i Jesuh min ruangah Pathian nih ningzah in awk nan i tlak tiah a ruah hna caah an i lawm ngaingai.

JOHAN 16:33

Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw ṭih hlah u. Vawlei cu ka tei cang,” tiah a ti.

JOHAN 16:6

Cun atu cu kan chimh hna caah nan ngaih a chia.

LUKA 22:62

Peter cu a chuak i lunghno ngaiin a ṭap.

LUKA 22:45

A thlacamnak cun a tho i a zultu hna sinah khan a va kir i an rak i hngilh kha a hmuh hna, an lungre a theih tuk ah an ba dih.

LUKA 6:21

Nannih atu i rawl a ṭammi hna i lawm u, Nan paw a khim lai. Nannih atu i a ṭapmi hna i lawm u, Nan ni lai.

MARKA 14:72

Cu caan te ah cun ar kha a khuang ṭhan i Peter nih cun Jesuh i, “Ar voi hnih a khuan hlanah voi thum na ka hlawt lai,” a rak timi kha a lung ah a hung chuak. Cun a ṭap.

ISAIAH 66:5

Nannih Bawipa kha a ṭih i a nawl a ngaimi hna, Bawipa nih a chimmi kha ngai tuah u. “Ka cungah zumh awk tlak in nan um ruangah nanmah mi lila a cheu nih an in huat hna i an in hlawt hna. An in nihsawh hna i, ‘Lunglawm in nan um kha hmuh kan duh, cucaah cun Bawipa nih a lianhngannak kha langhter seh law in khamh tuah hna seh,’ an ti. Sihmanhsehlaw ningzahnak a hmumi cu anmah kha an si lai.

ISAIAH 12:1

Ni khatkhat cu mi nih hitin hla an sak ni a phan te lai: “Bawipa, nangmah cu kan lawmh ko. Ka cungah na thin a rak hung, sihmanhsehlaw atu cu na ka hnemh i na thin cu a hung ti lo.

SALM 97:11

Ceunak cu miding mi hna cungah khan a tlang i lunglawmhnak cu miṭha mi hna cungah khan a tlang.

JOB 20:5

Miṭhalo lawmhnak cu tawite lawng a si i Pathian zei ah a rel lomi thanuamnak cu caan tawite lawng a si.

1THESALON 1:6

Kanmah le Bawipa kha kan nawl nan kan cawn i temhinnak tampi nan huah nain Thiang Thlarau sinin a rami bia kha lawm tein nan cohlan.

JOHAN 20:20

Cu bia a chim dih cun a kut le a hnak kha a hmuhsak hna. Bawipa an hmuh ṭhan caah a zultu hna cu lunglawmhnak in an khat.

MATTHAI 21:38

Sihmanhsehlaw dum hlanhmi pawl nih khan a fapa cu an rak hmuh tikah an i thawh i, ‘Hihi dum ngeitu fapa a si. Ra u, that u si law a thilri hi i lak u sih,’ an ti.