ԱՌԱԿՆԵՐ 5 - Նոր վերանայված Արարատ Աստվածաշունչ

Զգուշացում շնությունից

¹ Որդյա՛կ իմ, իմ իմաստությանը ակա՛նջ դիր և լսի՛ր իմ խոհեմությունը,

² Որպեսզի խելամտություն ունենաս, և քո շրթունքները գիտություն պահեն։

³ Որովհետև շնացող կնոջ շրթունքները մեղր են կաթեցնում, նրա քիմքն էլ յուղից փափուկ է։

⁴ Սակայն նրա վախճանն օշինդրի պես դառն է և երկսայրի սրի պես սուր է։

⁵ Նրա ոտքերը դեպի մահ են տանում, դժոխքին են հասնում նրա քայլերը։

⁶ Նա կյանքի շավիղով բնավ չի գնա, նրա ուղիները խոտոր են, և նա չգիտի։

⁷ Եվ հիմա, որդինե՛ր, ի՛նձ լսեցեք և իմ բերանի խոսքերից մի՛ հեռացեք։

⁸ Նրանից հեռո՛ւ պահիր քո ճանապարհը և չմոտենաս նրա տան դռանը։

⁹ Որպեսզի քո զորությունն ուրիշներին չտաս և քո տարիները՝ անգութ մարդուն։

¹⁰ Որպեսզի օտարները չկշտանան քո ունեցվածքով, և քո տքնության արդյունքը ուրիշի տան մեջ չլինի,

¹¹ Եվ դու կյանքի վերջում հառաչես, երբ որ կսպառվեն միսդ ու մարմինդ,

¹² Եվ ասես. «Ես ինչպե՜ս ատեցի խրատը, և սիրտս արհամարհեց հանդիմանությունը։

¹³ Եվ չլսեցի իմ ուսուցիչների ձայնը և ականջ չդրեցի ինձ դաստիարակողին։

¹⁴ Քիչ էր մնում ժողովքի և ժողովրդի մեջ ամբողջովին կործանվեի»։

¹⁵ Դու քո ջրամբարի՛ց ջուր խմիր և քո ջրհորի միջից հոսող ջրից։

¹⁶ Մի՞թե քո աղբյուրները պիտի տարածվեն փողոցում, ջրերի վտակները՝ հրապարակներում։

¹⁷ Դրանք միայն քոնը թող լինեն և ոչ թե օտարներինը և քոնը.

¹⁸ Քո աղբյուրը թող օրհնյալ լինի, և ուրախացի՛ր քո երիտասարդության կնոջ հետ։

¹⁹ Նա քեզ համար սիրելի եղնիկի և շնորհալի այծյամի պես թող լինի, նրա ստինքներն ամեն ժամանակ թող հագեցնեն քեզ, նրա սիրով միշտ զմայլվես։

²⁰ Եվ ինչի՞ համար, որդյա՛կս, օտար կնոջ սիրով զմայլվես և անառակ կնոջ կուրծքը գրկես։

²¹ Որովհետև Տիրոջ աչքի առաջ են մարդու ճանապարհները, և նա քննում է նրա բոլոր ուղիները։

²² Անիրավին իր անօրենությունները պիտի թակարդեն, և նա իր մեղքի չվաններով պիտի բռնվի։

²³ Նա խրատի պակասից պիտի մեռնի և իր հիմարության շատությունից պիտի մոլորվի։