1 Pedro 1:3 - Manityanati Tupax

³ Uiñanaunati Tupax Yaɨtoti Yɨriabux Jesucristo, ui yarusɨrɨx nipukɨruxti kiatax kaɨma axɨna nosɨboriki tyopiki sɨborikoti tato Jesucristo. Tyone axɨna kɨmenuche baxɨperaka,

Manitanati Tuparrü

³ Uiñanaunati Tuparrü, naqui Yaütoti Señor Jesucristo. Arrti champü tacanache nipucürurrti utacu. Uiti torrio oemo nuevurrü osüboriquibo, itopiqui uitito süboricoti tato Jesucristo eanaqui macoiñoca. Sane nauquiche caüma upucünunca aübu nubarrüperaca ümo nomirria ñana au napese.

1 Pedro 1:3 Խաչաձեւ Հղումներ

1 Pedro 1:23

Axti Tupax kiatax nausɨboriki uiti, axɨna kaɨma ta chɨtɨpɨ ui axɨbama aubaɨtaiki axɨbama koiñoma ñana, ta ui nuraxti Tupax axɨna sɨboriko champɨityo nityakɨrux.

1 Juan 5:4

Tyopiki axti naki aɨtoxti Tupax tapeneko uiti nomɨnantɨ ikuki axɨna kɨx. Axti naki onkotitɨ ɨmoti Jesucristo chɨtapenekotipɨ oboi nomɨnantɨ.

Romanos 15:13

Axti Tupax naki uiche uxia numakionko, tari yachebati aupukɨnunkubu, taikiana axiaintyo uiti aume axaño axɨbama apikokokati, tari yachebati aukusɨubu ui noñemaxti Espíritu Santo.

Efesios 1:7

Aɨbuti Cristo ane maximiakatax oemo ui notoxti, axɨna maximiakatax ñome nomɨnantɨ oboi niyarusɨrɨkɨ nipukɨruxti.

2 Corintios 1:3

Taikiana yarusɨrɨx nɨrixhti Tupax naki Yaɨtoti Yɨriabux Jesucristo, tyonenti Uyaɨ axti naki taruku nipukɨruxti utaku, axti naki Tupax uiche taruku nupukɨnunku.

1 Juan 3:3

Namanaiña axɨbama ikokotama nuxia ta uxiante ñana axɨna sane, bapacheroma nikiubuma nauki aisamunema axɨna uxia nisɨborikixhimia, takana nisɨborikixhti Cristo.

Romanos 12:12

Tari taruku naupukɨnunku ui axɨmanu toxiobo ñana aume. Tari taruku narukux aume axtɨ autakisɨrɨka. Tapɨ ane nanenes chameankapɨ.

1 Juan 2:29

Axaño tusiu aume, axti Jesucristo isamutenti nanaiña axɨna uxia ɨmoti Tupax, tari atusityo aume ta namanaiña axɨbama isamutema axɨna uxia ɨmoti Tupax tyonema axɨbama aɨtoxti.

Efesios 1:3

Taikiana yarusɨrɨx nɨrixhti Tupax Yaɨtoti Yɨriabux Jesucristo, tyopiki aɨbuti Cristo ukurusɨka uiti aɨbu nanaiñantai pukɨnunkux auki napes.

Efesios 3:20

Axti Tupax ane noñemaxti uiche aisamunenti pɨrɨkɨ axɨna mankikia pɨnanakiti. ¡Champɨ pariu au numakionko axɨna uxiantamoebo uiti Tupax utaku ui noñemaxti!

Efesios 1:17

Xhankikia pɨnanakiti Tupax ɨmoti naki Yɨriabux oemo Jesucristo, pɨnanakiti yarusɨrɨx Uyaɨ, nauki uiti atoxi aume axti espíritu ɨmo mapanaunkux, nauki atusi aukɨtɨpɨ, sane ausuputarati nuxia.

1 Pedro 3:21

Axɨmanu tux tɨkañe tyone axɨna tux uiche osɨrikia, tyone axɨna uiche kaɨma ane maximiakatax oemo. Axtɨ osɨrikia chɨtɨpɨ nauki uiyaxɨbi nokɨtɨpɨ, ta nauki manki pɨnanakiti Tupax uxia numapanaunku, ixhimiakatityo axɨba nomɨnantɨ osoi tyopiki ta sɨborikoti tato Jesucristo,

1 Timoteo 1:14

Axti naki Tupax oemo taruku nisuasɨrɨkɨ ɨmoti xhimiakanaintyo uiti nomɨnantɨ sobi: tyopikiti Cristo Jesús onkotitɨ iñemo isuasɨrɨkaityo ɨmoti.

Efesios 2:4

Tapɨti Tupax taruku nipukɨruxti utaku, axɨna nukuasɨrɨkɨ ɨmoti taruku niyarusɨrɨkɨx,

Santiago 1:18

Axti Tupax sane nixhankaxti, toxio uiti osɨborikibo oboi axɨmanio ñemanauntu nuraxti, nauki axoñɨ ukusɨrɨka yupu nanaiña axɨba nisamukuxti.

Tito 2:13

Chepe axtɨ iñatai ñana axɨmanu ensɨmunu tɨkañe oemo axɨna kɨmenuche nubaxɨperaka: niyekixhti tato aɨbu nanentakaxti yarusɨrɨx Tupax oemo Jesucristo, naki uiche ane maximiakatax oemo.

1 Corintios 15:20

Tapɨ kaɨma axti Cristo sɨborikoti tato axɨpekuki makoiñoka. Tyonenti naki kusɨrɨboti asɨboriti tato axɨpekuki makoiñoka.

1 Corintios 13:13

Abe trex axɨba chɨbutakɨrusupɨ: axɨna uikokokati Jesús, axɨna nubaxɨperaka axɨnaintyo nukuasɨrɨkɨ oemoantoe, axɨna yarusɨrɨx omeanaki tyone axɨna nukuasɨrɨkɨ oemoantoe.

1 Juan 3:9

Champɨti taman aɨtoxti Tupax isamutenti axɨna nominainte, tyopiki ane kɨtɨpɨti nisɨborikixhti Tupax. Sane naukiche champɨ chɨchebopɨ ɨmoti aisamunenti axɨba nomɨnantɨ tyopiki tyonenti aɨtoxti Tupax.

1 Pedro 2:2

Takana masiomanka axɨbama aɨbo aboma iku kɨx, apapache iyo nipiaɨx auki napes axɨna champɨ ane eana, nauki uixh ausunaunka sane ane maximiakatax aume,

Hebreos 3:6

Tapɨti Cristo, naki Aɨtoxti, makokonaunxti au nipoxti Tupax axɨmanu pox ta axoñɨ, axtɨ oñonkatɨ nuxia aɨbu nupukɨnunku.

1 Tesalonicenses 1:3

Tusiu nuxia suiñemo nanaiña axɨna apisamute uixh apityusiankata ta apikokota nuraxti Tupax kuasɨrɨti aume, axtɨ autakisɨrɨka champɨ nɨmoche aboi, sɨsio año aɨbu narukux aume kɨmenuti Yɨriabux Jesucristo, sukarɨti Tupax naki Uyaɨ.

Colosenses 1:27

Ɨmoma xhanxti Tupax aityusiankati sukarɨma axɨna taruku niyarusɨrɨkɨ nenaxixhti axɨmanu nixhantɨmoti aisamunenti ɨmo namanaiña. Axɨmanu ananka anekana uiti ta tyonenti Cristo naki anati abaxɨpeku, tyonenti naki uiche ñana aye aboi au nanentakax esati Tupax.

Romanos 8:24

Ui nuxianka aye osoi axɨmanu nuxiantɨmo sane naukiche utaesɨbuka eanaki nomɨnantɨ. Axtɨ axɨmanu nuxiantɨmo chauki tubastai tityone axɨmanu nuxiantɨmo, ¿ñakuti matochenkoiki kɨmenu axɨna tiñatai?

Romanos 8:11

Tapɨ axtɨ nesaxti Espíritu naki uiche asɨboriti tato Jesús ane aukɨtɨpɨ, tyonenti naki uiche asɨboriti tato Cristo toxio uiti axɨna iyebo isɨborikibo naukɨtɨpɨ uiti Espíritu Santo naki anati aukɨtɨpɨ.

San Juan 1:13

Tyonema axɨbama aɨtoxti Tupax, chɨtɨpɨ ui noñema mañoñɨnka, ta ui noñemaxti Tupax.

1 Juan 5:18

Tusiu oemo axɨbama aɨtoxti Tupax, chisamutempɨma axɨba nomɨnantɨ, tyopiki axti Aɨtoxti Tupax asaratitɨ tyakuti tapɨ tapenekoti uiti chobores.

1 Juan 5:1

Namanaiña axɨbama ikokotama axti Jesús tyonenti Mesías, tyonenti aɨtoxti Tupax. Axti naki kuasɨrɨti ɨmoti naki aboma aɨtoxti, kuasɨrɨmaintyo ɨmoti axɨbama aɨtoxti.

Colosenses 1:23

Axɨna sane ñana axtɨ sɨsio año aɨbu napakokonaunku, axtɨ chapiñokotapɨ axɨmanu ɨriotɨ oboi axɨmanio omixhia manityakax. Axɨba omixhia manityakax chauki tɨtusiu au nanaiña iku axɨna kɨx, axɨñɨ Pablo anankañɨntyo xhanunekaka.

Romanos 5:10

Tyopiki axti Tupax naukiche tɨkañe chiyaupɨ nomɨnantɨ osoi ɨmoti, ane maximiakatax uiti oemo ityopiki nikonkoxti Aɨtoxti, sane naukiche uxia uiti Tupax oemo ityopiki nisɨborikixhti.

Romanos 4:25

axti naki koiñoti ityopiki nomɨnantɨ osoi sɨborikoti tato nauki ane maximiakatax ñome axɨba nomɨnantɨ osoi.

1 Juan 4:7

Masarukityaiki, tari ukuasɨrɨ oemoantoe, tyopiki axɨna makumananaunkux kuatɨ esakiti Tupax. Axti naki makumananaunx tyonenti aɨtoxti Tupax ta isuputaratityo Tupax.

1 Tesalonicenses 4:13

Masarukityaiki, suixhanka atusi nuxia aume kausane ñana aɨbuma axɨbama tɨkoiñoma, nauki tapɨ ausucheka isiuma, takana makiataka axɨbama champɨ kɨmenuche axɨperama.

Gálatas 6:16

Taikiana uxia aboi aumeampatoe apasusiu nipukɨruxɨma namanaiña axɨbama sane nisɨborikixhimia isiuki axɨna bakɨpukux, namanaiñaintyo axɨbama Aɨtoxti Tupax.

2 Tesalonicenses 2:16

Axti Tupax naki Uyaɨ taruku nipukɨruxti. Sane naukiche taruku nukuasɨrɨkɨ ɨmoti, naki uiche champɨ nityakɨru nupukɨnunku ta ñemanauntu ñana ane maximiakatax oemo. Pɨnanakiti chepeti Yɨriabux Jesucristo xhankikia pɨnanakimia

1 Pedro 1:13

Sane naukiche, amasankatɨ nuxia, apisamuse axɨna uxia. Amonkatɨ nuxia ta axti Tupax uxia nastaxti aume axtɨ tɨkuati tato Jesucristo.

1 Pedro 1:21

Auki nakaxti Cristo axaño apikokota nakaxti Tupax, naki uiche asɨboriti tato axɨpekuki makoiñoka, auki toxio ɨriakaboti au napes. Sane naukiche axaño amonkatɨ ɨmoti Tupax, tusiuityo aume ta ñemanauntu toxio ñana nanaiña axɨmanu ɨriotɨ tɨkañe uiti.

1 Pedro 3:5

Saneityo niñokoñopox axɨmanio paɨka tɨkañe champɨ nomɨnantɨ oboi, axɨba omonkotɨ ɨmoti Tupax, pakokonaunx ɨmoma axɨbama opikianio.

1 Pedro 3:15

Apanau ɨmoti Cristo naki Yɨriabux au nabausasɨ. Taikiana amasankatɨ nuxia nauki apanuneka ɨmoma axɨbama xhanxɨma atusi ɨmoma axɨna kɨtɨpɨche napakokonaunku,