Nannih nih Amah nan hngal fawn lo. Kei nih cun Amah kha ka hngalh. Amah ka hngal lo, tining law, nanmah bantuk lihchimmi ka si ve lai, Amah ka hngalh i a bia zong ka zulh tawn.
Annih nih, “Na Pa cu khuazeiahdah a um?” tiah an ti. Jesuh nih, “Nannih nih nanka hngal lo, Ka Pa zong nan hngal hlei lo. Ka hngal ulaw, ka Pa zong nan hngalh ko hnga,” tiah a leh hna.
Ngaihmanh u Pa nih a kan dawt ning hi zeitlukindah a ngan! Pathian fale tiah kawh kan si! Cucaah vawlei nih ankan hngalh lo, zeicatiah Amah kha an hngal lo.
Pathian Fapa cu a ra i a dikmi Amah kha kan hngalh khawhnâk dingah hngalhthiamnâk a kan pêk cang ti kha kan hngalh. Kannih cu a Fapa Jesuh Krih a dikmi Amah ah khan kan um. Hihi Pathian dik le zungzal nunnâk a si.
Ka Pa nih zeizong vialte ka kutah a chiahcang. Pa in dah tilo cun Fapa hi mizei a si kha ahohmanh nih an hngal lo. Pa zong cu mizei a si tiah, Fapa le an sin i Fapa nih a phuanduhnâk dah ti lo cun ahohmanh nih an hngal kho lo,” tiah a ti.