ՍԱՂՄՈՍՆԵՐ 83 - Նոր վերանայված Արարատ Աստվածաշունչ

Աղոթք թշնամիների պարտության համար

Երգ. Ասափի սաղմոս։

¹ Լուռ մի՛ մնա, ո՜վ Աստված, անձայն մի՛ եղիր և դադար մի՛ առ, ո՜վ Աստված։

² Ահա գոռում են քո թշնամիները, և քեզ ատողները բարձրացրին իրենց գլուխները։

³ Խորամանկ հնարքներ են լարում քո ժողովրդի դեմ և խորհուրդ են անում քո պահպանածների դեմ.

⁴ Ասում են. «Եկեք կորցնենք նրանց, որ ազգ չլինեն, և այլևս չհիշվի Իսրայելի անունը»։

⁵ Միաբան սրտով խորհուրդ արեցին, դաշինք կնքեցին քո դեմ

⁶ Եդովմի բնակարանները և իսմայելացիները, Մովաբը և հագարացիները,

⁷ Գեբաղը և Ամոնն ու Ամաղեկը և փղշտացիները՝ Տյուրոսի բնակիչների հետ։

⁸ Ասուրն էլ միավորվեց նրանց հետ. օգնում են Ղովտի որդիներին։ (Սելա)։

⁹ Նրանց դեմ այնպե՛ս արա, ինչպես Մադիամին, ինչպես Սիսերային, ինչպես Հաբինին՝ Կիսոնի հեղեղատի մոտ։

¹⁰ Նրանք սատկեցին Ենդովրի մոտ, աղբ դարձան երկրի վրա։

¹¹ Նրանց իշխաններին այնպե՛ս արա, ինչպես Օրեբին և Զեբին, և նրանց բոլոր մեծավորներին, ինչպես Զեբեեին և Սաղմանային,

¹² Որոնք ասում են. «Աստծու բնակարանները տիրույթներ դարձնենք մեզ համար»։

¹³ Աստվա՛ծ իմ, նրանց փոշու պե՛ս դարձրու և ինչպես դարման՝ քամու առաջ,

¹⁴ Ինչպես կրակն այրում է անտառը, և ինչպես բոցը խանձում է լեռները։

¹⁵ Նրանց այնպե՛ս հալածիր քո մրրիկով, քո փոթորիկով զարհուրեցրո՛ւ նրանց։

¹⁶ Նրանց երեսները ծածկի՛ր անարգանքով, որպեսզի փնտրեն քո անունը, ո՜վ Տեր։

¹⁷ Թող ամաչեն և շփոթվեն հավիտյանս հավիտենից և ամոթահար լինեն ու կորչեն.

¹⁸ Եվ իմանան, որ դու կաս, որ Տեր է քո անունը. դու միակ Բարձրյալն ես ամբողջ երկրի վրա։