ԱՌԱԿՆԵՐ 7 - Նոր վերանայված Արարատ Աստվածաշունչ

¹ Որդյա՛կ իմ, պահի՛ր իմ խոսքերը և իմ պատվիրանները պահպանի՛ր քեզ մոտ։

² Պահի՛ր իմ պատվիրանները, որպեսզի ապրես, և իմ ուսուցումը պահպանի՛ր քո աչքի բիբի պես։

³ Քո մատներին կապի՛ր դրանք, դրանք գրի՛ր քո սրտի տախտակի վրա։

⁴ Իմաստությանն ասա՛. «Իմ քույրն ես», և ըմբռնողությանը «Բարեկա՛մ» կոչիր,

⁵ Որպեսզի քեզ պահի շնացող կնոջից, այն ցոփ կնոջից, որի խոսքերը շողոքորթում են։

Անբարոյական կինը

⁶ Որովհետև իմ տան պատուհանից՝ իմ ճաղավանդակի միջով նայեցի

⁷ Եվ պակասամիտների մեջ տեսա և երիտասարդների մեջ նկատեցի մի պակասամիտ պատանու,

⁸ Որը փողոցով անցնում էր այն կնոջ տան անկյան մոտով և նրա տան ճանապարհը բռնեց.

⁹ Մթնշաղին, երբ օրը տարաժամեց, երբ գիշերվա խավարը պատեց։

¹⁰ Եվ ահա մի կին դիմավորեց նրան պոռնիկի հագուստով և խորամանկ սրտով։

¹¹ Նա աղմկարար էր և կամակոր. նրա ոտքերն իր տանը չէին մնում։

¹² Երբեմն դրսում, երբեմն հրապարակներում և ամեն անկյունում դարանամուտ էր լինում։

¹³ Սա բռնեց նրան և համբուրեց, անամոթ դեմքով ասաց նրան.

¹⁴ «Ես խաղաղության զոհեր պիտի անեի. այսօր կատարեցի իմ ուխտերը։

¹⁵ Դրա համար դուրս եկա քեզ դիմավորելու՝ քեզ փնտրելու, և գտա քեզ։

¹⁶ Մահիճս պատել եմ ծածկոցներով, Եգիպտոսի երփներանգ հյուսվածքով։

¹⁷ Անկողնուս մեջ զմուռս, հալվե և կինամոն եմ ցողել։

¹⁸ Եվ տարփանքով հագենանք մինչև առավոտ, տռփանքով զվարճանանք,

¹⁹ Որովհետև ամուսինս տանը չէ, հեռու ճանապարհ է գնացել։

²⁰ Փողի քսակն իր հետ է վերցրել և լուսնի լրման օրն է տուն գալու»։

²¹ Իր բազում համոզիչ խոսքերով հրապուրեց նրան, իր շրթունքների շողոքորթությամբ խոտորեցրեց նրան։

²² Նա էլ իսկույն գնաց նրա հետևից, ինչպես որ արջառն է սպանդանոց գնում, և ինչպես շղթայակապ խենթը՝ պատժվելու։

²³ Մինչև որ նետը ճեղքի նրա լյարդը. ինչպես որ թռչունն է շտապում դեպի ծուղակը և չգիտի, որ այն իր հոգու համար է։

²⁴ Եվ հիմա, որդյակնե՛ր, լսեցե՛ք ինձ և ուշադրությո՛ւն դարձրեք իմ բերանի խոսքերին։

²⁵ Թող սիրտդ չխոտորվի դեպի նրա ճանապարհները. մի՛ մոլորվիր նրա շավիղներում։

²⁶ Որովհետև նա շատերին է տապալել, և նրա սպանածները բազմաթիվ էին։

²⁷ Նրա տունը դժոխքի ճանապարհն է, որ մահվան սենյակներ է իջնում։