ՀՈԲ 26 - Նոր վերանայված Արարատ Աստվածաշունչ

¹ Հոբը պատասխանեց.

² «Ինչպե՜ս օգնեցիր տկարին, զորացրի՜ր ուժ չունեցողի բազուկը։

³ Ինչպե՜ս խրատ տվեցիր իմաստուն չեղողին ու մե՜ծ հմտություն սովորեցրիր։

⁴ Այդ խոսքերն ո՞ւմ ասացիր, և ո՞ւմ շունչը քեզանից դուրս եկավ։

⁵ Ուրվականները երկունքով են բռնվում, ստորին ջրերն ու դրանց բնակիչներն էլ։

⁶ Մերկ է դժոխքը նրա առաջ, և մեռելների աշխարհը ծածկոց չունի։

⁷ Նա դատարկության վրա հյուսիսն է տարածում և ոչնչի վրա երկիրը կախում.

⁸ Ջրերն ամպերի մեջ է ծրարում, և ամպերը դրանց տակ չեն պատռվում։

⁹ Նա լիալուսնի երեսը ծածկել է, իր ամպը դրա վրա տարածել։

¹⁰ Նա ջրերի երեսին լույսի և խավարի միջև մի շրջանակ է գծել՝ որպես սահման։

¹¹ Երկնքի սյուները սասանվում են ու նրա հանդիմանությունից ապշում։

¹² Իր զորությամբ ծովն է խաղաղեցնում և իր գիտությամբ Ռահաբին ջարդում։

¹³ Իր հոգով երկինքը զարդարեց. նրա ձեռքը փախչող Վիշապին վիրավորեց։

¹⁴ Ահա սրանք են նրա ճանապարհների ծայրերը, և նրա մասին մեր լսածը փսփսուք է, և ո՞վ կարող է նրա զորության որոտումը հասկանալ»։