ԱՌԱԿՆԵՐ 2 - Նոր վերանայված Արարատ Աստվածաշունչ

Իմաստության վարձատրությունը

¹ Որդյա՛կ իմ, եթե ընդունես իմ խոսքերը և ամուր պահես իմ պատվիրանները,

² Ականջ դնես իմաստությանը և սիրտդ խոհեմությանն ուղղես,

³ Երբ իմացությանը կանչես և ձայն տաս խոհեմությանը,

⁴ Եթե դու այն որոնես արծաթի պես և գանձերի նման փնտրես,

⁵ Այն ժամանակ էլ կհասկանաս Տիրոջ երկյուղը և կգտնես Աստծու գիտությունը։

⁶ Որովհետև Տերն է տալիս իմաստությունը, նրա բերանից են գիտությունն ու խոհեմությունը։

⁷ Նա ուղղամիտների համար հաջողություն է վերապահում, վահան՝ պարկեշտությամբ ընթացողների համար,

⁸ Որպեսզի պահպանի արդարության շավիղները. նա է պահում հավատավորների ճանապարհը։

⁹ Այն ժամանակ կհասկանաս արդարությունն ու իրավունքը, ուղղամտությունն ու ամեն բարի ուղին։

¹⁰ Որովհետև իմաստությունը քո սիրտը կմտնի, և գիտությունն ախորժելի կլինի քո հոգուն։

¹¹ Խելամտությունը կպահի քեզ, խոհեմությունը կպաշտպանի քեզ,

¹² Որպեսզի քեզ ազատի չար մարդու ճանապարհից և նենգություններ խոսող մարդուց,

¹³ Նրանցից, որոնք թողնում են ուղղամտության շավիղները, որպեսզի խավարի ճանապարհներով գնան,

¹⁴ Որոնք ուրախանում են չարություն անելով և հրճվում են չարերի նենգությամբ։

¹⁵ Ծուռ են նրանց շավիղները, և նրանք խոտորում են իրենց ուղիների մեջ,

¹⁶ Որպեսզի քեզ ազատի շնացող կնոջից, ցոփ կնոջից, որը հրապուրիչ խոսքեր է ասում.

¹⁷ Նա, որ լքել է իր երիտասարդության կողակցին և մոռացել իր Աստծու ուխտը։

¹⁸ Որովհետև նրա տունը դեպի մահ է տանում, իսկ նրա ուղիները՝ դեպի ուրվականները։

¹⁹ Նրա մոտ գնացողներն այլևս ետ չեն դառնալու և կյանքի շավիղներին չեն հասնելու։

²⁰ Ուստի դու բարիների ճանապարհով պիտի գնաս և արդարների շավիղները պահես,

²¹ Որովհետև ուղղամիտները երկրի վրա կբնակվեն, և պարկեշտները կմնան նրա մեջ։

²² Իսկ անիրավները կբնաջնջվեն երկրից, և անհավատներն արմատախիլ կլինեն նրանից։