1 SAMUEL 30:21 - Lai (Hakha) Common Language Bible 2006

²¹ Cun David cu mi za hnih, an baat tuk ca i David a zul kho lo i Besor varek i an kaltakmi hna sin kha a ra phan; cun annih nih David le a sinah a ummi hna kha ton awkah an kal; cun David nih a hei phak deng hna tikah khan conglawmhnak a pek hna.

1 SAMUEL 30:21 Խաչաձեւ Հղումներ

HEBRU 13:1

Khrih chungah unau nan si bantukin pakhat le pakhat i daw zungzal u.

1 SAMUEL 30:10

David le a mi za li hna tu nih khan cun an dawi lengmang hna; asinain Besor vate tan awkah a ba tukmi za hnih kha cu hnuah an rung tang.

BIACEIHTU 8:15

Cun Sukkoth mi sinah cun a ra i, “ ‘Zebah le Zalmunna cu na kut chungah maw an um cang i kannih nih a bami na mi hna cu changreu kan pek hna hnga,’ tiin nan bia eng i nan rak ka tinak Zebah le Zalmunna hi zoh tuah hna ngat u,” tiah a ti hna.

1 PETER 3:8

A donghnak ah ka chim duhmi cu, ruahnak khat le lungthin khat in um u, u le nau bantukin i daw u law pakhat le pakhat i zaangfah u law toidor tein um u.

1 SAMUEL 30:22

Khi tikah David sin i a kalmi miṭhalo hna le misual hna nih khan an thawh i, “Annih cu kan sinah an kal lo caah kan va lak ṭhanmi hranchaw hi zeihmanh kan pe hna lai lo, amah belte, an nupile le an fale cio kha i hruai hna seh law, kal ko hna seh,” tiah an ti.

1 SAMUEL 17:18

cun annih an thong khat haotu caah cawhnuk khal tlang hra hi i phorh fawn. Na ule kha zeitindah an um va zoh hna law, annih sinin hmelchunhnak pakhatkhat rak phor te,” a ti.

1 SAMUEL 17:22

Cun David nih thil kha thilri zohkhenhtu sinah a chiah hna i ralkap hna sinah cun a va le i a ule cu a va biakchawnh hna.