ՍԱՂՄՈՍՆԵՐ 2 - Նոր վերանայված Արարատ Աստվածաշունչ

Աստծու ընտրած թագավորը

¹ Ինչո՞ւ են խռովություն անում հեթանոսները, և ազգերը ունայնն են մտածում։

² Երկրի թագավորները վեր են կենում, և իշխաններն իրար հետ խորհուրդ են անում Տիրոջ դեմ և նրա Օծյալի դեմ՝ ասելով.

³ «Կոտրենք նրանց կապանքները և նրանց չվանները դեն նետենք մեզնից»։

⁴ Երկնքում բնակվողը ծիծաղում է, Տերը ծաղրում է նրանց։

⁵ Այն ժամանակ նա պիտի բարկությամբ խոսի նրանց հետ և իր զայրույթով շփոթեցնի նրանց՝ ասելով.

⁶ «Ես օծեցի իմ թագավորին իմ սուրբ Սիոն լեռան վրա»։

⁷ Պիտի հայտարարեմ հրամանը. Տերն ասաց ինձ. «Դու իմ որդին ես, ես այսօր ծնեցի քեզ։

⁸ Խնդրի՛ր ինձնից, և ես հեթանոսներին քեզ ժառանգություն կտամ և երկրի ծայրերը՝ քեզ ունեցվածք։

⁹ Երկաթե գավազանով նրանց կջարդես և բրուտի ամանի պես կփշրես նրանց»։

¹⁰ Արդ, ո՜վ թագավորներ, խոհեմացե՛ք. խրատվեցե՛ք, ո՜վ երկրի դատավորներ։

¹¹ Վախով ծառայե՛ք Տիրոջը և դողալով ցնծացե՛ք։

¹² Որդուն համբուրեցե՛ք, որ չբարկանա, և դուք չկորչեք ճանապարհի մեջ, որովհետև շուտով պիտի բորբոքվի նրա բարկությունը։ Երանի նրանց, որ ապավինել են նրան։